گوتەبێژی تەندروستیی ڕاپەڕین ڕای گەیاند لە ماوەی دوو ڕۆژی ڕابردوودا لە سنووری ئیدارەی ڕاپەڕین، ھیچ حاڵەتێکی مردن بە پەتای کۆرۆنا تۆمار نەکراوە.
تەھا محەمەد، گوتەبێژی تەندروستیی ڕاپەڕین بە (باسنیوز)ی ڕاگەیاند: "بەپێی ئاماری ھەردوو سەنتەری نەخۆشییە گوازراوەکانی ڕانیە و قەڵادزێ، لە ماوەی دوو ڕۆژی ڕابردوودا ھیچ حاڵەتێکی مردن بە پەتای کۆرۆنا لە سنوورەکە تۆمار نەکراوە، بەدەر لەوەش ڕێژەی داخڵبوونی نەخۆشانی کۆرۆنا لەو دوو سەنتەرە ڕووی لە کەمبوونەوە کردووە".
تەھا محەمەد گوتیشی: "بەشێکی زۆری ئەو ھۆکارەی گیانلەدەستنەدان و کەمبوونەوەی تووشبوان بە پەتای کۆرۆنا دەگەڕێتەوە بۆ پابەندبوونی ھاووڵاتیان بە ڕێکار و ڕێنوێنییە تەندروستییەکان و پێشکەشکردنی خزمەتگوزارییە تەندروستییەکان بە ھاووڵاتییان".