ئەنجوومەنی وەزیران پڕۆگرامی خزمەت و کڕینەوەی گەنمی جووتیاران لەلایەن حکومەتی فیدڕاڵی لە ساڵی 2020 تاووتوێ دەکات
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

ئەنجوومەنی وەزیران پڕۆگرامی خزمەت و کڕینەوەی گەنمی جووتیاران لەلایەن حکومەتی فیدڕاڵی لە ساڵی 2020 تاووتوێ دەکات

 

‏‎ئەمڕۆ چوارشەممە 2020/10/21 ئەنجومەنی وەزیرانی هەرێمی کوردستان، بە سەرپەرشتی مەسرور بارزانی سەرۆکی ئەنجوومەنی وەزیران و ئامادەبوونی قوباد تاڵەبانی جێگری سەرۆکی ئەنجوومەن، کۆبوونەوەی هەفتانەی ئاسایی خۆی کرد.

‏‎لە سەرەتای کۆبوونەوەکەدا، سەرۆک وەزیرانی هەرێمی کوردستان، ئاماژەی بە زیادبوونی ژمارەی تووشبووانی پەتای کۆرۆنا لە هەرێمی کوردستان دا بە ئاستێکی مەترسیدار، کە هۆکارە سەرەکییەکەی پابەندنەبوونە بە ڕێکارەکانی خۆپاریزی و رێنمایی تەندروستی. سەرۆک وەزیران، وەزارەتە پەیوەندیدارەکانی ڕاسپارد کە ڕێکارەکانی خۆپارێزیی و ڕێنمایی تەندروستی لە فەرمانگەکانی حکومەت و شوێنە گشتییەکان زیاتر لە بەرچاو بگرن و تووندتر بکەن، بە تایبەتیش کە پێشبینی دەکرێ بە هۆی هاتنی وەرزی زستان و سەرما، شەپۆلێکی دیکەی پەتای کۆرۆنا بڵاوببێتەوە.

‏‎لە‌ بڕگە‌ی یە‌كە‌می كۆبوونە‌وە‌كە‌دا، جێگری سە‌رۆكی ئە‌نجومە‌نی وە‌زیران، راپۆرتێكی لە‌بارە‌ی (پڕۆگرامی خزمە‌ت) خستە‌ڕوو، كە‌ لە‌كابینە‌ی پێشووە‌وە‌ دە‌ست بە‌كارە‌كانی كراوە‌‌، ئاماژە‌ی بە‌وە‌شدا كە‌ ئامانجی ئە‌م پڕۆژە‌یە‌، بریتییە‌ لە‌ باشتركردنی ئاستی ئە‌و خزمە‌تانەی كە‌ دامەزراوە جیاجیاکانی حكومە‌ت، پێشكە‌شی ھاووڵاتیانی دە‌كات بە جۆرێکی ئاسانتر وخێراتر و پێداچوونەوە بەو ڕەسمانەی وەردەگیرێن لەبەرامبەر پێشکەشکردنی ئەو خزمەتانە، بۆ ئە‌وە‌ی گونجاوتر بێت و كە‌مكردنە‌وە‌ی رووتین لە‌ڕێکارەکانی ڕاییکردنی مامەڵە لە دامودە‌زگاكانی حكومە‌ت و گە‌یاندنی زۆرترین زانیاری بە‌ھاووڵاتییان سەبارەت بە خزمەتەکان و پێداویستییەکانی بەجێگەیاندنیان، كە‌ ئە‌مە‌ بە‌شێكە‌ لە‌خزمە‌تی بە‌دیجیتاڵكردنی كاروبارە‌كانی حكومە‌ت.

ھە‌روە‌ھا گوتیشی: مە‌بە‌ستمانە‌ لە‌ڕێی ئە‌م بە‌رنامە‌یە‌وە‌، بە‌باشترین شێوە‌ خزمە‌تی ھاووڵاتییان بكە‌ین لە‌دامودە‌زگاكانمان تا ئە‌و ئاستە‌ی دە‌‌گاتە‌ خزمە‌تی(یە‌ك پە‌نجە‌رە‌یی)ش.

‏‎ھە‌روە‌ھا بڕیاردرا، ھە‌موو وە‌زارە‌ت و دامەزراوە‌كان، لە‌ژێر چاودێری سە‌رۆكایە‌تی ئە‌نجومە‌نی وە‌زیران، پێداچوونە‌وە‌ بكە‌ن بە‌ یاسا ورێنماییەکانیان بۆ ئاسانترکردن وشەفافتر کردن و باشترکردنی کوالێتی پرۆسە و زانیارییەکانی پەیوەندیدار بە خزمەتەکان و پێداچوونە‌وە‌ش بە‌رسوماتی ئە‌و خزمە‌تانە بكرێت‌.

