خیانەت لە مێژووى كورددا
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x
كه‌یوان ئازاد 30/12/2020

خیانەت لە مێژووى كورددا

52

كۆتایی خیانەت لای كورد

تا ئێستاش دیاری نییە، كۆتایی ژیان لەسەر ئەم هەسارەیە كەی دەبێت؟ كاتێكیش كۆتایی ژیانی مرۆڤ لەسەر زەوی دیار نەبێت، ناتوانین كۆتایی خیانەت لە مێژوودا دیاری بكەین، چونكە تا مرۆڤ لەسەر زەوی بژی، خیانەت بەردەوام دەبێت. هۆكارەكەش ئەوەیە، كە سەردەمانێكی دوورودرێژە، خیانەت تێكەڵ بە ژیان و كولتووری چەندین مرۆڤ و كۆمەڵگا بووە.

لێرەوەش، بەو پێیەی (كورد) بەشێك بووە لە كۆمەڵگای مرۆڤایەتی و لە سەردەمانێكی زۆر كۆنەوە لەسەر ئەم زەوییە نیشتەجێ بووە، چارەنووسی وەك مێژووەكەی ئاسایی بە مرۆڤەكانی تری سەر زەوی و كۆمەڵگاكانی جیهان بەستراوەتەوە.

هەر بۆیە (كورد) وەك نەتەوە و پێكهاتەیەك، تا كۆتایی ژیان لەسەر ئەم زەوییە دەمێنێت و بڕ دەكات. ئەوانەیشی وای بۆ دەچن، كە ئەستەمە (كورد) تا ئەو كاتە بمێنێت، ئەوا بەهەڵەدا چوون. هۆكارەكەیشی ئەوەیە، كە ئەگەر كورد بەرگەی هەزاران نەهامەتی و شەڕ و ململانێ و كۆمەڵكوژیى مێژووى گرتبێت و تا ئێستا مابێتەوە، چۆن بەرگەی لەوە زیاتر ناگرێت و چۆك دائەدات؟

هەر بۆیە، تا ژیان لەسەر ئەم زەوییە بمێنێت، كوردیش دەمێنێت، بەڵام خاڵێك كە (كورد) لە بەشێكى تری نەتەوە و كۆمەڵگاكانی جیهان جیا دەكاتەوە ئەوەیە، كە بەهۆی پەرتەوازەیی و نەگەیشتنی بە قەوارەیەكی سیاسیی سەربەخۆ، زیاتر ڕووبەڕووی كێشە و خیانەت دەبێتەوە. ئەوەش بەهۆی ئەوەی، كە (كورد) زیاتر لە هەر نەتەوە و پێكهاتەیەكی تر، لەلایەن نەتەوە و گەلانی سەردەست و ئەو وڵاتانەی كوردیان بەسەردا دابەش كراوە، لە دژی خۆی بەكار دەهێنرێت، وەك چۆن پێشتر بەكار هێنراوە.

بۆیە، هەتا ئەو كاتەی بە قەوارەیەكی سیاسی دەگات و دەوڵەتێك بۆ خۆی بنیات دەنێت، (خیانەت) بوار نادات، هەوڵ و ماندبوونەكانی بیگەیەنێتە كەناری ئارام. كارەكەش لەلایەن ئەو كەس و لایەنانەوە بەكار دەهێنرێت، كە زووتر و باشتر دەكەونە ژێر كاریگەریی وڵاتانی سەردەست و داگیركارانی كوردستان. بەتایبەت ئەو كەس و لایەنانەی، ناگەنە هەندێك كەسایەتی و لایەنی سیاسیی بەرامبەريان، لەڕووی مێژوو و پێگە و هێزی سیاسی. بۆ گەیشتن بەوانیش، پەنا دەبەنە بەر خیانەت، تا لەو ڕێگایەوە، ئەگەر بە پێگە و هێزی لایەنی ركابەر نەگەن، بوار نەدەن ئەو بنەماڵە و هێزە سیاسییانە، نەتەوەی كورد بگەیەننە كەناری ئارام.

