ڕەش و سپی لە جەنگی بەرژەوەندییەکاندا!
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

ڕەش و سپی لە جەنگی بەرژەوەندییەکاندا!

ئەوەی ئێستا لە هەرێمی كوردستان (كە بەداخەوە بەشێكە لە عێراق)، دەگوزەرێ، بەكورتی ئەمەیە: گەلێك، زۆرینەی خەونی سەربەخۆبوونی هەیە، لە هەمان كاتیشدا دەخوازێت ژیان و گوزەرانی لە ئاستێكی بەرزدا بێت، لە هەوڵدایە شار و شارۆچكەكانی پێشكەوتوو بن و وڵاتێك بنیات بنێت، بەڵام ئەم خواستە رووبەڕووی چەند لەمپەرێك بووەتەوە، لە لایەكەوە وڵاتانی داگیركەری كوردستان، هەموو هێزیان خستووەتە گەڕ لەدژی ئەم ئەزموونەی باشوور و برسیكردنی خەڵكەكە، لەلایەكی ترەوە كۆمەڵگەی نێودەوڵەتی و زلهێزان لەوپەڕی بێڕەوشتی و بێویژدانیدا تەنیا خەریكی پاراستنی بەرژەوەندییەكانی خۆیانن لەم ناوچەیە، لەسەر ئاستی ناوخۆش حزب و گرووپ و سیاسیگەلی كوردی هەن هاوكاری داگیركەرانن لە دژی هەرێمی كوردستان، لەلایەكی تریشەوە، سیاسیگەل و بەرپرسانێكی باڵادەست هەن، كە لەپێناو بەرژەوەندی و گیرفان و قاسەی خۆیاندا، هەموو شتێكی خراپ دەكەن، لەوەش سەیرتر ئەوەیە، هێشتا ئەوان باسی (مافی خەڵك) دەكەن!

نه ‌له‌دایكبوون، نە هه‌ڵبژاردنی دایك و باوكمان به ‌ده‌ستی خۆمانه، نه‌ هه‌ڵبژاردنی جوگرافیای خاكمان كه‌ باوانمان تێیدا له‌دایك بوون و تێیدا ژیاون هەڵبژاردەی خۆیان ‌بووه‌ و شوێنی مردنیشمان دیار نیه‌ كه‌ به‌ چ شێوه‌یه‌ك یان به‌ چ كاره‌ساتێك ده‌مرین، (له‌وانەیه‌ بۆ هه‌ندێك كه‌س دیار بێت كە لە ژیانیدیا وەسیەتی كردووە له‌ چ گۆڕستانێك به‌ خاك ده‌سپێردرێت!)، بەڵام ئەویش هەر مەرج نییە بۆی بچێتە سەر، كەچی سەرەڕای هەموو ئەوانەش هه‌رده‌م باسی قه‌ده‌ر و چاره‌نووس ده‌كه‌ین، ئەمە لە حاڵێكدا نە قه‌ده‌ری خۆمان لێ دیارە، نە دەشزانین چاره‌نووس بەرەو كوێمان دەبات!‌

قه‌ده‌ری كورد هەم بەپێی ئەو مێژووەی خوێندوومانەتەوە و هەمیش ئەو مێژووە نزیكەی خۆمان تێیدا ژیاوین، پڕه‌ له‌ مه‌ینه‌تی و شه‌ڕ و كارەسات، لە هەمووی ناخۆشتر شەڕی یەكدییە لەنێو خۆماندا، لێ هێشتا هەر چاره‌نووسی كورد دیار نیه، چونكە نازانین تا كەی ئێمە دەبینە قوربانیی بەرژەوەندییەكان. هه‌ڵبه‌ته‌ هۆكارگه‌لێك هەن‌ بۆ ئه‌وه‌ی كه‌ تا ئێستا بەشێكی زۆر لە چاره‌نووسی وڵاتمان به‌ده‌ست ئه‌و وڵاتانه ‌بێت كه‌ گرەو‌ له‌سه‌ر به‌رژه‌وه‌ندییەكانی خۆیان ده‌كه‌ن، وەك چۆن هۆكاریش زۆرن لەوەی كە بەشێكی زۆر لە مرۆڤەكانی ئەم نەتەوەی كوردە و ئەم نیشتمانەی كە ناوی كوردستانە، گرەو‌ له‌سه‌ر به‌رژه‌وه‌ندییه‌ كه‌سیه‌كانیانی خۆیان ‌ده‌كه‌ن، بە ئاستێك كە هه‌ر شتێك مه‌نفه‌عه‌ت و به‌رژه‌وه‌ندیی خودی خۆیانی تێدا بێت (دوور لە بەرژەوەندیی نیشتمان و نەتەوە) ئەوە دەكەنە كارنامەیان.


