ئەنجوومەنی سەركردایەتیی كەركووك - گەرمیانی پارتی دیموكراتی كوردستان ڕاگەیەندراوێکی بڵاوکردەوە
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

ئەنجوومەنی سەركردایەتیی كەركووك - گەرمیانی پارتی دیموكراتی كوردستان ڕاگەیەندراوێکی بڵاوکردەوە

"ئەوەی ئەمڕۆ لە بەغدا ڕوویدا بە شێوەیەكی ھەڕەمەكی ڕووی نەداوە و خۆڕسکیش نەبووە"

لە راگەیەندراوێکدا کە ئێوارەی ئەمڕۆ بڵاوکرایەوە، ئەنجوومەنی سەرکردایەتیی کەرکووک - گەرمیانی پارتی دیموکراتی کوردستان وێڕای ئیدانەکردنی سووتاندنی ئاڵای کوردستان و بارەگای لقی ٥ی حزبەکە لە بەغدا رایدەگەیەنێ کە ئەو ڕەفتارانە بە شێوەیەكی ھەڕەمەكی ڕوویان نەداوە ، بەشێوەیەكی خۆڕسكیش نەبوونە.

لە راگەیەندراوەکەدا کە وێنەیەکی بۆ(باسنیوز) نێردراوە هاتووە "بەتوندی سەركۆنەی ئەو ڕەفتارە ملھوڕانەیە دەكەین كە لە بەغدا دژ بە ئاڵای كوردستان و، بە سیمبوڵی سەدان ساڵ لە خەبات و قوربانیدانی گەلی كوردستان کرا . ئەوە بوو ئەمڕۆ تاقمێكی گومڕا بارەگای لقی پێنجی پارتی دیموكراتی كوردستان و وێنەی ڕەمزی کوردستانیان لە بەغدا سووتاند".

ئەنجوومەنی سەركردایەتیی كەركووك - گەرمیانی پارتی دیموكراتی كوردستان راشیگەیاندووە "ئەم ڕەفتارانە بە شێوەیەكی ھەڕەمەكی ڕوویان نەداوە و، بەشێوەیەكی خۆڕسكیش نەبوون، بگرە ئەنجامی ڕوونی ھەڵمەتێكی شێلگیرانەی دژ بە كوردە كە لە بەغدا بەڕێوە دەچێت و، چەند ھێزێكی كەم بەڕێوەی دەبەن و بەپێی ئەجیندایەك كە ھەوڵ دەدەن بیشارنەوە بەڵام لەلای ئێمە ڕوون و ئاشكران".

لە راگەیەندراوەکەدا جەختیش کراوەتەوە "ئەم جۆرە ڕەفتارە ناكامانە ناتوانن خۆیان لە قەرەی كەرامەت و پیرۆزیی ئاڵای كوردستان و ڕەمزی کوردستان و گەلی كوردستان بدەن".

لە بەشی کۆتایی راگەیەندراوەکەدا هاتووە "ئاستی ئەو ئاوەدانی و پێشكەوتن و گەشەكردنەی بە بازووی ھاووڵاتییانمان لە ھەرێمی كوردستاندا ھاتوونەتە دی بەڵگە و گەواھیدەری ئەوەن ئێمە گەلێكی خاوەن شارستانییەتی قووڵ و ڕەگداكوتاوین. ئەو وێرانكاری و كۆنەپەرستییەشی ئێوە ھۆكاریان بوون لە شارەكەنی دیكەی عێراقدا بەڵگەن لەسەر ئاستی داڕمانی شارستانی و بەھاكانی ئێوەن".