دارایی عێراق بەیاننامەیەک لەبارەی کاریگەرییەکانی دابەزاندنی بەهای دینار دەردەکات
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

دارایی عێراق بەیاننامەیەک لەبارەی کاریگەرییەکانی دابەزاندنی بەهای دینار دەردەکات

وەزارەتی دارایی حکوومەتی عێراق بەیاننامەیەک لەبارەی زیادکردنی کاریگەرییە ئەرێنییەکانی دابەزاندنی بەهای دینار، ساز دەکات.

ئەمڕۆ هەینی 8-1-2021، وەزارەتی دارایی عێراق بەیاننامەیەکی دەرکردووە و تێیدا رایگەیاندووە، هەندێک رێکار هەن بۆ زیادکردنی کاریگەرییە ئەرێنییەکانی دابەزاندنی بەهای دینار دەگیرێنە بەر، کە بەهۆی هەستیاریی بابەتەکان ناتوانرێ ئاشکرا بکرێن.

وەزارەتی دارایی عێراق هەروەها رایگەیاندووە، هەفتەی داهاتوو وەزارەتی دارایی کۆبوونەوەیەکی فراوان لەگەڵ ئابووریناسان رێک دەخات و سیاسەتی خۆی بۆ زیادکردنی کاریگەرییە ئەرێنییەکانی دابەزاندنی بەهای دینار، دادەڕێژێت.

هەروەک لە بەیاننامەکەدا هاتووە، وەزارەتی دارایی هیواخوازە کۆبوونەوە فراوانەکە هاوکات بێ لەگەڵ گفتوگۆکانی پەرلەمانی عێراق بۆ پەسەندکردنی پرۆژەیاسای بودجەی گشتیی عێراق بۆ ساڵی 2021.

ئامانجی کۆبوونەوە فراوانەکەی وەزارەتی دارایی، وەک لە بەیاننامەکەدا هاتووە ؛پاراستنی هەژار و دەستکورتەکانی عێراقە.

رۆژی یەکشەممە 20-12-2020، بانکی ناوەندیی عێراق بۆ تێپەڕاندنی قەیرانی دارایی، بڕیاری دابەزاندنی بەهای دیناری وڵاتەکەی دا و بەهای 100 دۆلاری ئەمریکی لە 122 هەزارەوە گەیاندە 147 هەزار دینار.