بەڕێوەبەری تۆمارکردنی کۆمپانیاکانی هەولێر: ئەمساڵ لە هەولێر 787 كۆمپانیا تۆمار كراون
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

بەڕێوەبەری تۆمارکردنی کۆمپانیاکانی هەولێر: ئەمساڵ لە هەولێر 787 كۆمپانیا تۆمار كراون

   "بوونی کۆمپانیاکان کاریگەریی ڕاستەوخۆی لەسەر بووژانەوەی ئابووری هەیە"

پشتیوان وەرتی، بەڕێوەبەری بەڕێوەبەرایەتیی تۆمارکردنی کۆمپانیاکانی هەولێر، لە چاوپێکەوتنێکدا لەگەڵ (باسنیوز) چەند پرسێکی پەیوەست بە کۆمپانیاکانی خستە ڕوو و راشی گەیاند تۆمارکردنی کۆمپانیاکان کاریگەریی راستەوخۆی لە دروستکردنی چەندین هەلی کار هەیە و سەرچاوەیەکی داهاتیش دەبێت بۆ حکوومەت.

سەرەتا پشتیوان باسی لەوە کرد: "ئەمساڵ وێڕای هاتنی پەتای کۆرۆنا، بەڵام زۆر کۆمپانیا تۆمار کراون و لە ساڵی 2020دا تاکوو ئێستا ئەو كۆمپانیایانەی لە هەولێر تۆمار كراون، 787 كۆمپانیان، لە نێوانیاندا 28 كۆمپانیای بیانی هەیە".

جەختیشی كردەوە: "بە گشتی لە هەولێر 16هەزار و 793 كۆمپانیای خۆماڵی تاكوو  ئێستا تۆمار كراون، لە نێوانیاندا 2 هەزار 395 كۆمپانیایان بیانین، لەگەڵ 364 نووسینگەی ئەو كۆمپانیایانەی كە لە سلێمانی و دهۆك تۆمار كراون، بەڵام نووسینگە لە هەولێر دەكەنەوە".

بەڕێوەبەری بەڕێوەبەرایەتیی تۆماکرری کۆمپانیاکانی هەولێر ئاشكراشی كرد: "بەگشتی لە کۆی 30 هەزار کۆمپانیای تۆمارکراوی خۆماڵی و بیانی لە هەرێمی کوردستان، زیاتر لە 17 هەزار کۆمپانیا لە پارێزگای هەولێر تۆمار کراون".

پشتیوان وەرتی پێی وایە، تۆمارکردن و زیادکردنی کۆمپانیاکان رۆڵی بۆ پێشخستنی ئابووریی هەرێمی کوردستان هەیە و تۆمارکردنی کۆمپانیاکان کاریگەریی راستەوخۆی لەسەر بووژانەوەی ئابووریی وڵات هەیە، چونکە سەرەڕای ئەوەی کۆمپانیا هۆکارێکە بۆ بەفەرمیکردن و بە سیستەمکردنی کاری بازرگانی، دەبێتە هۆی گەشەسەندن و دروستکردنی چەندین هەلی کار و سەرچاوەیەکی داهاتیش دەبێت بۆ حکوومەتی هەرێمی کوردستان و لەڕێگەی دانی باج و رسوومات بە حکوومەت".

ئاماژەی بەوەش دا: "کابینەی نۆیەمی حکوومەتی هەرێمی کوردستان بۆ تۆمارکردنی کۆمپانیاکان زۆر گرنگی بە کەمکردنەوەی رۆتین داوە و یەکێک لە بەرنامەکانی کابینەی نۆیەم بریتییە لە بە ئەلیکترۆنیکردنی کاری فەرمانگەکانی حکوومەت و نەهێشتنی رۆتین، ئێستا وەزارەتی بازرگانی و پیشەسازی سەرقاڵی دروستکردنی سیستەمێکی ئەلیکترۆنییە بۆ تۆمارکردنی کۆمپانیاکان و بە ئەلیکترۆنیکردنی مامەڵەی کۆمپانیاکان لە بەڕێوەبەرایەتیی تۆماری کۆمپانیاکان لە پارێزگاکان".

