ئاینده‌مان.. فیلی بن مێز!
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

 

به‌رله‌وه‌ی سه‌رۆكی ئه‌مەریكا درێژكردنه‌وه‌ی واده‌ی رێككه‌وتننامه‌ له‌گه‌ڵ تۆركیا واژۆ بكات، هه‌ڵبه‌ت سه‌باره‌ت به‌ راگرتنی شه‌ڕ و درێژەپێدانی به‌ره‌و قووڵایی، پێمان وابوو رێككه‌وتننامه‌كه‌ گشتییه‌ و تا رۆژی په‌سڵان به‌رده‌وام ده‌بێت. كه‌س نه‌یده‌زانی رێككه‌وتننامه‌كه‌ ته‌نیا بۆ یه‌ك ساڵه‌، ده‌شكرێت درێژ بكرێته‌وه‌. لێره‌دا مه‌به‌ستمان رێككه‌وتننامه‌ی رێگەدان به‌ توركیایە بۆ چوونه‌ نێو خاكی كوردستانی رۆژاڤا (باكووری رۆژهه‌ڵاتی سووریا).

به‌ هه‌رحاڵ، گه‌لێك شت له‌پشتی په‌رده‌وه‌ سه‌باره‌ت به‌ چاره‌نووسی ئێمه‌ ده‌كرێت، ئێمه‌ش له‌م رووه‌وه‌ بێ ئاگاین، وه‌ك مه‌حموودی بێ زه‌واڵ.

به‌ر له‌ چه‌ند رۆژێك خه‌ڵك لێره‌ له‌ كوردستانی سووریا، له‌نێو نیگه‌رانییه‌كی زۆردا بوون، سه‌رچاوه‌ی ئه‌و نیگه‌رانییه‌ش هه‌ڕه‌شه‌ی دووباره‌ هێرشكردنه‌وه‌ی سه‌ر ناوچه‌كه‌مان بوو له‌لایه‌ن توركیاوه‌، توركیا گوتی ئه‌و به‌ ته‌نیا و سه‌ربه‌خۆ ئه‌ركی پاراستنی ئارامیی سنووره‌كه‌ی ده‌گرێته‌ ئه‌ستۆ، ئه‌ویش له‌ رێی كۆنترۆڵكردنی پشتێنه‌ی سنوور، ئایا جیهان به‌وه‌ ده‌زانێت، كه‌ پشتێنه‌ی سنوور واته‌ به‌ته‌واوی كۆنترۆڵكردنی كوردستانی سووریا؟ ئه‌مه‌ش واته‌ شێوه‌یه‌ك له‌ شێوه‌كانی جینۆساید.

هه‌ڵبه‌ت، قسه‌كه‌ی سه‌رۆكی ئه‌مەریكا دوو دیوی هه‌یه‌، یه‌ك ئه‌رێنی، ئه‌وی دیكه‌ش نه‌رێنی.
ئه‌رێنییه‌كه‌ی ئه‌وه‌یه‌، خه‌ڵك ئیدی ئاهێكی وه‌به‌ردا هاته‌وه‌، بۆ ماوه‌ی ساڵێكی دی بێ خه‌م ده‌بنه‌وه‌، خاڵێكی دیكه‌ی ئه‌رێنی ئه‌وه‌یه كه‌ ئه‌و ناوچانه‌ی كه‌وتوونه‌ته‌ ژێر ده‌سه‌ڵاتی توركیا، واتای ئه‌وه‌ نییه‌ بۆ كاتێكی نادیار له‌ژێر ده‌سه‌ڵاتی ئه‌ودا ده‌مێننه‌وه‌، وه‌ك چۆن رێككه‌وتنێكی ماوه‌ دیاریكراو هه‌یه‌، ئه‌وا مانه‌وه‌ی توركیاش له‌و ناوچه‌یه‌دا بۆ ماوه‌یه‌كی دیاریكراوه‌، ئیدی با خه‌ڵكی سه‌رێ كانی و گرێ سپی خۆشی و شادییان بێت، كه‌ به‌ ده‌ستێكی سپی ناوچه‌كانیان راده‌ستی توركیا نه‌كراون.

