سێ کەس بۆ ڕکابەریی ئەردۆغان كاندیدی بەهێزی ئۆپۆزیسیۆنن
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

سێ کەس بۆ ڕکابەریی ئەردۆغان كاندیدی بەهێزی ئۆپۆزیسیۆنن

هەر دوای ئەوەی لە هەڵبژاردنی شارەوانییەكانی ٣١ی٣ی٢٠١٩ ئۆپۆزیسیۆن توانی سەرۆكی شارەوانیی شارە گەورەكانی توركیا بباتەوە، بۆ یەكەمجار دوای ١٨ ساڵ ئاكەپە پاشەكشەی پێ كرا، ئیدی لەناو پارتە ئۆپۆزیسیۆنەكانی توركیا باس لە كاندیدێك كرا بۆ ئەوەی لە هەڵبژاردنی داهاتووی سەرۆكایەتیی توركیا ببێتە ڕكابەری رەجەب تەییب ئەردۆغان.

 شرۆڤەكاران ناوی چەند سێ كەسیان ئاشكرا كردووە كە ئەگەری زۆرە یەكێك لەوانە ببێتە ركابەری ئەردۆغان.

ئەكرەم ئیمامئۆغلۆ سەرۆكی شارەوانیی ئیستانبۆڵ، یەكێكە لەو كەسایەتییانەی لەلایەن ئیستەنبۆڵییەكان و ئۆپۆزیسیۆن قبووڵ كراوە، دوای ئەو سەركەوتنە گەورەیەی لە هەڵبژاردنی شارەوانییەكان بەسەر ئاكەپەش، ئیمامئۆغلۆ لە ناوچەییەوە تێپەڕی و بووە كەسایەتییەكی ناسراوی جیهانی و میدیا جیهانییەكان فۆكسیان خستە سەری.

زۆرێك لە ئاژانس و میدیا جیهانییەكان، كۆك بوون لەسەر ئەوەی ئیمامئۆغلۆ دەبێتە ركابەری ئەردۆغان و هەموو پارتە ئۆپۆزیسیۆنەكانیش قبووڵیانە، بەتایبەت جەهەپە و پارتی باش و هەدەپە و پارتی سەعادەت.

بەڵام كەمال كلیچدارئۆغلۆ سەرۆكی جەهەپە، مەیلی زیاتر بۆ مەنسوور یاڤاش سەرۆكی شارەوانیی ئەنقەرەیە و پێی باشە بۆ هەڵبژاردنی داهاتووی سەرۆكایەتیی توركیا ئەو كاندیدی ئۆپۆزیسیۆن بێت، ئەمەش لە كۆبوونەوەیەكی نهێنیی پارتەكەی باس كردبوو.

جەهەپە لەناو خۆیدا كۆمەڵێك كێشەی بۆ دروست بوو، ئەویش بەهۆی جانان كەفتانجیئۆغلۆ سەرۆكی لقی جەهەپە لە ئیستەنبۆڵ، كاتێك وشەی ئەتاتوركی بە شێوەیەكی خراپ بەكار هێنابوو و پاشان لەلایەن بەشێكی جەهەپەییەكان داوا كرا دەربكرێت. بەهۆی ئەوەی جانان رۆڵێكی سەرەكی لە دەرچوونی ئیمامئۆغلۆ وەكوو سەرۆكی شارەوانیی ئیستەنبۆڵ هەبووە، بۆیە بەشێكی تری ناو جەهەپە دژی بۆچوونی یەكەم وەستانەوە، بەمەش كێشە ناوەخۆییەكانی جەهەپە تەشەنەی كرد و بووە باسوخواسی میدیاكان.

رۆژنامەی (سۆزجو) لەمبارەوە بڵاوی كردووەتەوە، كلیچدارئۆغلۆ نایەوێت ئیمامئۆغلۆ ببێتە كاندیدی ئۆپۆزیسیۆن، چونكە ئەو پشتگیری لە جانان كرد و تا ئاستێكیش گوێڕایەڵی سەركردایەتیی جەهەپە نییە و خۆی پێ لەوان گەورەترە.

