زانیاریی نوێ لەبارەی خەرجکردنی پارەی سێ ساڵی جووتیارانی هەرێمی کوردستان دەخرێتە روو
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

زانیاریی نوێ لەبارەی خەرجکردنی پارەی سێ ساڵی جووتیارانی هەرێمی کوردستان دەخرێتە روو

 

ئەندامی لێژنەی ئابووری و وەبەرهێنان لە ئەنجوومەنی نوێنەرانی عێراق ڕایدەگەیەنێت، پارەی سێ ساڵی جووتیارانی هەرێمی کوردستان خەرج دەکرێت.

مەیادە نەجاڕ، ئەندامی لێژنەی ئابووری و وەبەرهێنان لە ئەنجوومەنی نوێنەرانی عێراق، بە (باسنیوز)ی ڕاگەیاند: "ئەمڕۆ لەگەڵ نەهرۆ مەحمود قادر، پەرلەمانتاری فڕاکسیۆنی پارتی، سەردانی وەزارەتی بازرگانى عێراقمان کرد و بە نووسراوێک داوامان کرد بە زووترین کات پارەی سێ ساڵی جووتیارانی هەرێمی کوردستان خەرج بکرێ".

ئەو پەرلەمانتارە گوتیشی: "وەزیری بازرگانى عێراق، ئامادەیی خۆی نیشاندا لەم هەفتەیە پارەکە ڕەوانەی هەرێمی کوردستان بکات، ئەگەر نەشتواندرا لەم هەفتەیە کارەکان رایی بکرێت ئەوە لەسەدا سەد هەفتەی داهاتوو پارەکە دەگات و دابەشی سەر جووتیارانی هەرێمی کوردستان دەکرێت".

دووپاتی کردەوە، بەبیر وەزیری بازرگانى عێراق هێنراوەتەوە کە بەنووسراوی تر داوای خەرجکردنی ئەم بڕە پارەیە کراوە و سەڕۆکوەزیرانی عێراق ڕەزامەندی نیشانداوە، گوتیشی: "بەڵام بەهۆی ناکۆکی سیاسیی و کورتهێنانی بودجەی عێراق تا ئێستا ئەم بڕە پارەیە کە حەقی تەواوی جووتیارانی هەرێمی کوردستنە خەرج نەکراوە".

میادە نەجاڕ، کە بڕیاردەری فڕاکسیۆنی پارتییە لە پەڕلەمانی عێراق، ئاشکراشیکرد، لە ژێرفشاری پەرلەمانتارانی عێراق بەتایبەت فراکسیۆنی پارتی بڕیارە لەم هەفتەیە یاخود هەفتەی داهاتوو پارەکە بگاتە هەرێمی کوردستان.

حكوومەتی عێراقی زیاتر لە 557 ملیار دیناری شایستە دارایییەكانی جووتیارانی هەرێمی کوردستان بۆ ساڵانی 2014 و 2015 و 2016 قەرزارە.