ساڵی ڕابردوو کەرتی گەشتیاری لە جیهان یەك ترلیۆن دۆلار زیانی بەر کەوتووە
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

ساڵی ڕابردوو کەرتی گەشتیاری لە جیهان یەك ترلیۆن دۆلار زیانی بەر کەوتووە

 "ئەمریکا بە ١٨٥ ملیار دۆلار زیان لە پەلەی یەکەمدایە"

بەهۆی سەرهەڵدانی ڤایرۆسی كۆرۆنا، لە٢٠٢٠ گەشتیارەكان لەسەر ئاستی هەموو جیهان لە ماڵەكانیان مانەوە و خۆیان لە گەشتكردن بێبەش كرد. ئەو زیانەی بەر كەرتی گەشتیاری كەوتووە لەسەر ئاستی هەموو جیهان، بە یەك ترلیۆن دۆلار دەخەمڵێنرێت.

رەجەب یاڤووز، سەرۆكی گروپی گەشتیاری ئەنتالیا بە ماڵپەڕی (T24)ی توركیای ڕاگەیاندووە بە پشتبەستن بە ئاماری ڕێكخراوی گەشتیاریی جیهانی، لە ساڵی ٢٠٢٠دا یەك ترلیۆن دۆلار زیانی ئابووری بەر كەرتی گەشتیاری كەوتووە.

رەجەب یاڤووز ڕاشی گەیاندووە: "زۆرترین زیانی گەشتیاری بەر ئەمریكا كەوتووە، كە ١٨٥ ملیار دۆلارە و ئیسپانیاش بە پلەی دووەم دێت بە ٥٦ ملیار و ٧٠٠ ملیۆن دۆلار و فەڕەنساش بە پلەی سێیەم دێت بە زیانی ٥٩ ملیار و ٤٠٠ ملیۆن دۆلار".

هەر بە گوێرەی زانیارییەكان، لە ٢٠٢٠دا یەك ملیار گەشتیار لە ماڵەكانیان مانەوە و خۆیان لە گەشتكردن بە دوور گرت، ئەمەش زیانی گەورەی بۆ كەرتی گەشتیاری جیهانی هەبووە.

توركیا یەكێكە لەو وڵاتانەی ساڵانە ٤٠ بۆ ٥٠ ملیۆن گەشتیار لە وڵاتانی ترەوە رووی تێ دەكەن، بەڵام لە ٢٠٢٠ ئەو رێژەیە زۆر كەم بووەوە.

وەزارەتی گەشتوگوزاری توركیا بڵاوی كردووەتەوە، لە ٢٠٢٠دا ٥ ملیۆن و ٤٤٠ هەزار گەشتیار رووی لە توركیا كردووە. ئەمەش لە كاتێكدایە لە ٢٠١٩دا ٥٠ ملیۆن گەشتیار رووی لە توركیا كرد و داهاتی كەرتی گەشتیاری ئەو وڵاتە ٣٥ ملیار دۆلار بووە.

توركیا پلانی هەیە لە ٢٠٢١دا قەرەبووی ئەو زیانە بكاتەوە كە لە ٢٠٢٠ بەر كەرتی گەشتیاری كەوتووە، ئەویش پێشوازیكردنە لە ٣١ ملیۆن گەشتیار، هەروەها بە دەستهێنانی ٢٣ ملیار دۆلاری ئەمریكییە.