لایه‌نی نه‌رێنیش ئه‌وه‌یه‌، جۆرێك له‌ سیاسه‌تی چاوپۆشین له‌ لایه‌ن (فیلی ژێر مێز)ه‌كه‌وه‌ هه‌یه‌، واته‌ شته‌كان له‌پشتی په‌رده‌وه‌ن، خۆ ئه‌گه‌ر فیله‌كه‌ ببزوێت، ئه‌وا ئه‌گه‌ر هه‌یه‌ مێزه‌كه‌ سه‌راوژێر بێت، خۆ ره‌نگه‌ ئه‌مه‌ش ئاكامی خراپی هه‌بێت. بێ له‌وه‌ش، خۆ ساڵێك بۆ خه‌ڵكی سووریا هێنده‌ زۆر نییه‌، ره‌نگه‌ هه‌ر زوو بگه‌ینه‌ كۆتاییه‌كه‌ی، ئیدی ره‌نگه‌ جارێكی دی گه‌ف و هه‌ڕه‌شه‌ ئاماده‌ بێته‌وه‌.
هه‌ڵبه‌ت له‌نێوان هه‌ردوو لایه‌نی ئه‌رێنی و نه‌رێنی، دوو كاری گرنگ هه‌ن، كه‌ ره‌نگه‌ جۆرێك له‌ گه‌شبینی بەخۆوه‌ بنوێنن.

یه‌كه‌م: ره‌نگه‌ گۆڕان به‌سه‌ر ده‌رهاویشته‌ی سیاسی و به‌رژه‌وه‌ندیدا بێت، ره‌نگه‌ ره‌وشی توركیاش دوای ساڵێك وه‌ك ئێستا نه‌مێنێته‌وه‌، خۆ ره‌نگه‌ ئاماده‌بوونی ده‌ستی توركیا له‌ چه‌ندین وڵاتدا ره‌نگدانه‌وه‌ی نه‌رێنیی بۆ تێكڕای دۆخی توركیا هه‌بێت، پاشان درێژه‌دانێكی گشتی، واته‌ بوارێك بۆ هیوا، ره‌وشه‌كه‌ ئارامتر و جێگیرتر ده‌بێت، جگه‌ له‌وه‌ی ره‌نگه‌ ره‌وشی سووریا به‌ گشتی بگۆڕێت.

لایه‌نێكی دیكه‌، كه‌ مایه‌ی گه‌شبینییه‌، یه‌كه‌مین جاره‌ ئه‌مەریكا به‌ روونی باس له‌ رۆڵی نه‌رێنیی توركیا له‌ ناوچه‌كه‌دا ده‌كات، ئه‌مەریكا گوتی ئه‌و رۆڵه‌ی توركیا هه‌یه‌تی كار له‌ سیاسه‌تی ده‌ره‌وه‌ی ئه‌مەریكا ده‌كات، سیاسه‌تی ده‌ره‌وه‌ش به‌گوێره‌ی سیاسه‌تناسی، واته‌ به‌رژه‌وه‌ندیی ئه‌مەریكا له‌ ده‌ره‌وه‌.

ماوه‌ته‌وه‌ بڵێین، ته‌نانه‌ت ئه‌گه‌ر (فیله‌كه‌ له‌بن مێز)یشدا بمێنێته‌وه‌، ئه‌وا ره‌وشه‌كه‌ به‌ره‌و جێگیری ده‌ڕوات، ره‌نگه‌ فیله‌كه‌ به‌بێ ئه‌وه‌ی مێزه‌كه‌ سه‌ره‌وژێر بێت، به‌هێواشی خۆی بكێشێته‌وه‌، ئیدی ره‌نگه‌ ئه‌م ره‌وشه‌ چاوه‌ڕوانكراوه‌ دۆخی سیاسیی كورد بخاته‌ به‌رده‌م ئه‌ركێكه‌وه‌، كه‌ به‌ چ شێوه‌یه‌ك ره‌وشی نوێ گه‌ڵاڵه‌ بكات و له‌ رووی سیاسییشه‌وه‌ كاراتر بێت، هه‌روه‌ها به‌شداریكردنێكی نوێی هه‌بێت له‌ پرۆسه‌ی سیاسی له‌ ئاستی ناوخۆی كورد و سووریا، به‌تایبه‌ت په‌یوه‌ست به‌ ژنێف.

پێویسته‌ كورد شێوه‌ی كاركردنی بگۆڕێت، تا جیهان روانینی خۆی ده‌رهه‌ق به‌ ئه‌و بگۆڕێت.
ئیدی ئه‌م په‌رته‌وازه‌یی و سستیی سیاسییه‌ به‌سه‌، كاتی ئه‌وه‌یه‌ كارا بن.