وەزارەتى کشتوکاڵ: لە رێگەى پڕۆژەیەکى کشتوکاڵییەوە ئەزموونى هۆڵەندا دەگوازینەوە هەرێمى کورردستان
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

وەزارەتى کشتوکاڵ: لە رێگەى پڕۆژەیەکى کشتوکاڵییەوە ئەزموونى هۆڵەندا دەگوازینەوە هەرێمى کورردستان

گوتەبێژى وەزارەتى کشتوکاڵ رایگەیاند بە ئامانجى گەشەپێدانى کەرتى کشتوکاڵ و سوود وەرگرتن لە ئەزموونى وڵاتانى پێشکەوتوو، لە رێگەى پڕۆژەیەکى کشتوکاڵییەوە ئەزموونى هۆڵەندا لەو کەرتەدا دەگوازینەوە هەرێمى کوردستان.

حوسێن حەمە کەریم، گوتەبێژى وەزارەتى کشتوکاڵ و سەرچاوەکانی حکوومەتى هەرێمی کوردستان بە (باسنیوز)ى راگەیاند: "وڵاتى هۆڵەندا یەکێکە لەو وڵاتانەى کە لە کەرتى کشتوکاڵدا لە پێشەوەى زۆربەى وڵاتانى جیهانە، بۆیە ئەزموون و شارەزایى ئەوان بۆ ئێمە گرنگە، لەم سۆنگەیە و لە چوارچێوەى گەشەپێدانى کەرتى کشتوکاڵدا، لە رێگەى ئەنجامدانى پڕۆژەیەکى کشتوکاڵى ئەزموونى ئەو وڵاتە دەگوازینەوە هەرێمى کوردستان".

راشیگەیاند: "پڕۆژەیەکى کشتوکاڵى لەلایەن وڵاتى هۆڵەنداوە بە ستانداردێکى جیهانیى پێشکەوتوو لە هەرێمی کوردستان جێبەجێ دەکرێ بە گوژمەى چوار ملیۆن یۆرۆ،کە نیوەى ئەو پارەیە لەلایەن وڵاتى هۆڵەندا و نیوەکەى دیکەشى لەلایەن کۆمپانیا خۆماڵییەکانەوە تەرخان کراوە".

ئاماژەى بە ئەوەش کرد" پڕۆژەکە لە شێوەى خانووى شوشەییە و لە شێوەى سەنتەرێک دەبێت بۆ فێرکردنى جووتیاران و خوێندکارانیش، کە چۆن بە شێوازێکى زانستیانە بەروبووم دەچێنن و پەرەى پێدەدەن و بەرهەم زیاد دەکەن، هۆڵەندا تا ماوەى چوار ساڵ سەرپەرشتى پڕۆژەکە دەکات و پاشان رادەستى جووتیارانى دەکات".

روونشىکردەوە" پڕۆژەکە لە هەر پارێزگایەک لەسەر یەک دۆنم زەوى ئەنجام دەدرێت، بۆ ئەم مەبەستە زەوى پێویستیش تەرخانکراوە و بەمنزیکانە دەست بە جێبەجێکردنى پڕۆژەکە دەکرێ".