هەدەپە كەی مەودایەك لە نێوان و خۆی و پەكەكە دادەنێت؟
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

هەدەپە كەی مەودایەك لە نێوان و خۆی و پەكەكە دادەنێت؟

ئێستا گەورەترین پارت لە باكووری كوردستان لەڕووی ژمارەی دەنگدەرانەوە، هەدەپەیە، بەشێكی زۆری بەرپرسانی ئەو پارتە لەڕووی ئایدۆلۆژییەوە سەر بە هەمان ئایدۆلۆژیای پەكەكەن یان لێوە نزیكن، ئەمە راستییەكە و نكووڵیی لێ ناكرێت. بەڵام كاتێك دەپرسین: ”كەی هەدەپە مەودایەك لەنێوان خۆی و پەكەكەدا دروست دەكات یان دادەنێت؟“ مەبەستمانە هەدەپە لە كۆتوبەند و زیندان و فشاری حكوومەتی توركیا رزگار ببێت.

بۆچوونێكی واقیعبینانە نیە گەر پێمان وا بێت پێویست دەكات هەدەپە بەتەواوی لە پەكەكە دوور بكەوێتەوە، یاخود پێمان وا بێت نابێ هیچ ئەندامێكی سەركردایەتیی هەدەپە سەر بە ئایدۆلۆژیای پەكەكە بێت یاخود پەكەكەیی بێت، بەڵام بێئەزموونی و نەزانینیشە لە سیاسەتدا، كە پێمان وابێت پێویست دەكات هەموو ئەوانەی لە جومگە سەرەكییەكانی هەدەپەن سەر بە پەكەكە بن، چونكە ئەمە دەستی حكوومەت واڵا دەكەن بۆ قەیووم و زیندانیكردنیان، لانی كەم دەبێ هەمیشە ئەوەمان لەبەرچاو بێت، پەكەكە لە توركیا و زۆر لە وڵاتە زلهێزەكانیش لە لیستی تیرۆردایە و گەلێ جار رەفتار و سیاسەت و هەڵوێستەكانی، بۆ كورد و ئایندەی كوردستانیش نەرێنیە.

یەكێك لەو رەخنانەی بەردەوام لە هەدەپە گیراوە و دەگیرێت ئەوەیە، كاتێك كەسانێك كاندید دەكات بۆ ئەندام پەرلەمان، یان سەرۆك شارەوانی، بەشێكی زۆری ئەو كاندیدانە پێشتر پەكەكە بوونە، یان لە قەندیل بوونە و گەڕاونەتەوە بۆ باكوور، یاخود ئایدۆلۆژیایەكی تەواو پەكەكەییان هەیە و لەبن فەرمانی قەندیلدان، ئەمەش هەڵەیەكی لەمێژینەیە و پێویست دەكات راست بكرێتەوە.

تۆ وەكوو هەدەپە كاتێك ئەندام پەرلەمانێكی سەر بە پەكەكە دەخەیتە ناو پەرلەمانی توركیایەوە، بەو واتایە دێت، دەیخەیتە بەر رەحمی یاسایەك كە هەموو كات دەتوانێ قەیوومی بكات، یان پارێزبەندیی لێ بستێنێتەوە و زیندانی بكات، كەواتە هیچت نەكرد.

بینیمان دەیان سەرۆك شارەوانیی سەر بە هەدەپە لە باكووری كوردستان قەیووم كران، چەندین ئەندام پەرلەمانیان دەستگیر كران، هۆكارەكەشی روونە، ئەو كەسانە بەشێكی زۆریان تۆمەتی (پەكەكەبوون)یان دراوەتە پاڵ.

 

با نموونەی لەیلا گوڤەن ئەندام پەرلەمانی هەدەپە بهێنینەوە، ئەو ئافرەتە بۆ ماوەی ١٩٩ رۆژ لە زیندان مانی لە خواردن گرت، هۆكارەكەشی گۆشەگیركردنی عەبدوڵا ئۆجەلان سەرۆكی زیندانیكراوی پەكەكە بوو. گوتی تا گۆشەگیربوونی لەسەر هەڵنەگیرێت مانگرتن ناشكێنم، بینیمان ٤٠ كیلۆ لە كێشی هاتبووە خوارەوە و تەنجدوستییشی زۆر خراپ بوو.

