هێرشێكی تر كرایە سەر دوكانی مەیفرۆشی لە بەغدا
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

هێرشێكی تر كرایە سەر دوكانی مەیفرۆشی لە بەغدا

ئێوارەی ئەمڕۆ سێشەممە لە ڕێگەی نارنجۆكێكی دەنگییەوە هێرش كرایە سەر دوكانێكی مەیفرۆشی لە بەغدای پایتەختی فیدراڵی، ئەمەش سێیەم هێرشە لە ماوەی ٢٤ كاتژمێری رابردوودا بكرێتە سەر دوكانی مەیفرۆشی لە بەغدا.

سەرچاوە ئاسایشییەكانی بەغدا ئاشكرایان كرد ئەم ئێوارەیەش كەسانی نەناسراو بۆمبی دەنگییان هەڵداوەتە ناو دوكانێكی مەیفرۆشییەوە لە ناوچەی ئەلكەسرەی باكووری بەغدا.

بە پێی سەرچاوەكە، هێرشەكەی ئەم ئێوارەیە هیچ زیانێكی مرۆیی لێ نەكەوتووەتەوە، تەنها زیانی دارایی بە بەردەم دوكانەكە گەیاندووە، ئەمەش دوای ئەوە دێت كە لە ئەنجامی هێرشێكی هاوشێوەدا، بەیانیی ئەمڕۆ كەسێك لەناو دوكانێكی مەیفرۆشیدا لە گەڕەكی ئەلنیزاڵی ناوچەی سەعدونی بەغدا كوژرا و كەسێكی تریش بریندار بوو، هەروەها دوێنێ ئێوارە هێرشێك كرایە سەر دوكانێكی مەیفرۆشی لە ناوەڕاستی بەغدا، بەم هۆیەوە كەسێك بە سووكی بریندار بوو.

چەند مانگێكە میلیشیاكانی حەشدی شەعبی دەستیان بە ئەنجامدانی هێرش كردووە بۆ سەر دوكانەكانی مەیفرۆشی و ناوەندەكانی مەساج لە بەغدا، تا ئێستاش پۆلیس و ئاسایشی وڵاتەكە دەستەوەستانن لەمبارەیەوە.