جێگری سە‌رۆك وە‌زیران ئاماژە‌ی بە‌وە‌شدا كە‌ پۆڕتاڵێك ھە‌یە‌ بەناوی پۆڕتاڵی خزمەت‌ https://Services.gov.krd لە‌ڕێی ئە‌م پۆڕتاڵەوە‌‌، ھاووڵاتییان دەتوانن زانیاری لە‌سە‌ر ئە‌و خزمە‌ت و ئە‌و مامە‌ڵە‌یە‌یان دە‌ستبكە‌وێت كە‌ مە‌بە‌ستیانە‌. ئە‌نجوومە‌نی وە‌زیران پاڵپشتی و پشتگیریی خۆی بۆ پە‌رە‌پێدان وجێبە‌جێكردنی ئە‌م پڕۆژە‌یە‌ نیشاندا و پێشنیارەکانیش پەسندکران.

ھەر لەم چوارچێوەیەدا، ئەنجوومەنی وەزیران وەزیری بازرگانی و پیشەسازی ڕاسپارد لە ڕێگای بەڕێوەبەرایەتی گشتی تۆماری کۆمپانیاکان ئاسانکاریی بۆ تۆماری لقی براندە نێودەوڵەتییەکان لە ھەرێمی کوردستان بکەن بۆ ھاندانی کەرتی تایبەتی بیانی تا بەشداری لە بووژاندنەوەی بازاڕ و ئابووری ھەرێمی کوردستان بکەن، دوور لە ڕووتین و لابردنی ئاستەنگەکانی بەردەم تۆماری لقی کۆمپانیا باوەڕپێکراوە جیھانیيەکان لە ھەرێم.

لە بڕگەی دووەمدا، کەمال موسلیم وەزیری بازرگانی و پیشەسازی، ڕاپۆرتێکی سەبارەت کێشە و گرفت و ئاستەنگەکانی کڕینەوەی گەنمی جووتیارانی هەرێمی کوردستان لە ساڵی 2020 لەلایەن حکومەتی فیدراڵییەوە خستەڕوو. ئەنجوومەنی وەزیران وەزارەتی دارایی و ئابووری و سەرۆکایەتی دیوانی ئەنجوومەنی وەزیران بۆ کاری پێویست ڕاسپارد لەو بارەیەوە.

لە بڕگەی کۆتایی کۆبوونەوەکەدا ، بێگەرد تاڵەبانی وەزیری کشتوکاڵی و سەرچاوەکانی ئاو، پێشنیارێکی خستەڕوو بۆ لێخۆشبوونی گومرگی بۆ هەندێک ماددەی سەرەتایی کە لە دەرەوەی ھەرێمەوە ھاوردە دەکرێن بۆ پڕۆژە کشتوکاڵییەکان کە لەناوخۆدا بەرهەم نایەت، و ھەروەھا لێخۆشبوونی هاوردەکردنی ئامێری کشتوکاڵیی پێشکەوتوو لە ڕەسمی گومرگی بۆ ئەو کۆمپانیا تایبەتمەندانەی کە ئامادەن ئەو ئامێرانە هاوردە بکەن و بە مەرجی ئاسان و بە شێوازی قیست بۆ جووتیارانی ڕاستەقینە دابین بکرێن.

دوای گفتوگۆ ئەنجوومەنی وەزیران لە چوارچێوەی ھێڵە گشتییەکانی کارنامەی کابینەی نۆیەم، ڕەزامەندی دا لەسەر پێشنیارەکانی وەزارەتی کشتوکاڵ و سەرچاوەکانی ئاو بۆ پشتگیریی جووتیاران و پڕۆژە کشتوکاڵییەکان، لەم پێناوەشدا هەردوو وەزارەتی دارایی و ئابووری و ناوخۆی ڕاسپارد بە ھەماھەنگیی لەگەڵ وەزارەتی کشتوکاڵ و سەرچاوەکانی ئاو، کاری پێویست ئەنجام بدەن، لە ھەمانکاتدا ئەنجوومەنی وەزیران، بە گرنگی زانی کە پشتیگریی پیشەسازی کشتوکاڵیی بکرێت و هانی کەرتی تایبەت بدرێت بۆ دامەزراندنی بەرھەمھێنانی ئەو پێداویستیانە لە ناو ھەرێم لە جیاتی هاوردەکردنیان، وەک بنەمایەک بۆ دابینکردنی ئاسایشی خۆراک.