دۆسیەی دەمیرتاش كێشەیەكی گەورە دەخاتە نێوان توركیا و ئەورووپاوە
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

دۆسیەی دەمیرتاش كێشەیەكی گەورە دەخاتە نێوان توركیا و ئەورووپاوە

"ئەردۆغان بڕیاری دادگای مافی مرۆڤی ئەورووپا ڕەت دەکاتەوە، بەڵام خۆی سێ جار هانای بۆ بردووە"

بۆ دووەمجار دادگای مافی مرۆڤی ئەورووپا بڕیاری دا سەلاحەدین دەمیرتاش هاوسەرۆكی پێشووی هەدەپە دەستبەجێ ئازاد بكرێت، بەڵام رەجەب تەیب ئەردۆغان رەتی كردەوە ئازادی بكات و ئاماژەی داوە ئێمە ئەو دادگایە ناناسین و دادگای خۆمانمان هەیە.

دەیان نووسەر و شارەزای یاسایی لە توركیا، رەخنەی توندیان لە ئەردۆغان گرتووە کە هەڵەیەكی گەورە دەكات ئەگەر پێشێلی بڕیاری دادگای مافی مرۆڤی ئەورووپا بكات، چونكە لە ئەنجامدا بە فەرمی نەناسینی ئەو دادگایە قووڵایی سیاسی هەیە.

سێدات ئێرگین نووسەری دیاری ماڵپەڕی (T24)، پێی وایە ئەگەر توركیا بڵێت دادگای مافی مرۆڤی ئەورووپا پەیوەندیی بە ئێمەوە نییە، ئەوكات یەكێتیی ئەورووپا بەرامبەر توركیا هەڵوێست دەگرێت، بۆیە با نەكەوینە ناو ئەو یارییەوە.

ئەردۆغان كاتێك دەڵێت توركیا دادگای مافی مرۆڤی ئەورووپا ناناسێت و بە پاڵپشتی لە تیرۆریست ناوی دەبات، خۆی ٣ جار هانای بۆ ئەو دادگایە بردووە و كێشەی ئەویان چارەسەر كردووە.

ئەردۆغان بەرلەوەی ببێتە سەرۆكوەزیران و ئاكەپە دابمەزرێنێت، لەلایەن دادگای توركیاوە چەند دۆسیەیەكی لەسەر ساغ ببووەوە، دیارترینیان قەدەغەكردنی سیاسەت بوو لێی.

بە گوێرەی زانایرییەکان ئەردۆغان سێ جار هانای بۆ دادگای مافی مرۆڤی ئەورووپا بردووە، یەكەم: بۆ هەڵگرتنی قەدەغەی سیاسەتكردن لەسەری و دۆسیەكەش لە بەرژەوەندیی ئەردۆغان یەكلایی بووەوە.

دووەم: داوای كردبوو رابردووی لە دادگا بسڕێتەوە، واتە دۆسیەكەی لە دادگا بسڕێتەوە و وەكوو كەسێك نەناسرێت پێشووتر تاوانی ئەنجام دابێت. لەوەشیاندا لە بەرژەوەندیی ئەو دادگای مافی مرۆڤی ئەورووپا بڕیاری دا.

سێیەم: لە ٢٠٠٢ داوای كرد رێگەی بدەن وەكوو ئەندام پەرلەمان خۆی هەڵبژێرێت، چونكە دادگای توركیا بڕیاری دابوو ئەردۆغان بۆی نییە خۆی بۆ ئەندام پەرلەمانی كاندید بكات.

كاتێك دادگای مافی مرۆڤی ئەورووپا رێگەی بۆ ئەردۆغان خۆش كرد بێتە ناو سیاسەت، ئیدی ئاكەپەی دامەزراند و ماوەی ١٨ ساڵ دەبێت پیاوی یەكەمی توركیایە.

فاتیح پۆرتوكال رۆژنامەنووسی بەناوبانگی توركیا، دەڵێت هەڵەیە پێت وابێت دادگای مافی مرۆڤی ئەورووپا پەیوەندی بە توركیاوە نییە، وەكوو هەنگوین پەیوەندیی پێوە هەیە، گەر وا نییە با توركیا لە ئەندامییەتی ئەو دادگایە بكشێتەوە.

بە گوێرەی شرۆڤەی بەشێكی زۆری سیاسییەكانی توركیا، ئەگەر توركیا رێز لە بڕیاری دادگای مافی مرۆڤی ئەورووپا نەگرێت بۆ ئازادكردنی دەمیرتاش، یەكێتیی ئەورووپا سزای سیاسی توركیا دەدات و توركیا هەنگاوێك لەو یەكێتییە دوور دەكەوێتەوە.

لە لایەكی تریشەوە ئەگەر زۆرە، ئەو دادگایە سزای ئابووری بەسەر توركیادا بسەپێنێت، چونكە ناكرێت ئەندام لەو دادگایە بیت و كەچی بڕیارەكانی بە هیچ بزانیت.

بەشێك لە نووسەران لە پێگەی خۆیان لە تویتەر، ئاماژەیان بەوە داوە كە یەكێك لە كارە هەرە سەرەكییەكانی دیكتاتۆر نەناسینی بڕیاری دادگایە، بۆیە كاتێك ئەردۆغان ئەو قسەیە دەكات لەسەر توركیا دەكەوێت، بۆیە ئێستاش دەتوانین توركیا وەكوو سەروەری یاسا بناسێنین و لەسەر داوای دادگای مافی مرۆڤی ئەورووپا دەمیرتاش ئازاد بكرێت.

بڕیاری دادگای مافی مرۆڤی ئەورووپا بۆ دووەمجار كە داوای كرد دەمیرتاش ئازاد بكرێت، دەری خست كە دەستگیركردنی دەمیرتاش لە توركیا بڕیارێكی سیاسییە، نەك یاسایی، ئەمەش لە داهاتوودا باجێكێ قورسی بۆ توركیا دەبێت.