ل پارێزگهها دهۆكێ، ل دهستپێكا هاتنا پهتایا كۆرۆنایێ و تا وى ئاستى نهخۆش ب وهرگرتنا چارهسهریان، چارهسهر ببن، ئاستێ پێشكێشكرنا پلازما خوینێ ب نزم و خاڤ دهات دیتن، لێ نها دا وهكه رێڤهبهریا بهنكا خوینێ دیار دكهت خهلك باشتر دهێت پلازمایێ پێشكێش دكهن.
عادل سلێمان، رێڤهبهرێ بهنكا خوینێ ل دهۆكێ بۆ (باسنیوز) دیاركر: "ل دهستپێكا هاتنا پهتایا كۆرۆنایێ و پشتى چهندین كهس ب وهرگرتنا چارهسهریێن نۆژدارى چارهسهر بووین، هژمارا وان كهسان ئهوێن پلازما خوینێ پێشكێش دكر زۆر یا كێم بوو. زۆر جار مه گازى و ههوار دكر لێ دوماهیێ ئهم بۆ چهندین جاران پێتڤى ب ساخلهمیا ههولێرێ بووین تا كۆ ئهوان بۆ مه پلازما هنارتى و مه پێشكێشى نهخۆشان كرى، لێ نها دا رهوش باشتره و خهلك باشتر قهستا مه دكهن بۆ پێشكێشكرنا پلازما خۆینێ".
رێڤهبهرێ بهنكا خوینێ ل دهۆكێ بۆ (باسنیوز) دۆپات ژى كر: "100 بۆتلێن پلازمایێ ژ ساخلهمیا پارێزگهها ههولێرێ بۆ مه هاتبوونه هنارتن و نها دا كێشانا پلازمایێ ل دهۆكێ بهردهوامه".
گۆت ژى: "رۆژانه ئهو كهسێن ژ پهتایا كۆرۆنایێ چارهسهر بووین، قهستا مه دكهن بۆ دانا پلازمایێ و تا نۆكه ل دهۆكێ 450 كهسان پلازما خوینێ پێشكێش كریه و ههلبهت ئهڤه كاره مرۆڤایهتى و نیشتیمانى یه و دخازین ههر نهخۆشهكێ ژ كۆرۆنایێ چارهسهر ببیت، قهستا مه بكهت بۆ دانا پلازمایێ چونكه پلازما ههر كهسهكێ شیان ههنه بۆ 3 نهخۆشان بهێته بكار ئینان".