كوردی عربي بادینی
Kurdî English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
×

ئەڤرۆ دێ رێورەسمێن ڤەكرنا گۆرێن بكۆم ل شنگال‌ دەست پێ‌ كەن

ئەندامەكێ‌ دەستەیا ڤەكۆلین و كۆمكرنا بەلگەنامەیان ل پارێزگەها دهوكێ‌ دیار كر كو ئەڤرۆ 24/10/2020ێ‌ رێورەسمێن ڤەكرنا گۆرێن ب كۆم ل گوندێ‌ سولاغ ل قەزا شنگال دێ‌ دەست پێ‌ كەن.

فەلاح حەسەن، ئەندامێ‌ دەستەیا ڤەكۆلین و كۆمكرنا بەلگەنامەیان ل پارێزگەها دهوكێ‌ بۆ (باسنیوز) راگەهاند كو: "پشتی تیمێن ڤەكرنا گۆرێن ب كۆم چووینە شنگال ئەڤرۆ 24/10/2020ێ‌ دێ‌ رێورەسمێن ڤەكرنا گۆرێن ب كۆم دەست پێ‌ كەن. دێ‌ تیمێن ڤەكرنا گۆرێن بكۆم بنە دوو پشك ژوانا ژی دێ‌ تیمەك چیتە گوندێ‌ كۆچۆ، دێ‌ ل سەر ڤەكرنا گۆرەكێ‌ بكۆم كار كەت و تیمەك ژی دێ‌ ل گوندێ‌ سولاغ مینت و دێ‌ ل سەر ڤەكرنا گۆرەكێ‌ ب كۆم ل سولاغ كار كەت، ئانكو ئەڤرۆ كار ل سەر ڤەكرنا دوو گۆرێن ب كۆم دهێتە كرن. بۆ دەمێ‌ 17 رۆژان دێ‌ كار ل سەر ڤەكرنا گۆرێن ب كۆم ل شنگال یێ‌ بەردەوام بیت".

ئاشكەرا كر كو: "تیمێن گۆرێن بكۆم ژوەزارەتا شەهید و ئەنفالكریان ل حكومەتا هەرێما كوردستانێ‌ و دەستەیا ڤەكۆلین و كۆمكرنا بەلگەنامەیان ل دهۆكێ‌ دگەل تیمێ‌ نشتیمانی یێ‌ بەغدا هەموو نۆكە ل شنگالێ‌ نە. پشتی ئەڤرۆ رێورەسم دووماهی‌ دهێن دێ‌ ئێكسەر دەست ب ڤەكرنا گۆرێن بكۆم هێتە كرن".

ل شنگال 80 گۆرێن ب كۆم هەتا نۆكە یێن هاتینە دیتن. سالا 2014ێ‌ ژلایێ‌ تیرۆرستێن داعش ڤە خەلكێ‌ شنگال تێدا هاتینە گولەبارانكرن. بەرێ‌ نۆكە17 گۆرێن ب كۆم یێن هاتینە ڤەكرن. هەتا نۆكە ناسنامەیێن پتر ژ 60 قوربانیێن ناڤ گۆرێن بكۆمدا ئاشكرا بووینە.