قایمقامی کۆیە ڕایگەیاند، ئێوارەی ئەمڕۆ سێشەممە لەلایەن کەسانی نەناسراوەوە گۆڕستانێکی سنووری کۆیە هەڵدراوەتەوە.
یوسف کەلکانی، قایمقامی قەزای کۆیە، بە (باسنیوز)ی ڕاگەیاند: "ئێوارەی ئەمڕۆ ئاگادار کراینەوە کە گۆڕستانی (دەروێش خدر) لە شاری کۆیە هەڵدراوەتەوە و بەو هۆیەوە چەند گۆڕێک بەدیارکەوتوون، بۆ ئەو مەبەستە ئێمە بەدواداچوونەکانی خۆمان دەست پێکردووە و لە زووترین کاتدا سەردانی گۆڕستانەکە دەکەین و ئەو کەسانە دەدۆزینەوە کە بە کارەکە هەڵساون و بەپێی یاسا مامەڵەیان لەگەڵ دەکەین".
ڕاشیگەیاند: "تا ئێستا نەزانراوە کێ ئەو کارەی کردووە، بەڵام گومان دەکەین ئەو کەسانە بە دوای کەلوپەلی بە نرخ و پارچەی شوێنەواریدا گەڕابن و ئامێری شوێنەوارییان بەکارهێنابێ بەو هۆیەوە زیان بەر گۆڕەکانیش کەوتووە".
ڕوونیشیکردەوە کە لە ڕابردووشدا حاڵەتی لەم شێوەیە لە سنووری کۆیە ڕوویداوە و کەسانێک بە دوای شوێنەوارەکاندا گەڕاون، بەڵام "یەکەمینجارە لە سنوورەکەماندا ئەو حاڵەتە لە گۆڕستان ڕوو بدات".