پێداویستیى زستانە بۆ ئاوارەی نێو کەمپەکان دابین دەکرێ
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

پێداویستیى زستانە بۆ ئاوارەی نێو کەمپەکان دابین دەکرێ

بەرپرسێکى ئەنجوومەنى وەزیرانى هەرێم رایگەیاند بەهۆى هاتنى وەرزى زستان و سەرماوە ژیانى نێو کامپەکان سەختتر دەبێ، بۆیە حکوومەت پێداویستییەکانى زستانەى بۆ ئاوارەکانى نێو کامپەکانى هەرێمى کوردستان دابین کردووە.

هۆشەنگ محەمەد، بەڕێوەبەرى ناوەندى هاوبەشى هەماهەنگى قەیرانەکان لە ئەنجوومەنى وەزیرانى هەرێمی کوردستان بە (باسنیوز)ى راگەیاند: "بە هۆى هاتنى وەزرى زستان و سەرما و سۆڵەوە ژیانى ئاوارە و پەنابەرانى نێو کامپەکان سەختتر دەبێ، چونکە کابینە و خیوەت وەکو خانوو و باڵاخانەکان نییە و پێویستى بە وزەیەکى زۆر هەیە بۆ گەرمکردنیان، بۆیە حکوومەتى هەرێمی کوردستان بەردەوام لەسەر هێڵە بۆ دابینکردنى پێداویستییەکانیان بە تایبەت لە وەرزى زستاندا".

راشیگەیاند: "بە هاوکارى رێکخراوە خێرخوازییەکان و تواناکانى حکوومەتى هەرێمی کوردستان توانیومانە پێداویستى وەرزى زستانى ئەمساڵیش تارادەیەکى باش بۆ ئەو کەسانە دابین بکەین کە پەنابەرن و لەو کامپانەدا ژیان بەسەر دەبەن، لەوانەش سووتەمەنى زۆپا و تەباخ و جل و بەرگ و پێڵاوى منداڵان، ئەمان پێویستى گرنگن بۆ وەرزى زستان و سوودى زۆرى بۆ ئەو کەسانە هەیە".

ناوبراو ئەوەشى خستەڕوو" 800 هەزار کەس لە رۆژئاواى کوردستان و پارێزگاکانى باشوور و ناوەڕاستى عێراقەوە ئاوارەى هەرێمى کوردستان بوون و لە نێو کامپەکاندا دەژین، کە بەسەر 37 کامپ دابەشکراون لە پارێزگاکانى هەولێر و دهۆک و سلێمانى، لەو رێژەیەش زۆرترین ژمارە لە پارێزگاى دهۆکدا دەژین".