سەرکردەکی ئەلپارتی: پەكەكە تێكدانی ئاسایشی هەرێمی کوردستان كردۆتە ئامانج
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

سەرکردەکی ئەلپارتی: پەكەكە تێكدانی ئاسایشی هەرێمی کوردستان كردۆتە ئامانج

“ئەو حزبە دژی دەستكەوتەكانی هەرێمی كوردستانە”

سەرکردەیەکی کوردی سووریا رای گەیاند، پارتی كرێكارانی كوردستان (پەكەكە) لە ڕێگەی هێرشكردنە سەر كونسوڵخانەكان و بە ئامانجگرتنی كۆمپانیا بیانییەكان، هەوڵی تێكدانی ئاسایشی هەرێمی كوردستان و زیانگەیاندن بە دەستكەوتەكانی ئەم بەشەی كوردستان دەدات.

عوسمان مەلۆ، سەرکردە لە پارتی دیموکراتی کوردی سووریا بە (باسنیوز)ی راگەیاند: “لێدان لە ئاسایشی هەرێمی کوردستان لە رێی هێرشکردنە سەر كونسوڵخانە و تیرۆرکردنی دیبلۆماتکاران و بەئامانجگرتنی کۆمپانیاکان، یەکێکە لە شێوازە کۆنەکانی تاوان”.

ڕوونیشی كردەوە كە ئامانج لەو هەوڵانەی پەكەكە، لێدانی دەستكەوتەكانی هەرێمی کوردستانە، لە كاتێكدا “ئەو دەستكەوتانە بوونەتە بەشێک لە خەونی کوردانی هەموو دونیا و جێی رێز و ستایشی جیهانیشن”.

ئەو سەرکردە کوردە ئاماژەی بۆ ئەوەش كرد: “ئەم هەوڵانەی پەكەكە بە پاڵپشتیی دەوڵەتێكی ئیقلیمییە، ئامانجی لێدانە لەو ڕۆڵە ئەرێنییەی كە سەرکردایەتیی سیاسیی هەرێمی کوردستان بەرامبەر بە زۆر لە کێشەکان دەیگێڕێت، لە نێویشیاندا پرسی رۆژئاوای کوردستان و ناوچەکە بە گشتی”.

عوسمان مەلۆ جەختی كردەوە كە ئەو هەوڵانە دەیسەلمێنن، پیلانداڕێژەرانی ئەو تاوانانە، هەمان ئەو لایەنانەن كە دژی ئامانجی گەلانی ناوچەکەن، بەتایبەتی ئەزموونە ناوازەکەی هەرێمی کوردستان، کە لایەنی کوردی وەک ئامراز بۆ لێدانی ئیرادەی گەلی کوردستان بەکار دێنن. گوتیشی: “ناتوانن ئامانجەكەیان بەدی بێنن”.

ئەمە لە كاتێكدایە كە رۆژی دووشەمە 26ی ئۆكتۆبەری 2020، ئەنجوومەنی ئاسایشی هەرێمی کوردستان رایگەیاند، لە ماوەیەکی کەمی رابردوودا، چەند هێرشێکیان پووچەڵ کردووەتەوە و چەند کەسێکیشیان دەستگیر کردووە، کە پەیوەندییان بە گرووپە تیرۆریستییەکانەوە هەیە. ئاماژەی بۆ ئەوەش کردووە، یەکێك لەو هێرشانەی کە پووچەڵ کراوەتەوە، لەلایەن پەكەكەوە پیلانی بۆ داڕێژراوە.