رازێكی كەركووكیانە بۆ هەموان
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

رازێكی كەركووكیانە بۆ هەموان

هەر كوردێك (بەمەرجێك خۆفرۆش و جاش نەبێ!) دیمەنی فالح فەیاز سەركردەی حەشدی شەعبی لە كەركووك بینیبێ قەڵس بووە، وێڕای ئەو ئاڵایانەی لەو شارە كوردستانیەدا و لەو هۆڵە كوردیەدا! هەڵكرابوون، گوتەکانی فەییاز ئاماژەگەلێكی سیاسی و چەندان پەیامی نەک ھەر بۆ كورد، بەڵکوو بۆ ئەمریکاش تێدابوو.

ئەو كەركووكەی سەركردە دیارەكانی بەعس لە ترسی ڕۆڵە گەرمییانیەکان لە دەمی ئەنفالیشدا بوێریی ئەوەیان نەكردووە قسەی وەها تێدا بكەن، تەنانەت ئەگەر سەردانێكی ئەو شارەیان كردبێ ئەوا بە بێدەنگی هاتوون و بە بێدەنگی لێی دەرچوون، كەچی ئێستا بە ناوی عێراقی نوێ و دەستووری نوێ و پێكەوەژیانەوە، جارێكی تر بە رۆژی رووناك ئەو شارە وا تەعریب دەكرێت، ھەندێک لە سیاسییەکانی كوردیش وەك بڵێی مێش میوانیان نیە لەو مەراسیمەدا دانیشتوون!

بێگومان بە هاتنی فالح فەیازەكان كەركووك نابێتە شارێكی عەرەبی، تەعریبی سوننەكان و شاڵاوی ئەنفال نەیتوانی ناسنامەی كوردستانیبوونی كەركووك بسڕێتەوە، بۆیە فالح فەیازەكانیش ناتوانن، بەڵام وەك كەركووكیەك دەركەوتنەكەی نیگەران و پەستی كردم.

دەمەوێ كەركووكیانە بێمە گۆ و پێتان بڵێم و بیرتان بخەمەوە، دوای رووخانی بەعس تا رووداوەكانی خیانەتی 16ی ئۆكتۆبەر، كام سەركردەی سیاسی و عەسكەری حكومڕانی عەرەبی شیعەتان بەو بوێرییە دیوە لە كەركووكدا وەها قسە بكات؟

وەك روونە هاتنی داعش دەرفەتێكی باش بوو بۆ گرتنە دەستی جڵەوی دەسەڵاتی رەها لەلایەن عەرەبی شیعەوە، بۆ كۆنتڕۆڵكردن و رەگ داكوتانی حوكمڕانییان لە عێراق، ئەوان لە پەنای حەشدی شەعبی چی نەما بە شارە سوننەنشینەكانی نەكەن، دەستی بە شیعەكردن بە رۆژی رووناك گەیشتە شارێكی وەك تكریت، ئەوەتا لە مووسڵ و ئەنبار و ناوچەكانی تریش ئەو گۆڕانكارییە دیمۆگرافییە دەبینین، بەڵام بوێریی ئەوەیان نەبوو بێن بۆ كەركووك، چونكە جۆرێك لە تەبایی و یەكڕیزیی لایەنە كوردستانییەكان بەربەستێكی پۆڵاین بوو، شكۆی پێشمەرگەمان بەس بوو.

بەڵام لە دوای رووداوەكانی 16ی ئۆكتۆبەرەوە، لە كەركووكدا حوكمڕانانی عەرەبی شیعە تەراتێن دەكەن، بە مەبەست و بێ مەبەست كاروانی ترومبێلە عەسكەریەكانیان دەهێننە كەركووك، ئامادە نین ژووری ئۆپەراسیۆنی هاوبەش لەنێوان وەزارەتی پێشمەرگە و وەزارەتی بەرگریی عێراق سەر بگرێت و پێشمەرگە بگەڕێتەوە ناوچەكانی مادەی 140 بۆ پاراستنی شكۆی كوردانی داقووق و پەلكانە و هەموو كەرکووک.