باشە تۆ لەبەر ئۆجەلان مان لە خواردن بگریت، ئیدی هیچ پاساوێك دەمێنێتەوە بڵێیت من پەكەكە نیم و ئایدۆلۆژیای پەكەكەم نییە؟ ئەمە وا دەكات حكوومەتی توركیا دەستگیرت بكات و بڵێت پاڵپشتی لە تیرۆر دەكات.

ئێمەی كورد چۆن لە پەكەكە دەڕوانین ئەوە بۆ خۆمانە، بەڵام پەرلەمانی توركیا وەكوو پارتێكی تیرۆریست ناساندوویەتی، تەنانەت یەكێتیی ئەورووپا و ئەمریكاش پەكەكەیان وەكوو تیرۆریست ناساندووە، ئیتر بۆچی تۆ پاس دەدەیتە توركیا تا گۆڵت لێ بكات؟

 

هەدەپە چی بكات؟

ئەوەی لەسەر هەدەپە پێویستە و گرنگە هەنگاوی بۆ بنێت، لە هەڵبژاردنی داهاتوو هەموو ئەو كەسانەی كە كاندیدی دەكات بۆ سەرۆكی شارەوانی و ئەندام پەرلەمانی توركیا، هیچ ئایدۆلۆژیایەكی پەكەكەیان نەبێت، یاخود پێشتر هیچ پەیوەندییەكیان بە پەكەكەوە نەبووبێت، تا بتوانن لەناو پەرلەمان وەكوو هێزێكی گەورە بمێننەوە و شارەوانیەكانی باكووریش لەبری قەیووم هەر لە دەستی خۆیاندا بمێنێتەوە.

راستە بەشێك لە سەرۆك شارەوانیەكانی باكوور پەیوەندییان بە پەكەكەوە نییە و قەیووم كراون، بەڵام كەمن و ئەوانیش بە ئاگری ئەوانی تر سووتاون.

دەكرێت لە سەركردایەتیی هەدەپە، بەشێكی زۆری پەكەكە بێت و ئایدۆلۆژیای ئەوانی هەبێت، بەڵام با ئەو كەسانە نەچنە پەرلەمان و نەبنە سەرۆك شارەوانی، ئاخر بینیمان چۆن حكوومەت دووری خستنەوە و خستیانیە زیندانەوە.

 

ئایە هیچ دادگایەكی توركیا دەتوانێت (مەدحەت سینجار) هاوسەرۆكی هەدەپە بخاتە زیندانەوە و بڵێت سەر بە پەكەكەیە؟ نەخێر، چونكە سینجار پەكەكە نەبووە، بەڵام رەنگە بە شێوەیەكی زیرەكانە پەیوەندیی لەگەڵیاندا هەبێت بۆ بەهێزكردنی هەدەپە.

زۆرن ئەو كەسانەی پەكەكە نەبوون و تەنیا لەبەر كوردبوونیان زیندانی و سووكایەتیان پێ كراوە، ئەمە بابەتێكە دەیان نووسین و لێكۆڵینەوەی لەسەر كراوە، بەڵام ئەوەی باسی ئێمەیە هەدەپەیە، گرنگە هەدەپەییەكان نەخرێنە زیندانەوە، چونكە بوونی هەدەپە وەكوو هێزێكی گەورە لە پەرلەمانی توركیا و باكووری كوردستان بۆ كورد گرنگە و بۆ هەنگاونان بەرەو بەدیهێنانی مافی كورد زەروورەتێكی هەنووكەییە، بەكورتی: گرنگە هەدەپە ئیدی كار بۆ مافەكانی كورد بكات لە توركیا، نەك كار بۆ پەكەكە بكات.

دەكرێت لەو ڕووەوە قسە لەگەڵ پەكەكەش بكرێت، كە پاڵپشت بێت بۆ ئەوەی كاندیدی خۆی بەسەر هەدەپە فەرز نەكات لە هەڵبژاردنەكاندا، چونكە بینیمان لە هەڵبژاردنەكانی پێشووتردا، پەكەكە بە ئاشكرا كاندیدی خۆی بەسەر هەدەپەدا فەرز كرد، ئەنجام توركیا دەرگای زیندانی بۆ كردنەوە.