به‌رژه‌وه‌ندیی تاك و گرووپ له‌سه‌ر بنه‌مای ئێگۆییزم (خودپەرستی) و مۆڕاڵ، گه‌ر ئه‌م دوو مۆدێله‌ به‌ چاوێكی ورده‌وه‌ بئا‌خنێینه‌ ناو فه‌زای سیاسی و ژیانی ڕۆژانه‌مان، زۆر شت له‌ لامان ڕوون ده‌بێت. گه‌ر بڕیار بێت مرۆڤ مۆراڵدار بێت و به‌ها مرۆییه‌كان و بەها بەرزە گشتییه‌كانی نیشتمان له‌به‌رچاو بگرێت، ده‌بێت فاكته‌ری ئه‌م مامه‌ڵەكردنه‌ له ئاوەزی خودی مرۆڤه‌كه‌دا جێگیر ‌بێت. زۆرێك له‌و كه‌سانه‌ی كه‌ خۆیان به‌ مۆڕاڵدار و خاوه‌ن هەڵوێست ده‌ناسێنن و له‌ زۆر رووداو و هەواڵدا، نووسین و هەڵوێستیان هەیە، هاوزەمان لایه‌نێكی شاراوەشیان هه‌یه‌ كه‌ به ‌ئاراسته‌یه‌كی نه‌رێنی و ژێر به‌ژێرانه‌ كار له‌سه‌ر به‌رژه‌وه‌ندییه‌كانی خودی خۆیان ده‌كه‌ن، ئه‌مه‌ش ده‌مانباته‌وه‌ بۆ ئه‌و بنه‌مایه‌ی كه‌ پێی ده‌ڵێن ”ئیگۆییزم -خودپەرستی“ كه‌ مۆڕاڵ و به‌ها ره‌سه‌نه‌كانی تیا ون دەبێت.

گەر بمەوێ روونتر مەبەستەكەم بگه‌یەنم، دەمەوێ بڵێم ڕاده‌ی‌ ئێگۆییزمی (خۆپه‌رستی)ی ئه‌م جۆره‌ كه‌سانه‌ له‌ مۆدێل و فه‌زای سیاسیی كوردستاندا به‌ره‌و هه‌ڵكشان رۆیشتووه‌ و به‌ژه‌وه‌ندییە تایبه‌تیه‌كان بوونەته‌ ڕێگر و لەمپەر لەبەردەم حوكمڕانی دروست و بەڕێوەبەردنی ئەزموونی باشووری كوردستان و هەنگاوەكانی حكوومەت.

هه‌موو باش ده‌زانین سیاسه‌ت چیه ‌و زۆربەی سیاسه‌تمه‌داره‌كانیش چین و چۆن سیاسەت بۆ به‌رژه‌وه‌ندیی خودی خۆیان وەسوود دەهێنن، قسه‌ی من له‌سه‌ر حزبی سیاسی نیه،‌ ئاشكرایه‌ كه‌ حزبه ‌سیاسییه‌كان له‌سه‌ر چ بنه‌مایه‌ك بەرگری لە سیاسەت و هەنگاو و هەڵوێستەكانی خۆیان دەكەن، دەشزانم لە كوردستانی باشوور حزب هەیە بەرژەوەندییەكانی نزیكە لە بەرژەوەندییە باڵاكانی نەتەوە و نیشتمان، حزبیش هەیە بەرژەوەندییەكانی سەد و هەشتا پلە پێچەوانەی بەرژەوەندییە باڵاكانی نەتەوە و نیشتمانە.

