خراپترین پەرلەمانتاری كورد و بەزمی شوققەكەی بەغدا!
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x
بەرهەم عەلی 26/10/2020

خراپترین پەرلەمانتاری كورد و بەزمی شوققەكەی بەغدا!

ئەو ساڵانەی لە زانكۆی موستەنسڕییە لە بەغدا دەمخوێند، لەگەڵ چەند هاوڕێیەكی كوردی قوتابییمدا، شوقەیەكی سێ ژوورییمان بە كرێ گرتبوو، شەوانە گەلێ جار پێكەوە لەنێو شوقەكە لە ژوورێكدا كۆ دەبووینەوە و گۆرانیمان دەگوت، لە راستیدا كەسمان تێدا نەبوو، دەنگی هێندە ساز و خۆش بێت تا ئەو ئاستەی هەموومان بێدەنگ بین و ئەو گۆرانی بچڕێت! بۆیە هەموو پێكەوە گۆرانیمان دەگوتەوە.

شەوێكیان، برادەرێكی كەمانچەژەنی بەشی موزیكی ئەكادیمیای هونەرە جوانەكانی بەغدا بووە میوانمان، كەمانچەیەكی باشی لەگەڵ خۆیدا هێنابوو تا بەدەم دانیشتنەوە گۆرانی بڵێین و ئەویش كەمانچە بژەنێت، دەمێ هەموو پێكەوە دەستمان بە ستران چڕین كرد، یارۆی میوانمان، گوتی: ”ئاه كە دەنگتان ناخۆشە پێكەوە! تكایە هەوڵ بدەن یەك یەك گۆران بڵێن، تا لەگەڵ مۆزیكدا شتێكی لێ دەربچێت“.

پێشنیارەكەی هاوڕێی میوانمان خستە واری جێبەجێكردنەوە، هەریەكەمان گۆرانییەكمان گوت و ئەم بەدبەختەش بە تەواوی ئیحساسەوە، موزیكی ژەنی لەگەڵ گۆرانیەكانمان، ئیدی نە كەسمان توانیمان هاوریتم لەگەڵ كەمانچەكەی كاكی میوان بڕۆین، نە كەسمان دەنگێكی سازمان هەبوو تا شەوێكی خۆشی سترانئامێز بسازێنین، نە لە دیدی برادەری میوانەوە، كەسمان هی ئەوە بووین شایانی ئەو كەمانچەژەنینە جوانەی ئەو بێت.

یارۆی میوان كە هونەرمەندێكی دەست زێڕین بوو لە ژەنیندا، گوتی: ”بە رای من با ئەمشەو واز لە گۆرانی و مۆزیك بێنین، بۆ خۆمان بەسەرهات و نوكتە و سەربردەی خۆش و كۆمیدی بگێڕینەوە“.. بە كورتییەكەی پێی گوتین: ”قسەكردنمان خۆشترە لە گۆرانی گوتنمان!“.

هەموو لێی هاتینە دەنگ: ”كاكە ئێمە هەشت نۆ كەسین، قابیلە لەم هەموو گەنجە، دەنگی هیچمان ئەوە نەهێنێ پەسنی بكەیت و دەرفەتی هاتنی تۆ نەقۆزینەوە و شەوێكی پڕ گۆرانی و كەیف بەسەر بەرین؟!“. هاوڕێی میوان بە شەرمندەییەوە گوتی: ”ئێوە هەمووتان كوڕی باشن و خۆشم دەوێن، بەڵام پاش ئەوەی بەوردی گوێم لە دەنگی هەمووتان گرت، هیچتان كەڵكی ئەوەتان نییە ئەم دانیشتنە خۆشەی پێ خۆشتر بكەین!“.

