ئێوە مەغلووبن نەك غالب
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

ئێوە مەغلووبن نەك غالب



لە درێژەی ھەڵمەتی ڕاگەیاندنی چەواشەكارانەدا، لە درێژەی ھەڵمەتی ھەڵبەستنی درۆ و بوختاندا، لە درێژەی درێژەدان بە ملكەچی و سەركزیدا، لە درێژەی ڕشانەوەی بەردەوام بە ھەرێمی كوردستان و داوودەزگا دەستوورییەكانی ھەرێمی كوردستان و بەتایبەتی لە درێژەی دژایەتیكردنی حكوومەتی ھەرێمی كوردستاندا، غالب محەمەد ئەندامێكی (بە زمان كورد بەڵام بە عەقڵ ئەسەدی!) دەڵێت: ”ئەگەر هەرێمی كوردستان 250 هەزار بەرمیل نەوت ڕادەست بكات نەك مووچەی فەرمانبەرانی هەرێمی كوردستان، بەڵكوو بودجەشی بۆ ڕەوانە دەكرێت، هەر بۆیە ئێستا عێراق تێگەیشتووە كە هەرێمی كوردستان یاری دەكات و نەوت ڕادەست ناكات، دواجار هەر ئەوەشە وای كرد كە ڕادەستكردنی نەوتی هەرێم بە بەغدا بكرێتە یاسا“.

ئەم غالبە دەشڵێت: ”لە ماوەی ڕابردوودا 12 جار شاندی هەرێمی كوردستان سەردانی بەغدایان كردووە و ڕایانگەیاندووە نەوت ڕادەست دەكەن، بەڵام كە ئێستا كراوەتە یاسا نیگەران بوون“.
ئەم غالبە نەك ھەر خۆی، بەڵكوو شەش حەوت ئەندام پەرلەمانی تری (بە زمان كورد لە بەغدا بەڵام دیسان بە عەقڵ ئەسەدی) حەق بوو ھەموویان ناویان مەغلووب واتە (ژێركەوتوو لەژێرەوەبوو) بوایە نەك غالب كە بە مانای (سەركەوتوو و لەسەرەوەبوون!) دێت، چونكە ئەگەر غالب بەڕاستی غالب بوایە و مەغلووب نەبوایە، ڕاستیەكانیان بەو شێوەیە ھەڵنەدەگێڕایەوە و نەدەھاتن بەو شێوەیەی كە دوژمنان و ناحەزانی كورد دەیانەوێت، ئا ئەوھا ڕیزە درۆ بھۆننەوە چونكە:

1- حكوومەتی ھەرێمی كوردستان زیاتر لە جارێك و دووان و سیان ڕایگەیاندووە كە ھەرێمی كوردستان ئامادەیە نەك ڕۆژانە 250 ھەزار بەرمیل نەوت ڕادەستی بەغدا بكات، بەڵكوو ئامادەیە ھەموو نەوتی بەرھەمھێنراوی ڕۆژانەی خۆی ڕادەستی بەغدا بكات، بەڵام لە بەرامبەردا دەبێت بەغدا تەواوی مووچەی مووچەخۆرانی ھەرێمی كوردستان بەگوێرەی ئاماری مووچەخۆرانی ھەرێم كە لای حكوومەتی ھەرێمی كوردستانە دوای بایۆمەتری بۆ ھەرێمی كوردستان بنێرێت، جگە لە شاییستە داراییەكانی تری ھەرێم بەگوێرەی دەستوور و یاسای ئیدارەی دارایی كە بەیەكەوە و لەگەڵ كورددا و بە ڕەزامەندیی كوردیش دەردەكرێت، كەچی ئەوە بەغدا بووە كە ئامادەی ئەمە نەبووە نەك ھەرێمی كوردستان.

بەڵام چونكە غالب، غالب نیە و لەمێژە مەغلووبە واتە لەمێژە كەوتۆتە ژێر حەز و ویست و سیاسەتەكانی دوژمنان و ناحەزانی كورد لە بەغدا، دێت ئەم ڕاستیە ھەڵدەگێڕێتەوە و دەڵێت: ”ئەگەر ھەرێمی كوردستان ئامادە بێت ڕۆژانە 250 ھەزار بەرمیل نەوت ڕادەستی بەغدا بكات نەك مووچەی فەرمانبەرانی هەرێمی كوردستان، بەڵكوو بودجەشی بۆ ڕەوانە دەكرێت“.

من لە پێگەیەكدا نیم كە بە ڕەسمی تەعبیر لە سیاسەت و ھەڵوێستی حكوومەتی ھەرێمی كوردستان بكەم، بەڵام تەنیا وەك ھاووڵاتیەكی كوردستان كە 13 ساڵە ئاگاداری ناكۆكیی نێوان حكوومەتی عێراق و حكوومەتی ھەرێمی كوردستان لەسەر مەلەفی نەوت و شایستە داراییەكانی ھەرێم و ئەرك و مافەكانی ھەردوولای ناكۆكیەكە ھەم، دەڵێم ئەگەر بەڕاستی غالب غالبە و غالب مەغلووب نیە، فەرموو ئەو فەرمایشتەی كە ئێستا مەغلووب فەرموویەتی با وتەبێژی حكوومەتی عێراق بەفەرمی و بەناوی حكوومەتی عێراقەوە ڕایبگەیەنێت ئینجا دوای ئەوەش سەیری ھەڵوێستی فەرمیی حكوومەتی ھەرێم بكەن و بزانن دەستبەجێ ڕازی دەبێت یان نەخێر؟

2- سەبارەت بەو بەشە لە قسەی غالب، ببوورن مەغلووب! كە دەڵێت: ”لە ماوەی ڕابردوودا 12 جار شاندی هەرێمی كوردستان سەردانی بەغدایان كردووە و ڕایانگەیاندووە نەوت ڕادەست دەكەن بەڵام كە ئێستا كراوەتە یاسا نیگەران بوون“، ئەمەشیان ھەر چەواشەكردنی خەڵك و قسەی ئەوانەیە كە لە بەغدا و لە بەرامبەر دوژمنان و ناحەزانی كورددا مەغلووبن، واتە لە ژێرەوەن و ژێركەوتوون، ئەگینا حكوومەتی ھەرێمی كوردستان لەبەر ئەوە لە یاساكە نیگەران بووە چونكە بەبێ بنەمای تەوافوق - كە یەكێكە لە پایەكانی دامەزراندنی دەوڵەتی عێراقی دوای 2003 - ئەو یاسایە دەركراوە، بەڵام ھەر بەگوێرەی بنەمای تەوافوق دەبوایە بە شێوەیەك بوایە كوردیش بەو یاسایە ڕازی بوایە، واتە نیگەرانیی كورد لە یاسا نیە، بەڵكوو لە شێوازی تێپەڕاندنی یاسایەكە كە بەبێ ڕەزامەندیی كورد و دوور لە بنەمای تەوافوق و بەكەڵەگایی ئاغاكانی مەغلووب محەمەد دەركراوە.

بۆیە ھەرێمی كوردستانیش نەك ھەر نیگەران بووە، بەڵكوو ڕەتیشی كردووەتەوە و ناچێتە ژێر ئەو بارەی كە لەناو ئەو یاسایەدا دژی كورد داڕێژراوە، جا ئەگەر مەغلووب و خەڵكی تری وەك مەغلووب محەمەد، حەزیان لە كەڵەگایی ئاغاكانیانە بەسەریانەوە كەیفی خۆیانە، بەڵام ھەموو كورد ئەو حەزەی مەغلووب محەمەدی نیيە.