كۆمپانیا وەهمییەكانی حەشدی شەعبی سەرانە لە خەڵكی كەركووك دەستێنن
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

كۆمپانیا وەهمییەكانی حەشدی شەعبی سەرانە لە خەڵكی كەركووك دەستێنن

لە شاری كەركووك ژمارەیەك كۆمپانیای وەهمی سەر بە میلیشیاكانی حەشدی شەعبی سەرانە لە هاووڵاتییان و كاسبكارانی شارەكە وەردەگرن.

ئەمڕۆ هەینی محەمەد سەلیم بەرپرسی گرووپی شەقام كە ماوەیەكە لە شاری كەركووك دامەزراون، بە (باسنیوز)ی ڕاگەیاند لە كەركووك ماوەیەكە سەرانە لە خەڵك وەردەگیرێ و ئەوانەی ئەو كارانەش دەكەن بە ناوی چەند كۆمپانیایەكی وەهمیەوە دەیكەن.

دەشڵێ كۆمپانیا هەیە بە ناوی هەڵگرتنەوەی زبڵ و خاشاكەوە مانگانە بڕی پێنج هەزار دینار لە هەر ماڵێك وەردەگرێ، ئەوان بەدواداچوونیان كردووە و دەركەوتووە كۆمپانیاكان هیچ پەیوەندییەكیان بە شارەوانییەكانەوە نییە.

محەمەد سەلیم باسی جۆرێكی تر لە كۆمپانیای وەهمی دەكات و دەڵێ كۆمپانیا هەن بە ناوی پاسەوانی شەوانەوە لە بازاڕەكان پارە لە دوكاندارەكان وەردەگرن، كۆمپانیای تر هەن بە ناوی پاراستنی سەر و ماڵی هاووڵاتییانەوە پارە و سەرانە لە خەڵك وەردەگرن.

هەروەها دەڵێ ئەو كۆمپانیایانە پسوولەی وەهمییان هەیە و دەركەوتووە سەر بە میلیشیاكانی حەشدی شەعبیین.

بەرپرسی ڕێكخراوە مەدەنییەكە ڕەخنە لە دۆخی كەركووك دەگرێ و دەڵێ شارەكە لەم حاڵەدایە و تووشی گێژاوی بێخاوەنی بووە.

لە كۆتاییشدا نمونەی بە كۆمپانیایەكی وەهمی بە ناوی (شركە فرسان الخمائل) هێناوەتەوە، كە مانگانە بڕی 25 هەزار دینار لە دوكاندارەكانی بازاڕەكانی كەركووك وەردەگرێت بە ناوی پاسەوانی شەوانەوە.