قایمقامی قەزای ئامێدی ئاشکرای کردووە، ساڵی ڕابردوو بەهۆی بوونی بنکە و بارەگاکانی پەکەکە لە سنوورەکە و بۆردومانی فڕۆکە جەنگییەکانی تورکیاوە، زیانە مادییەکانی خەڵک لە سنوورەکە حەوت ملیار دینار خەمڵێندراوە.
لەمبارەوە ئیسماعیل مستەفا، قایمقامی ئامێدی بە (باسنیوز)ی ڕاگەیاند: "بەهۆی بووونی بارەگاکانی پەکەکە لە سنوورەکەمان بەردەوام فڕۆکە جەنگییەکانی تورکیا سنوری قەزای ئامێدی بۆردومان دەکەن و هەر بەم هۆیەوە ٢٠٠ گوندی ناوچەکە چەندین ساڵە چۆڵ کراون".
ئاماژەی بەوەش دا: "قەزای ئامێدی خاوەنی خاکێکی بەپیت و ژینگەیەکی لەبارە، بەڵام خەڵک بەهۆی بوونی پەکەکە و مەترسیی سەر گیانیان وەک پێویست کەڵکیان لێ وەرنەگرتووە".
قایمقامی ئامێدی ئاماژەی بەوەش کرد: "ساڵانە هەم لەڕووی گیانی و هەم مادییەوە زیانێکی زۆر بە دانیشتوانی ناوچەکە و سروشتەکە دەگات و بەهۆی شەڕی پەکەکەوە تا ئێستا لە سنووری ئامێدی ٣٣ هاووڵاتی شەهید بوون و بەپێی ئامارێک کە ئێمە کۆمان کردووەتەوە ساڵی ٢٠٢٠ بڕی حەوت ملیار دینار زیان بە سروشت و خەڵکی ناوچەگە گەیشتووە".
گوتیشی: "لەو بۆردومان و شەڕانەدا ڕەز و باخ زەوینی کشتوکاڵیی خەڵکی گوندەکان لەناو چوون، بۆیە داوا دەکەین پەکەکە لەو ناوچانە بکشێتەوە و بەرەو سنووری ڕاستەقینەی خۆی بچێت و خەباتی خۆیان لەوێ بکەن".