كوردی عربي بادینی
Kurdî English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
×

ل دهۆكێ تۆندوتیژیا دژى ژنان كێم بوویە

 پشتى كۆ ئه‌ڤرۆ رۆژا پێنج شه‌مبى رێكه‌فتى 26/11/2020، هه‌وه‌كا 16 رۆژى یا نه‌هێلانا تۆندوتیژى یا دژى ژنان ل دهۆكێ ده‌ستپێكرى، رێڤه‌به‌ریا تۆندوتیژى یا دژى ژنان دیار دكه‌ت كۆ ئه‌ڤ ساله‌ ئامارێن تۆندوتیژى یا دژى ژنان به‌ره‌ف كێمبوونێ ڤه‌ چوونه‌.

ئارام ئه‌ترۆشى، رێڤه‌به‌رێ نه‌هێلانا تۆندوتیژى یا دژى ژنان ل دهۆكێ ئه‌ڤرۆ د كۆنگره‌یه‌كێ رۆژنامه‌ڤانى دا گۆت:" رێڤه‌به‌ریا مه‌ هه‌رده‌م د خزمه‌تا خزمه‌تكرنا ته‌خا كچ و ژنان دا بوویه‌ و به‌رده‌وام ئه‌م دیڤچوونا وان كێشه‌یان دكه‌ین ئه‌وێن دگه‌هنه‌ به‌رده‌ستێ مه‌ و هندى مه‌ شیان هه‌ین، مه‌ یێن ئه‌نجام داین ژ پێخه‌مه‌ت ڤه‌كۆلین ل سه‌ر وان كه‌یسان ئه‌وێن بۆ رێڤه‌به‌ریا مه‌ دهێن و به‌رده‌وام ئه‌م وان كێشه‌یان ره‌وانه‌ى دادگه‌ها دهۆكێ دكه‌ین".

رێڤه‌به‌رێ نه‌هێلانا تۆندوتیژى یا دژى ژنان ل دهۆكێ دیار ژى كر:" هه‌ر سال هه‌وێن نه‌هێلانا تۆندوتیژى یا دژى ژنان دهێن ئه‌نجام دان و ب چالاكیێن به‌رفره‌ه مه‌ ئه‌و هه‌وه‌ د ئه‌نجام دا لێ ئه‌ڤ ساله‌ ژ ئه‌گه‌رێ په‌تایا كۆرونایێ ئه‌م نه‌شێن چالاكیێن قه‌ره‌بالغ ئه‌نجام بده‌ین لێ د هه‌مان ده‌م دا دێ چه‌ند چالاكیه‌ك هێن ئه‌نجام دان كۆ ببنه‌ ئه‌گه‌ر تۆندوتیژى یا دژى ژنان كێم ببیت".

دۆپاتى ل وێ چه‌ندێ ژى كر:" ئه‌ڤ ساله‌ به‌رامبه‌ر سالا ده‌رباز بووى، ئامارێن تۆندوتیژى یا دژى ژنان به‌ره‌ف كێمبوونێ ڤه‌ چوونه‌ و ئه‌ڤ ساله‌ تا نۆكه‌ 1863 سكالا گه‌هشتنه‌ به‌رده‌ستێ مه‌  و 1343 سكالا چاره‌سه‌ر بوونه‌ و بتنێ 312 سكالا بۆ دادگه‌هێ هاتنه‌ ره‌وانه‌كرن و و هنده‌كێن دیتر لبن ڤه‌كۆلینێ دا نه‌ و ل ئه‌ڤ ساله‌ دا تا نۆكه‌ بتنێ 3 حاله‌تێن كۆشتنێ هه‌بوونه‌ ل سه‌رانسه‌رى پارێزگه‌هێ و هه‌لبه‌ت ئه‌ڤ ئاماره‌ به‌رامبه‌ر سالا ده‌رباز بووى، به‌ره‌ف كێمبوونێ ڤه‌ هاتیه‌".