لێ قسەی من لەسەر بەشێك لە سەركردە و سیاسەتەمەدارانی نێو ئەو حزبانەیە، كە تووشی نەخۆشیی دەروونیی (ئیگۆییزم - خودپەرستی) بوون، پاراستنی بەرژەوەندییەكانی خۆیان هەڵوێست و تەنانەت رەئیشیان لەسەر رووداوە گرنگەكان دەگۆڕێت، جا مەترسیدار ئەوەیە كە ته‌وژمی گه‌شه‌سه‌ندن و فراوانبوون و زۆربوونی به‌رژه‌وه‌ندیه‌كانیان كاریگه‌ریی له‌سه‌ر تەنانەت ئایدلۆژیا و بەهاو مرۆییەكانیشیان كردووە.

له‌ ماوه‌ی ڕابردوو و ئێستاشدا، زۆر رووداومان بینی لە كوردستان كە بوونەتە هۆی لێكترازانی گەورە لەنێو گەلەكەماندا، لەو رووداوانەدا لای بەشێك لە سیاسەتمەداران و بەرپرسانی هەندێك حزب، بینیمان نە بەهای نەتەوەیی ماوە، نە مۆراڵ و نە رەوشتی كوردانە و نە پرسی پاراستنی ئاسایشی نەتەوەیی و نیشتمانی، بینیمان ئیگۆزییزم (خودپەرستی) و بەرژوەندیپارێزی لای ئەو جۆرە سایسەتوانانە! لە لوتكەدایە! باشە ئەگەر كەسانێك خیانەت و فرۆشتنی خاك و ئەتككردنی هێما باڵاكانی نەتەوە، وەك رووداوێكی راگوزەر و ئاسایی و تەكتیكی سەیر بكەن، ئیتر چییان پێ بڵێین؟!

ئێمە، چی لە سیاسەتمەدارانێك بكەین، كە دەڵێن: ”تەقاندنەوەی بۆریی نەوتی هەرێمی كوردستان - توركیا و هێرشكردنە سەر پێشمەرگە، رووداوێكی تەكتیكیە و ستراتیجی نیە!“.
ئەرێ لە كوردستانی باشوور هیچ پرۆژەیەك هێندەی ئەو بۆریەی نەوت دەبات بۆ توركیا و بازاڕەكانی جیهان، ستراتیجییە؟ تا ئێمە ئەو هێرشانەی پەكەكە تەنیا بە تەكتیك وەربگرین؟!
تێناگەم، ئەم شرۆڤانە خەڵەتاندنی خەڵكە؟ یان بە گێل زانینی خەڵكە؟ یان تەنیا پاراستنی بەرژەوەندییەكانی خۆیانە و بەس؟

زه‌نگی خه‌ته‌ر ئه‌وه‌یه‌ كه‌ پێناسه‌ی ”مۆراڵ“ و ”ئێگۆییزم“ تێكه‌ڵ بكرێت، یان به‌پێی به‌رژه‌وه‌ندیی ئه‌و كه‌سانه‌ی كه‌ خۆیان لەو چوارچێوه‌دا ده‌بیننه‌وه‌ پێوانە بكرێت، له‌وه‌ش ترسناكتر ئه‌وه‌یه‌ خه‌ڵكانی ئه‌كادیمی و رۆشنبیر سیاسه‌تمه‌دار بۆ به‌رژه‌وه‌ندیی تایبه‌تی خۆیان، له‌ژێر پاساوێكدا بێده‌نگی هه‌ڵده‌بژێرن.

هه‌ڵبه‌ته‌ باشووری كوردستان هه‌ر یه‌ك ده‌ردی نیه‌ تا به‌ئاسانی بڵێین تێده‌په‌ڕێ و چاره‌سه‌ری ئاسانه، به‌ڵكوو ده‌ردگه‌لێكی زۆر هه‌یه، لێ خەتەرترین دیاردە ئەوەیە، كە میدیاگەلێكی چەواشەكار بەردەوام خەڵك دەخەڵەتێنن، بەرپرسانێكی نانیشتمانپەروەر و بەرژەوەندپەرست و گەندەڵ و ناپاك و خاكفرۆش، بەردەوامن لە كاری خراپی خۆیان كەچی كە دێنە سەر شاشەی تی ڤی و لە سۆشیال میدیاوە وەك (فریشتە!) قسە دەكەن، چارە ئەوەیە هەموو هەولێك بخەینە گەڕ تا هۆشیاریی خەڵك بەرز بكەینەوە و چیتر ئەو سیاسەتمەدار و میدیا چەواشەكارانە نەتوانن، لەخشتەیان بەرن.