ئەوەشی خستە ڕوو: "ئێستا بەهۆی گونجاونەبوونی شوێنی بەڕێوەبەرایەتیی تۆماری کۆمپانیاکانی هەولێر و کەمیی ژمارەی فەرمانبەر و زۆریی کاری رۆژانە، ناتوانین هەموو خزمەتگوزارییەک لە ئاسانکاری و خێرایی راییکردنی مامەڵەی رۆژانەی کۆمپانیاکان پێشکەش بکەین و بەڕێوەبەرایەتییەکەمان پێویستی بە فراوانکردن هەیە لەڕووی دابینکردنی باڵاخانەیەکی گەورە و زیادکردنی ژمارەی فەرمانبەرانمان، بۆ ئەوەی هەموو مامەڵەیەک بە کەمترین ماوە رایی بکەین، لەسەرووی ئەمانەشەوە، زۆرمان پێویست بە بەئەلیکترۆنیکردنی کارەکانی فەرمانگەکەمان هەیە، ئێستا کۆمپانیا خۆماڵییەکان و لقی کۆمپانیا بیانییەکان لەڕێگەی وێبسایتی (crkrg.org) بە سیستەمی ئەلیکرۆنی تۆمار دەکرێن، لە وێبسایتەکەدا تەواوی زانیاری و رێکارەکانی تۆمارکردنی کۆمپانیاکان بە هەر سێ زمانی کوردی و عەربی و ئینگلیزی بەردەستە، هەرچەندە وەزارەتی بازرگانی سەرقاڵی سیستەمێکی تۆکمەتر و فراوانترە بۆ شوێنگرتنەوەی ئەو سیستەمە، بەڵام تاکوو ئێستا گشت کۆمپانیاکان لەڕێگەی ئەم سیستەمەوە تۆمار دەکرێن".

پشتوان وەرتی راشی گەیاند: "زۆرینەی ئەو کۆمپانیایانەی ئێستا تۆمار دەکرێن، لە بواری بازرگانیی گشتی و کاروباری نشینگەی بیانین و زۆرینەی کۆمپانیا بیانییەکانیش لقی کۆمپانیا تورکییەکانن".

بەڕێوەبەری تۆماری کۆمپانیاکانی هەولێر لەبارەی  ئەوەی کە ئاخۆ کۆمپانیای وەهمی هەیە، گوتی: "ناتوانین بڵێین کۆمپانیای وەهمی هەیە یان نییە، بەڵام بەهۆی نەبوونی چاودێری و پشکنینەوە، بەشێکی زۆری کۆمپانیاکان بارەگای فەرمییان نییە، لە کاتێکدا بەپێی یاسای کۆمپانیاکان، پێویستە هەر کۆمپانیایەک بارەگایەکی فەرمیی هەبێت، کە تابلۆیەکی هەڵواسراوی هەبێت بە ناوی کۆمپانیاکە، رەنگە لێرە و لەوێ کەسانێک هەبن بەبێ ئەوەی بە کۆمپانیا تۆمار کرابن، لەژێر ناوی کۆمپانیا کار بکەن و خۆیان بناسێنن، بەڵام هەر حاڵەتێکی ئاوا لە هەر شوێنێک هەست پێ بکەین، داوایان لەسەر تۆمار دەکەین و رووبەڕووی یاسایان دەکەینەوە".

باسی لە باجدانی کۆمپانیاکان کرد و جەختی کردەوە: "بەپێی رێنوێنیی ئەنجوومەنی وەزیرانی هەرێمی کوردستان، بە بێ پێشکەشکردنی پاکانەی باج، مامەڵەی هیچ کۆمپانیایەک رایی ناکرێت و هەر کۆمپانیایەک پێویستە ساڵانە پاکانەی باج پێشکەش بکات".