ئەرێ شەجەریان دەمرێ؟
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

ئەرێ شەجەریان دەمرێ؟

 

پێم سەیرەو زۆریش سەیرەباسی مردنی تۆ دەکرێت! ئاخر جوانی چۆن دەمرێ؟ تۆیەک کەهەموومانت کرده بەشێک لەخۆت و تۆیەک کە شیعر و ئاوازودەنگ و بەهار و باران وپەلکەزیڕینەت کردە تاجی هەزار ڕەنگی سەری خۆت؟ تۆ چۆن دەمری کە کەزی حەوت یارت بۆسیامەندی سیپان و قوڵنگت بۆ فەرهادی بێستون و نامەی بەڵقیست بۆسلێمان دەبرد؟

سەبووری ڕۆحی غەریبان، مردنی چی؟ تۆکە سوکناییت گەورە کچانی سەربەرماڵ دەداو وشکەسۆفیت فێری عەشق دەکرد و دەتەویست حیکایەت و بەسەرهاتی هەموو عاشقە دڵشکاوەکان بگەیێنیت بەگۆڤەند و کەژاوەی زەماوەندی بەیەک گەیشتن.

تۆفێرت کردین نەلەڕۆژ چرا دابگیرسێنین نەلەبەردەم گەمژە هونەربنوێنین، فێرت کردین بەساڵا چوون نزیک بوونەوە نییە لە مردن بەڵکو مردنی ڕاستەقینە گۆشەگیرییە لە هونەر.

شەجەریان ساداتی جوانی تۆپێت گوتین ئێران وڵاتی هونەرە؟ وڵاتی موعین و هایدە و گوگش و زیرەک و ماملێ و مەزهەری خاڵقییە، نەک وڵاتی داخرانی فیکری و سیاسیی و ئایدۆلۆژیا لەقالبدراوەکان، وڵاتی حافز و شامڵۆ و فروغ و هێمن و هەژار و سوارەشە نەک بەتەنیا وڵاتی ڕاوەدوونان، تۆنامری ئەی شای جوانی، تۆ کەدەنگت هاژەی چەم بۆنی گوڵ و نێرگزی پرچ زەرد و نەغمەی بولبول و چریکە نەورەس و سەمای عەرعەر و کەروێشکەی گوڵەگەنم و نمەی باران و ئاوەدانی کۆڕی یاران بێ چۆن دەمرێ؟ بەڵام دەشزانم دوای تۆ تەنیا دەبین، بەڵام کێ دەڵێت دوای تۆ تەنیاییش قبوڵمان دەکات.