ئنجا یەكە یەك كەوتینە پیاهەڵدان بە دەنگی خۆماندا، یەكێك گوتی: ”نا نا هاوڕێ، دەنگی من ئەگەر خۆشیش نەبێ، بەڵام لە دەنگی ئەوان خۆشترە“.. ئەوی تر گوتی: ”هەست دەكەم تۆ تەڕ و وشك پێكەوە دەسووتێنیت، بڕوات بێت، دەنگی ئەوانی تر، هەر هیچ نییە لەچاو دەنگی مندا!“، قوتابییەكی دیكەی هاوماڵمان گوتی: ”هاوڕێ.. كەمێك ویژان باشە، با هەڵسەنگاندنەكەت هونەرمەندانە و دادوەرانە بێت، بە یەك چاو سەیری هەموومان مەكە، قابیلە یەكێكی تا رادەیەك دەنگخۆشمان تێدا نەبێت؟!“...

ئا لەو سەروبەندەدا، یەكێك لە قوتابیەكان، پێشنیارێكی ماقووڵی كرد بۆ كاكی موزیكژەنی میوان، گوتی: ”هاوڕێی ئازیز، تۆ هەم موزیكژەنیت و هەم هونەری ستران و موزیك بە ئەكادیمی دەخوێنیت، بۆچی پێشبڕكێیەكی (هەڵبژاردنی خۆشترین دەنگ) نەكەین لەنێو هەمووماندا؟ تۆ خۆت دادوەر و بڕیاردەر بە، كێت هەڵبژارد وەك خاوەنی (خۆشترین دەنگ)، ئەودەم هەموومان بێدەنگ دەبین، با ئەو لەگەڵ كەمانەكەی تۆدا گۆرانیمان بۆ بڵێت!“.

هاوڕێی میوانمان كە زانی هەموومان حەز بە كەشێكی موزیك و سترانئامێز دەكەین، بە ناچاری پێشنیاری هاوڕێكەمانی پەسەند كرد و پێشبڕكێی دەست پێكرد، یەكەو گۆرانییەكی ترمان گوت، هەموان بەشەوقەوە چاوەڕێی بڕیاری میوانی دادوەر و هونەرمەندمان بووین، ئەویش سەرێكی با
دا و بە شەرمێكی زۆرەوە پێی گوتین: ”نامەوێ موجامەلەی كەستان بكەم، لە راستیدا، دەنگی هەمووتان یەك لە یەك ناخۆشترە، بۆیە پێشنیار دەكەم، ناوی ئەم پێشبڕكێیە بگۆڕین بۆ (هەڵبژاردنی ناخۆشترین دەنگ!).

جا سەرتان نەیەشێنم، لەم رۆژانەدا لەگەڵ هاوڕێیەكمدا لە كافیتریایەك گفتوگۆمان دەكرد و باسی ئەو تاقمە پەرلەمانتارە كوردە! خۆفرۆش و كوردفرۆش و نیشتمانفرۆشەی بەغدامان دەكرد، من گوتم: ”هەموویان وەك یەكن“، هاوڕێكەم گوتی: ”ئەگەر بەراورد و هەڵاوێردێكی وردیان بكەیت، هەندێكیان باشترن لە هەندێكیان!“. منیش لەو ساتەدا پێشبڕكێی (ناخۆشترین دەنگی دانیشتنەكەی شوقەكەی بەغدا)م وەبیر هاتەوە، بە هاوڕێكەمم گوت: ”هاوڕێ گیان، كەسیان باش نین تا بڵێی باشتریان كامەیە، ئەوەتا هەموویان بە كورد و كوردستان و هەرێمی كوردستاندا دەڕشێنەوە! بۆیە وا باشترە بڵێین: ”خراپترین پەرلەمانتاری كوردفرۆش و خۆفرۆش كامیانە؟!“.
هاوڕێكەم بە قاقا لێدانی پێكەنینەوە، پرسی: ”كامیانە؟“..
گوتم: یوسف محەمەد
گوتی: بۆچی؟
گوتم: چونكە لێرە هەر بردی، لەو بەغدایەش هەر خواردی، كوردیش خێری لێ نەدی!