كەواتە ئەم ململانێیە لەنێوان ئەم (دوو) بەرەیەدا، لە هەر بەشێكی خاكی كوردستانی دابەشكراو بەردەوام دەبێت، تا ئەو كاتەی خودی كورد دەگاتە ئەو قەناعەتەى، كە كۆتایی كێشەكان بە یەكڕیزیی خودی كورد كۆتایی پێ دێت، بۆیە تا سەرجەم پێكهاتە و توێژەكانى نێو كۆمەڵگای كوردی نەگەنە ئەو قەناعەتەی، كە بێ یەكڕیزی و پەرتەوازەیى، دۆخی كورد هەر وا دەبێت، خیانەت بەردەوام دەبێت.

لێرەوە، بەپێی ئەزموون و پێوەرەكانی مێژوو، بۆ ئەوەی لە داهاتوودا ڕێگا لە هەر كارێكی خیانەتكاری بگیرێت، پێویستە بەر لە هەر شتێك، كار بۆ نزیككردنەوەی لایەنە ناكۆكەكانی كورد بكرێت، تا هەموو لایەنە ركابەرەكان لە بازنەی نەیارانی كورد بێنە درەوە. دواتر ئەو هەوڵەی لەنێو تاك و لایەنە سیاسییە كوردییەكاندا بۆ پیلان و سەركەوتن و سەرخستنی نەیارانی كورد دەخرێتە كار، بخرێتە خزمەتی خودی خۆیەوە. دیارە تا ئەوە ڕوو نەدات، ئەستەمە تۆوی خیانەتكاری لە كۆمەڵگای كوردیدا بنبڕ بكرێت. بێ ئەو كارەش، نە هیچ هەوڵێكی كورد سەرکەوتوو دەبێت و نە خەبات و قوربانییەكانیش دەگەنە وێستگەی ئارام.

لە كۆتایی ئەو پەیام و زانیارییانەی لەسەر مێژووى خیانەت و خیانەت لە مێژووی كورددا خرانە ڕوو، دەگەینە ئەوەی كە كورد وەك نەتەوەیەك لەسەر ڕووی زەوی، كەمترین سوودی لە ئەزموونەكانی مێژوو وەرگرتووە. هەر بۆیە تا ئێستاش خەبات و ماندووبوونەوەكانی بێ ئاكام ماون. دیارە ئەوەش جێگای داخ و حەسرەتێكی زۆرە، كە لەو ڕەوتە مێژووە دوور و درێژەیەدا، تاكی كورد وریا نەبووەتەوە، بۆیە بەردەوام خیانەت هەموو هەوڵ و ماندووبوونەكانی بەهەدەر داوە!

خۆ ئەگەر هەندێك بپرسن، كە تاوانى كورد چی بووە، كاتێك كەوتبێتە نێو كۆمەڵێ نەتەوە و دەوڵەتى داگیركاری نەیار بە خۆى؟ بەڵام ئەو پرسیارەش لە شوێنی خۆیدا نەبووە، چونكە هەر نەتەوە و دەوڵەتێك مافی خۆی بووە لە هەموو ئەوانە بدات، كە مەترسین بۆ ئاسایشی نەتەوەیی و سیاسیی وڵاتەكەیان، نەوەك تاوانی شكستەكانی بخاتە ئەستۆى هێزى ئەوان. هەر بۆیە مافی خۆی بووە هەموو هەوڵێك بۆ مانەوەی خۆی بخاتە كار، سا ئەوە لەسەر حیسابی هەر نەتەوە و كۆمەڵ و دەوڵەتێكی تر بووبێت، یان چەند پێكهاتە كەمینەیەكی ناوخۆيی.

ئەوەش سروشتی مرۆڤەكان بووە، كە هەمیشە ویستوویانە باشەكان بۆ خۆیان بێت و خراپەكان لە خۆیان دوور بخەنەوە، بۆیە ئەوەی بەهەڵە تێگەیشتووە، خودی كورد بووە، كە پێى وابووە، هێز و دڕندەیی ئەوان هۆكاری شكستی سەرجەم شۆڕش و ڕاپەڕین و هەوڵەكانی كورد بووە لە مێژوودا. هەر بۆیە هەڵەیەكی گەورە بووە، بۆچوون و دیدگای سیاسیی ئەوان، لەگەڵ خیانەتكارانی نێوخۆ بەراورد بكەین. واتە لە قۆناغی داهاتوودا بوار بدەین، یەكێك لە خۆمان، لەپێناو بەرژەوەندیی نەیارێكمان، پەنا بباتە بەر خیانەت و ئەزموونێكی داهاتوومان لەبار ببات.