هەروەها چەند نووسەرێكی تری توركیاش پێیانوایە، ئەگەر ئیمامئۆغلۆ ببێتە كاندیدی ئۆپۆزیسیۆن، ئەگەر زۆرە سەركەوتن بەسەر ئەردۆغاندا بەدەست بهێنێت، ئەوكات جێ بە كلیچدارئۆغلۆش لەق دەكات، چونكە ئیمامئۆغلۆ وەكوو سەركردەكانی تر نییە و چاوی لە پۆستی باڵایە.

خۆ ئەگەر سەركەوتن بەسەر ئەردۆغانیشدا نەهێنێت، بەڵام ئەگەر توانی ٤٠٪ی دەنگەكان بەدەست بهێنێت، ئەمە بۆ ئیمامئۆغلۆ سەركەوتنە و دوور نییە وەكوو موحەرەم ئینجە كاندیدی جەهەپە و پارتی باش بۆ هەڵبژاردنی سەرۆكایەتی ٢٠١٨، كە ٣٦٪ی دەنگەكانی بەدەست هێنا و پاشان داوای كرد ببێتە سەرۆكی جەهەپە و بە كلیچدارئۆغلۆی گوت ئەو پۆستە شایەنی منە.

رەنگە زۆرێك وا بیر بكەنەوە، كە جارێ زووە باس لە كاندیدی ئۆپۆزیسیۆن بكرێت بۆ هەڵبژاردنی داهاتووی توركیا، چونكە هەڵبژاردنی سەرۆكایەتی و پەرلەمانی لە ٢٠٢٣ ئەنجام دەدرێت. بەڵام ڕاستییەكەی شتێكی ترە، ئەویش چوونی توركیایە بۆ هەڵبژاردنی پێشوەختە، واتە ئۆپۆزیسیۆن لە ئێستاوە كار دەكات بۆ دیاریكردنی كاندیدێكی بەهێز بۆ ركابەری ئەرۆدغان لە ئەگەری ئەنجامدانی هەڵبژاردنی پێشوەختە.

بە گوێرەی زانیارییەكانی عەبدولقادر سەلفی ڕۆژنامەنووسی نزیك لە ڕەجەب تەیب ئەرۆدغان، جەهەپە و پارتی باش رێك كەوتوون لەسەر ئەوەی عەلی باباجان سەرۆكی پارتی دەوا بكەنە كاندیدی خۆیان بۆ هەڵبژاردنی سەرۆكایەتی، چونكە كەسایەتییەكە پێشتر جێگری سەرۆكوەزیران بووە، هەروەها وەزیری دارایی بووە و سەركەوتنی بەدەست هێناوە لەو پۆستە و لە لایەن خەڵكیشەوە خۆشەویستە، جگە لەوەش كەسایەتییەكی موحافیزكارە و دەتوانن لەو رێگەیەوە دەنگی موحافیزكارەكانیش رابكێشن.

دەنگدەری باكووریش، بەتایبەت موحافیزكارەكان تا ئاستێك دەیانەوێت بەدیلێك بۆ ئەردۆغان بدۆزنەوە، چونكە بەهۆی ئەو توندییەی بەرامبەر بە كورد هەیەتی لێی تووڕەن و نایانەوێت جارێكی تر دەنگی پێ بدەنەوە، بۆیە باباجانیش زوو زوو دەچێتە باكوور و لەوێ میتینگی جەماوەری ئەنجام دەدات و بەڵێنی چارەسەركردنی كێشەی كوردیش دەدات.

ركابەری ئەرۆدغان لە هەڵبژاردنی داهاتووی توركیا لە ٣ كەس تێپەڕ ناكات، ئەوانیش (ئەكرەم ئیمامئۆغڵو، مەنسوور یاڤاش، عەلی باباجان).