كه‌سانی ئه‌كادیمی له‌ دیمه‌شق!
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

كه‌سانی ئه‌كادیمی له‌ دیمه‌شق!

له‌ ده‌سپێكدا پێویسته‌ بڵێین، هێز و لایه‌نانی سیاسیی هه‌ره‌ پێكهاته‌یه‌ك، گوزارشت له‌ نوێنه‌رایه‌تیی خواستی سیاسیی ئه‌وان ده‌كات.

له‌و كاته‌ی، كه‌ رۆڵی خه‌ڵكانی ئه‌كادیمی، یان چالاكانی بواری كۆمه‌ڵایه‌تی به‌نده‌ به‌ پشتیوانیكردن له‌ جڤاك و كاركردن بۆ به‌رزكردنه‌وه‌ی ئاستی په‌یبردن به‌ مافی، له‌ رێی بڵاوكردنه‌وه‌ی هۆشیاری و پشتگیریكردنی، هه‌روه‌ها به‌رچاوڕوونییش ده‌ده‌نه‌ پارت و لایه‌نانی سیاسی (ده‌سه‌ڵات)، بۆ چاره‌سه‌ركردنی كه‌موكوڕی، یان لایه‌نی لاواز، یان رێچكه‌ی داخزان به‌ره‌و ملهوڕی و دیكتاتۆری.

مایه‌ی ئاماژه‌پێدانه‌، كه‌ بڵێین، ره‌وشی ئێمه‌ی كورد به‌و چه‌شنه‌یه‌، ده‌سته‌بژێری رۆشنبیر و لایه‌نانی سیاسی له‌ پێشبڕكێدان بۆ نوێنه‌رایه‌تیكردنی كۆمه‌ڵ. زۆر جاریش هه‌ر یه‌كه‌یان خۆی به‌ شیاوتر ده‌زانێت بۆ سه‌ركردایه‌تیكردنی گه‌ل له‌ رووی سیاسییه‌وه‌، زۆر ئاشكراشه‌، هه‌ست به‌و خه‌مه‌ی ناخی هه‌ر رۆشنبیرێكی كورد ده‌كه‌یت، كه‌ له‌ خولیای ئه‌وه‌دایه‌، چۆن ببێته‌ پیاوی سیاسه‌ت، یان پارتێكی سیاسی؟

مایه‌ی پێكه‌نینه‌، زۆر له‌ سه‌ركرده‌ی پارته‌كانیش پێیان وایه‌، ناوبانگ و پێگه‌ به‌ده‌ست ناهێنن، ئه‌گه‌ر هه‌وڵ نه‌ده‌ن وتارێك بنووسن، به‌ واتای ئه‌وه‌ی، پێوه‌ری هه‌ر سه‌ركرده‌یه‌ك له‌وه‌دایه‌، بتوانێت وتارێكی رۆژنامه‌وانی بنووسێت.

ره‌نگه‌ هه‌ر ئه‌و خولیایه‌ بێت، كه‌ ماوه‌ ناماوه‌ پاڵ به‌ رۆشنبیره‌وه‌ ده‌نێت، په‌نا بباته‌ به‌ر رژێم و له‌گه‌ڵی دابنیشێت، ده‌شیه‌وێت بڵێ، كه‌ ئه‌و پرۆژه‌یه‌ك بۆ چاره‌سه‌ر پێشكه‌ش ده‌كات، له‌و كاته‌ی، كه‌ پێشكه‌شكردنی پرۆژه‌ی چاره‌سه‌ر، یان دید و روانگه‌، چاكتر وایه‌ یه‌كه‌م جار بخرێته‌ به‌رده‌م لایه‌نانی سیاسی له‌ ئاستی ده‌سه‌ڵاتی خۆجێییدا، نه‌ك ئه‌وه‌ی رۆشنبیران خۆیان وه‌ك بریت و جێگره‌وه‌ی لایه‌نی سیاسی و پارته‌كان پیشان بده‌ن.

هه‌ڵبه‌ت، ئه‌مه‌ یه‌كه‌مین جار نییه‌ رۆشنبیری كورد خۆی لێ هه‌ڵده‌كات و روو له‌ كۆشكه‌كانی ده‌سه‌ڵات ده‌كات.