جا یێژم گوێتان هەڵخەن تێكڕا بهەژێن، ترپەی دڵتان با هاودەم بێت لەگەڵ جوڵەی خوێنی گڕكانی من، ئەم مێژووە بگێڕنەوە بۆ گشت كەسێك، كیژانی پەشموردەی شار، كوڕان و جوامێرانی گەرمیان، منداڵانی بێنازی ئاوارەی نێو خێوەتگەكان، خۆ بینیتان كۆمەڵێك بێگانە، یەكجار بێگانە بە شار چ مەراسیمێكیان گێڕا؟

یێژم بیگێڕنەوە بۆ نەوەی دواڕۆژ پێیان بڵێن، ئەو دیمەنانە پێشتر بە بەرگێكی تر و سیاسەتێكی تر بینیومانن، زمان و كرداریان وەك یەك وایە، بڵێن جاران عەرەبە بەعسیە سوننەكان و ئێستاش عەرەبە شیعەكان بە یەك زمان، بە یەك ئامانج زەویوزاری كوردان داگیر دەكەن.

وەك كوردێك و كەركووكییەك هیچ كات نەمدەویست ئەو دیمەنانە ببینم، ئەوان نامۆن بە كەركووك و هاتنەكەشیان بووەتە بارێكی گران و سەخت بەسەر دڵ و دەروونی ھەر کوردێک کە موقەدەساتی نیشتمانی لاپیرۆز بێ، تەنانەت بوونەتە بارێكی گران بەسەر وشەكانمەوە، بەسەر بیركردنەوەم، ئەوان بوونەتە بارێكی گران بەسەر زەردەپەڕی ئێواران و مانگەشەوی كەركووك لەو دەمەی عەلی مەردان مەقام و ئەڵلا وەیسی دەچڕێ.

كاروانی ئۆتۆمبێلەكانی ئەوان چەندە لە زیل و ئیڤای سەربازەكانی جارانی بەعس دەچوون، لوولەی تفەنگەكانیان وەك زاریان تووڕە و توندڕۆن بەرامبەر بە كەركووك، گریان و سۆزیان بۆ كەركووكییەكان وەك گریانی جادووگەر پڕ لە تەلیسم و نیفاقە.

ئای بۆ ئەو دەمانەی بە مەقامەكانی عەلی مەردان و حسێن عەلی و شكور خەیات و گۆرانیەكانی سابیر كوردستانی ئاسوودە دەبووم، وشەكان وەك مرواری لە گەروویی مندا وەك كانیاوێ لە دامێنی باباگوڕگوڕ هەڵدەقوڵان، بەسەر شاردا دەبوونە بارانی جوانی و پاكی و ئازادی، لە پرچی كیژانی شاردا دەبوونە قردێلە و دەبریسكانەوە.

ئای بۆ ئاڵاكەی دەستی پێشمەرگە كە بەشكۆوە لە سێبەریدا وێنەی سێلفییم دەچركاند.. ئای و ئای و ئای.. ئەو رۆژانە بۆ نەوەی نوێ بگێڕنەوە كە ئەوەتا كەركووكەكەم چ دێوەزمەیەكی تر خۆی لە باڵایدا ئاڵاندووە، خەریكە جلی كوردی كە ناسنامەی كوردانە لەو شارەدا دەترسێندرێن.

بیگێڕنەوە چۆن حەشدی شەعبی، وردە وردە خۆی دەكاتە واریسی خاك و ئاوی كوردان، لق و پۆپی دەڤەرەكەی باوانم بە دەردی پەلكانە دەبەن.. بیگێڕنەوە كە هەموان لە دوورەوە تەماشای كەركووك دەكەن، جگە لە هەناسەیەكی سارد هیچیان پێ ناكرێت.
تا ئەو دەمەی نەبین بە یەک، تا ئەو دەمەی جاشی ئەم و ئەو کۆتایی نەیەت، هیچمان بۆ كەركووك پێ ناكرێت، وەرن بۆ خاتری كەركووك، پەیكەری شەرەفی كوردان دۆوست بكەن و ریزەكان یەك بخەن با هەمووتان ئەوە بن كە خۆتان دەتانەوێ، بەڵام گرنگ ئەوەیە كەركووك لە دەستی تەعریبێكی تری شۆڤێنیەکان رزگار بكەن.