لیزا کاکەیی: هەوڵی گواستنەوەی مووچەی فەرمانبەرانی هەرێمی کوردستان بۆ سەر بەغدا تەنیا چەواشەکارییە
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

لیزا کاکەیی: هەوڵی گواستنەوەی مووچەی فەرمانبەرانی هەرێمی کوردستان بۆ سەر بەغدا تەنیا چەواشەکارییە

"پڕۆژەکە تا بەردەرگای هۆڵی پەرلەمان دەچێت و ناچێتە ژوورەوە"

لیزا فەلەکەدین کاکەیی، پەرلەمانتاری فراکسیۆنی پارتی دیموکراتی کوردستان دەڵێ پڕۆژەی گواستنەوەی مووچەی فەرمانبەرانی هەرێمی کوردستان بۆ سەر بەغدا بەشێکە لە بانگەشەی هەڵبژاردنی چەند لایەنێک، مەبەست لێی تەنیا چەواشەکارییە.

لیزا کاکەیی، بە (باسنیوز)ی راگەیاند: "هەڵبژاردنی پێشوەختەی عێراق خەریکە نزیک دەبێتەوە و هەر بۆیەش تا دێت کێرڤی چەواشەکاری و بانگەشەی ناراستەوخۆ بەرزتر دەبێتەوە، پڕۆژەی گواستنەوەی مووچەی فەرمانبەرانی هەرێمی کوردستان بۆ سەر بەغدا یەکێکە لە بەرنامە زەقەکانی بانگەشەی هەندێک لایەنی سیاسی کوردستانی و عێراقی کەوا جگە لە چەواشەکاری و هەوڵدان بۆ خۆ بەپاڵەوانکردن بۆ هەڵبژاردنی داهاتوو هیچ ڕاستییەکی دیکەی تێدا بەدی ناکرێت".

ئەو پەرلەمانتارەی پارتی دەشڵێ: "مامۆستایەکی ئازیز یاخود فەرمانبەرێکی ماندوونەناس شایستەی ئەوە نییە بە ساویلکە بزانرێت و بە دوو ژاوەژاوی سیاسی هەوڵی کۆنترۆڵ کردنی هەست و بیرکردنەوەی بدرێت و بەکاربهێنرێت بۆ کۆکردنەوەی دەنگ و کورسییەکی پەرلەمانی. لە هەمووی سەیروسەمەرەتر کەسانێک کە خۆیان کردووەتە خاوەنی پرۆژەکە لە رابردوو نەیانتوانیوە پابەندی سیاسەتی حزبەکەی خۆیان بن و بەبێ هیچ دوودڵییەک لەپ ێناو بەرژەوەندییەکانیان بە چاوتروکاندنێک پشتیان لە حزبەکەی خۆیان کردووە".


کاکەیی ئاماژەی بە ئەوەش داوە"لە هەمووشی کارەساتبارتر ئەوەیە کە ئەو پرۆژەیە واژووی پەرلەمانتاری وای تێدایە کە بە رەچەڵەک کوردە و پاسپۆرتی ئەمریکی هەیە کەچی بەرژەوەندییەکانی ئەوەنە زاڵبوونەتە سەری فەرمان لە ئەنارشیزمەکانی بەغدا وەردەگرێت".

ڕوونیشیکردووەتەوە کە هەردوو حکوومەتی هەرێمی کوردستان و عێراق لە هەوڵێکی جددیدان کە بگەنە میساقێکی سیاسی و ئابووری تاوەکو کۆتایی بە ململانێی حەوت ساڵەی نێوانیان بهێنن"بێگومان ئەمەش هەندێک لایەنی بەتەواوی پەست و قەڵس کردوو و بە پیلانڕێژی و بەرنامە جۆراجۆر دەیانەوێت بەربەست لەبەردەم ئەو رێککەوتنانە دروست بکەن".

لیزا کاکەیی گوتیشی: "حکوومەتی عێراق لە رووی سیاسی و ئابووری و یاسییەوە مامەڵە لەگەڵ حکوومەتی هەرێمی کوردستان دەکات، بۆیە دڵنیابن ئەو پرۆژەیە تا بەردەگای هۆڵی کۆبوونەوەی پەرلەمان دەچێت بەڵام ناچێتە ژوورە".

لە کۆتایی لێدوانەکەیدا راشیگەیاند: "ئەو پەرلەمانتارە کوردانەی خۆیان کردووەتە خاوەنی ئەم پرۆژەیە چاکتر وایە سەرقاڵی پرسی گرنگتر بن کە واقعی بێت و ئەنجامی هەبێت و لە بەرژەوەندی کوردستانیان بێت، بۆ نمونە پرسی هەمواری دەستوور و هەوڵی شۆڤینییەکان بۆ لابردن و نەهێشتنی ماددەی ۱٤٠ ، پێویستە دەستوبردێک بکەن و چۆن توانیان ۱۱۷ واژووی پەرلەمانتارانی عێراق بۆ پرۆژەیەکی خەیاڵاوی کۆبکەنەوە ئاواش لۆبی بۆ ئەم پرسەش دروست بکەن".