سه‌ره‌تای ساڵی 2000 كۆمه‌ڵێك رۆشنبیری كورد، له‌وانه‌ی خه‌ڵكی ده‌ڤه‌ری جزیره‌ بوون، چاویان به‌ (نه‌جاحل عه‌تتار)ی وه‌زیر كه‌وت، دوو كه‌سی ئه‌كادیمی له‌و دانیشتنه‌دا بوون و داوایان له‌ نه‌جاحل عه‌تتار كرد، گۆڤارێك به‌ زمانی كوردی ده‌ربچێت، به‌ڵام ئه‌و خواسته‌یان به‌دی نه‌هات، ئیدی به‌ سه‌ركزی گه‌ڕانه‌وه‌.

ئێستا گوێمان لێ ده‌بێت، كه‌ ژماره‌یه‌ك ئه‌كادیمی و پزیشكی كورد له‌ دیمه‌شقن، به‌ ئامانجی ئه‌وه‌ی چاویان به‌ سه‌رانی رژێم بكه‌وێت و (پرۆژه‌یه‌كی چاره‌سه‌ر)یشیان له‌ هه‌گبه‌دایه‌.

ئه‌وه‌ی مایه‌ی سه‌رنجه‌، یه‌كێك له‌وان به‌ میدیای گوت، ئه‌وان دیدێك سه‌باره‌ت به‌ چاره‌سه‌ركردنی (پرسی كورد) ده‌خه‌نه‌ به‌رده‌می رژێم، ئه‌گه‌ر پرۆژه‌كه‌شیان ره‌ت كرایه‌وه‌، ئه‌وه‌ قسه‌ی خۆیان ده‌بێت. گه‌لێك كه‌س له‌و قسه‌یه‌ به‌ گومانن، پاساویشیان ئه‌وه‌یه‌، كه‌ هه‌ر كه‌سێك بچێته‌ لای رژێم، زاتی ئه‌وه‌ ناكات قسه‌یه‌كی به‌رامبه‌ر بكات!

هه‌ڵه‌ی گه‌وره‌، كه‌ رۆشنبیری كوردی سووریا تێی ده‌كه‌وێت ئه‌وه‌یه‌، خۆی وه‌ك بریتی لایه‌نانی سیاسی پێشكه‌ش ده‌كات، له‌مه‌شدا شكست ده‌هێنێت و هاوسه‌نگی له‌ده‌ست ده‌دات.

هه‌ر كه‌سێك شه‌یدای ئه‌وه‌یه‌ ببێته‌ سیاسی، یان بچێته‌ نێو پارتێكه‌وه‌، ده‌رگا كراوه‌یه‌ و رێ ئاچووخە، له‌ كوردستانی سووریادا هیچ كه‌س رێ له‌ چ كه‌سێك ناگرێت، كه‌ پارتێك دابمه‌زرێنێت، یان بچێته‌ نێو ریزی پارتێكه‌وه‌.

ماوه‌ته‌وه‌ بڵێین، گه‌لێك گه‌ڕی دانوستاندن له‌گه‌ڵ حكوومه‌تی سووریا به‌ڕێوه‌ن و كراویشن، ئیدی چ راسته‌وخۆ، یان له‌ رێی نێوانگیره‌وه‌ بێت، چ له‌ لایه‌ن كارگێڕیی خۆسه‌ره‌وه‌ بێت، یان دیداره‌كانی ئه‌نجومه‌نی نیشتمانیی كورد له‌گه‌ڵ لایه‌نی رووسیا، پارتی دیكه‌ش هه‌ن زۆر به‌ بایه‌خه‌وه‌ رێڕه‌وی دیالۆگیان گرتووه‌ته‌ به‌ر، جا ئه‌گه‌ر پارته‌كان له‌وه‌دا شكستیان هێنابێت، كه‌ رژێم مل بداته‌ به‌ر چاره‌سه‌ركردنی پرسی كورد، ئایا كه‌س باوه‌ڕ ده‌كات كۆمه‌ڵێك رۆشنبیر بتوانن له‌ گفتوگۆكردن له‌گه‌ڵ رژێمدا سه‌ركه‌وتوو بن؟
ئه‌مه‌یه‌ مه‌به‌ست.