پەرلەمانتارانی سەڵاحەدین: چەکدارانی حەشدی شەعبی کارەساتەکەی بەلەدیان دروست کرد
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

پەرلەمانتارانی سەڵاحەدین: چەکدارانی حەشدی شەعبی کارەساتەکەی بەلەدیان دروست کرد

پەرلەمانتارانی سنووری پارێزگای سەڵاحەدین دوای کارەساتەکەی شارۆچکەی بەلەد، داوایەک ئاراستەی دەستەی میلیشیاکانی حەشدی شەعبی دەکەن.

رۆژی شەممە 17-10-2020، ژمارەیەک چەکدار هەشت هاووڵاتیی عێراقییان لە ناوچەی فەرحاتییە لە شارۆچکەی بەلەد لە پارێزگای سەڵاحەدین، گوللەباران کرد.

دوای رووداوەکە، ژمارەیەک نوێنەری سەڵاحەدین لە پەرلەمانی عێراق داوایان لە حکوومەتی عێراق کرد لێکۆڵینەوە لەو رووداوە بکات و تاوانباران رادەستی یاسا بکات.

پەرلەمانتارانی سەڵاحەدین داواشیان کردووە لە ماوەی 72 کاتژمێردا ئەنجامی لێکۆڵینەوە لە کارەساتەکە ئاشکرا بکرێ، ”ئەگەرنا هەموو بژارەیەک لەبەردەممان کراوە دەبێ بۆ وەرگرتنی هەڵوێستی سیاسی و یاسایی“.

ئەو پەرلەمانتارانە چەکدارانی سەر بە حەشدی شەعبی بە گوللەبارانکردنی ئەو هاووڵاتییانە تاوانبار دەکەن و داوا لە دەستەی ئەو میلیشیایانە دەکەن، خۆی لەو گرووپە چەکدارییە بێبەری بکات.

بۆ لە نزیکەوە لێکۆڵینەوە لە رووداوەکە، ئەمڕۆ یەکشەممە 18-10-2020، مستەفا کازمی، سەرۆک وەزیرانی عێراق بە یاوەریی وەزیرانی ناوخۆ و بەرگری و سەرۆکی دەستەی حەشدی شەعبی سەردانی ناوچەکەیان کردووە.

هەروەها پارێزگای سەڵاحەدین لەمڕۆ یەکشەممەوە سێ رۆژ ماتەمی بۆ قوربانییانی رووداوەکە، لە سەرتاسەری پارێزگاکە، راگەیاندووە.