کۆمەڵەى چێشتخانە و میوانخانەکانى هەولێر: هاتنى گەشتیاران بۆ هەولێر ئاسایی بووەتەوە
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

کۆمەڵەى چێشتخانە و میوانخانەکانى هەولێر: هاتنى گەشتیاران بۆ هەولێر ئاسایی بووەتەوە

"کێشەى کۆمپانیاکانى گواستنەوەى گەشتیارانی پارێزگاکانى عێراق بۆ هەرێمی کوردستان چارەسەرکراوە"

لقى هەولێرى کۆمەڵەى چێشتخانە و میوانخانەکانى هەرێمی کوردستان رایگەیاند کێشەى ئەو پاسانەیان چارەسەر کردووە کە گەشتیارانى عەرەب لە پارێزگاکانى عێراق بۆ هەرێمی کوردستان دەگوازنەوە،ئێستا هاتنى گەشتیاران بۆ هەولێر ئاسایی بووەتەوە.

زیرەک بیکۆ، سەرۆکى لقى هەولێرى کۆمەڵەى چێشتخانە و میوانخانەکانى هەرێمی کوردستان بە (باسنیوز)ى راگەیاند: "دواى هێرشکردنە سەر چەند پاسێکى گەشتیارانى عەرەب لە لایەن ژمارەیەک گەنج لە هەولێرى پایتەخت،کاردانەوەى زۆرى لێکەوتەوە و حکوومەتى هەرێمیش رێککارى یاسایی بەرامبەر بکەرانى تاوانەکە گرتەبەر، بۆ ئاسییکردنەوەى بارودۆخەکە و دڵنیاییدان بە گەشتیاران، دەستەى گەشوگوزار و کۆمەڵەى چێشتخانە و میوانخانەکانى هەولێر بەردەوام لەسەرهێڵ بوون لەگەڵ لایەنى پەیوەندیدار".

راشیگەیاند: "ئەو کۆمپانیایەى گەشتیارەکانى لە پارێزگاکانى عێراقەوە هێنابووە هەولێر، زیانەکانى لەلایەن پارێزگاى هەولێرەوە قەرەبووکرایەوە و بارودۆخەکەشیان بۆ شیکرایەوە، پاشان لە لایەن دەستەى گەشتوگوزارى هەولێرەوە روونکردنەوەى پێویست بە دەستەى گەشتوگوزارى بەغدا درا و دڵنیایی درا کە رووداوەکە دووبارە نابێتەوە و هەولێر شارێکى ئارامە بۆ گەشتیاران".

ئاماژەى بە ئەوەش کرد" دواى هەوڵەکانى دەستەى گەشتوگوزار و لایەنى پەیوەندار بۆ ئاساییکردنەوەى دۆخەکە، ئێستا هاتنى گەشتیاران بۆ هەولێر ئاسایی بووەتەوە، ئێمە لە هەوڵەکانمان بەردەوامین بۆ ئەنجامدانى هەر ئاسانکارییەک و دڵنیاییدان بەو گەشتیارانەى سەردانى هەرێمى کوردستان دەکەن".