جەعفەر شێخ مستەفا: پێویستە هاوشێوەی شنگال ڕێککەوتنێکیش بۆ خانەقین بکرێت
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

جەعفەر شێخ مستەفا: پێویستە هاوشێوەی شنگال ڕێککەوتنێکیش بۆ خانەقین بکرێت

"دەستگیرکردنی گەنجان و داگیرکردنی زەویی جووتیارای کورد زیادی کردووە"

بەرپرسی لقی خانەقینی پارتی باس لە دوایین دۆخی تەعریب و داگیركردنی زەویی جەوتیارانی كورد لەلایەن عەرەبە هاوردەكان و دۆخی ئەمنیی ناوچەی خانەقین دەكات و ئاشکرای کرد پێویستە لە قۆناغی دووەمدا هاوشێوەی ڕێککەوتنەکەی شنگال، ڕێککەوتنێکیش بۆ سنووری خانەقین و دەوروبەری بکرێت.

لەمبارەوە جەعفەر شێخ مستەفا، بەرپرسی لقی خانەقینی پارتی دیموکراتی کوردستان، بە (باسنیوز)ی ڕاگەیاند: "دۆخی ئەمنیی سنووری خانەقین هەر خراپە و عەرەبە هاوردەكانیش دەستیان بە كڕینی موڵك و ماڵ لە قەزای خانەقین و ناحییەكانی دەوروبەری كردووە، تەنانەت ئەو جووتیارە كوردانەی كە ئێستا سەرقاڵی كشتوكاڵن و ئیمكانیاتی ماددییان كەمە و ئێمەش ناتوانین هیچیان بۆ بكەین، زەویی كشتوكاڵی دەفرۆشنە عەرەبە هاوردەكان، ئەمەیان زۆر ترسناكە".

گوتیشی: "لەلایەكی ترەوە هەواڵگیریی سوپای عێراق و میلیشیاكانی حەشدی شەعبی، بە بیانووی جۆراوجۆر ئەو هاووڵاتییە كوردانەی لەناو خەڵك چالاکن و دیارن، دەستگیریان دەكەن و لە رۆژانی ڕابردوو 11 كەسیان دەستگیر كردووە کە یەكێكیان مامۆستای ئاینییە، هەروەها شەوی رابردوو 22/11/2020 هەر لەناو خانەقین چوار گەنجی دیكەیان بە بیانووی جۆراوجۆر دەستگیر كردووە و ئەو كەسانە ئازا و چاونەترسن و ناترسن لە حەشدی شەعبی، بۆیە دۆسیەیان بۆ دروست دەكەن".

ئەو بەرپرسەی پارتی ئەوەشی خستە ڕوو: "سەبارەت بە زەویوزاری كشتوكاڵی لەگەڵ حكوومەتی عێراق تووشی كێشەكی گەورە بووینەتەوە، چونكە ئێستا لایەنە سەربازییەكان و حكوومەت پشتگیری لە عەرەبە هاوردەكان دەكەن و خەڵكی ئێمەش چەكیان پێ نییە و ئەوانیش دێنە سەر زەویی كشتوكاڵیی كورد و داگیری دەكەن، هەروەها پارێزگاری دیالە و بەڕێوەبەری كشتوكاڵی دیالەش بۆ ئەو مەبەستە پشتگیریی عەرەبە هاوردەكان دەكەن، لە كاتێكدا زەوییەكان هی جووتیارانی كوردە".

لەبارەی دۆخی ئەمنییەوە جەعفەر شێخ مستەفا گوتیشی: "حەشدی شەعبی بەناوی داعشەوە كردەوەی توندوتیژی ئەنجام دەدەن و لێرە و لەوێ بۆمبی چێندراو دادەنێن و خەڵك شەهید و بریندار دەبن و ئەوەش بۆ ترساندنی خەڵكە بۆ ئەوەی جووتیارانی كورد ناوچەكانیان چۆڵ بكەن و ئیتر دۆخی سنووری خانەقین وایە و ئێستاش دوای شنگال كە بۆ ئاساییكردنەوەی بارودۆخەكەی لە نێوان هەردوو حكوومەتی هەرێمی كوردستان و عێراق ڕێککەوتنکی بۆ کرا، پێویستە بۆ قۆناخی دووەم نۆرەی خانەقین بێت كە رێككەوتنێكی هاوشێوەی شنگالی بۆ بكرێت و كۆتایی بە دەسترێژییەكانی حەشدی شەعبی بهێنرێت و دۆخی ناوچەكە بەرەو باشی بڕوات".