مووچە و مووشەك
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

ئەو ئیرهابە فیكرییەی لە سلێمانی ساڵانێكی زۆرە بەرقەرارە، ئەو دۆخە سیاسییە (نامۆ بە سلێمانییە)ی لەو شارە خولقێنراوە، جموجۆڵ و هەڵوێستە موزەیەفەكانی ئەو كەمپینچییانەی سلێمانی كە هەر كاتێ دێنە سەر شەقاكەكانی ئەو شارە و چەند وەرەقەیەكی ئەی فۆڕ دژی پارتی یان حكوومەت بەرز دەكەنەوە، من پێكەنینم پێیان دێت و پێیان دەڵێم: ”بۆ حەلاوی باس كەن!“، ئەمانە هەموو پێكەوە كارێكی وەهایان كردووە، كە پرس و باسی هەستی نەتەوەیی و خۆشویستنی كودستان و لە خەمابوونی خاك و خەڵكی كوردستان، لەو شارەدا ببێتە عەیبە و عەنتیكە و نامۆ! لەكاتێكدا سلێمانی یەكێك بووە لە شارە سەرتۆپەكانی پێشدەستیی كوردایەتی و كوردستانیبوون.

دەزانم زۆرینەی خەڵكی نیشتمانپەرەوەر و دڵسۆزانی شار، هیچ حسابێك بۆ ئەو بەشەرانە ناكەن و ئەوان نوێنەری ئەو شارە نیین، بەڵام خەمەكە ئەوەیە ئەوانە نەزعەیەكی ناشرین و ناشییاوی شارچێتییان لەنێو نەوەی تازەدا پەرە پێداوە، كە كارێكیان كردووە، وای پیشان بدەن كە هەڵوێستی گرنگ ئەوەیە تۆ چاو لە هەموو رووداو و تاوان و گەندەڵییەكانی ناو شاری خۆت بنوقێنیت و رووداوە ناجۆرەكان و دیاردە دزێوەكانی دەرەوەی سلێمانی گەورە بكەیت، هەروەك چەند رۆژێك لەمەوبەر، رۆژنامەنووس (بەهرۆز جەعفەر) لەسەر سكاڵای سەركۆمار لە سلێمانی زیندانا بوو و دنیای لێ هاتە دەنگ، كەچی ئەو كەمپینچییە كۆلكە خوێندەوارانە لەو شارەدا، هیچ هەڵوێست و گردبوونەوەیەكیان لێ نەوەشایەوە، لێ بۆ بچووكترین رووداو لە هەولێر و دهۆك و ناوچەكانی تر، دەنگی ناسازیان بەرز دەكەنەوە.

پرسیارێكی زۆر گرنگ بۆ كەمپینچییان: ئەگەر ئێوە، هێندە لە خەمی خەڵكی هەولێر و دهۆكدان، بۆچی مەردێكتان تیا نەبوو، بە دوو وشە، سەركۆنەی ئەو هێرشە مووشەكیە بكات كە دوێنێ شەو، لە ناوچەكانی ژێر دەسەڵاتی حەشدی شەعبیەوە، ئاراستەی هەولێر كران؟

پرسیارێكی تر: ئەرێ كاتێ ئەو كەركووكە مەزنە، بە خیانەت رادەستی حەشدی شەعبی كرا، بە خاك و خەڵكیەوە، ئێوە لە كوێ بوون؟ كاتێ دوای خیانەتی ١٦ی ئۆكتۆبەر، خەڵكی ئاوارەی خورماتوو لە شەقامێكی گشتیی سلێمانی خۆپیشاندانیان كرد و بە زبری چەك و هێز بڵاوەیان پێ كرا، بۆچی پیاوێكی مەردتان تیا نەبوو پشتیوانیی خەڵكی خورماتوو بكات، هیچ نەبێ بە نووسینێك؟

ئەو ئیرهابە فكرییە و بزاڤی موسەییەری كەمپینچییانی سلێمانی، رەوشەكەی ئەو شارەیان گەیاندووەتە ئاستێك، خەڵكێك لەو شارەوە، جورئەتی ئەوە بكات بە دەنگی دلێر بڵێت: ”با هەرێمی كوردستان - كە قەوارەیەكی دانپێدانراوی فیدراڵی و یاسایی و دەستوورییە - هەڵبوەشێتەوە“! ئەگەر جاران لە سلێمانی كەسێك لەنێو شەقامی ئەو شارەدا، قسەیەكی وەهای بكردایە، (دوور لە ڕووی خوێنەرانی ئازیز) هەر رێبوارێكی شەقام و بازاڕ، یەكەو تاكێ پێڵاویان دەخستە دەمیەوە!

ئەمانە بە وتارە پۆپۆلیستییەكانیان، دۆخێكی وەهایان لە شاری هەڵمەت و قوربانیدا خولقاندووە، پەرلەمانتارێكی هەرزەی وەك سەركەوت شەمسەدین، بە دەنگی دلێرەوە داوا لە حكوومەتی عێراق بكات: ”هێز لە دژی هەرێمی كوردستان بجووڵێنێت“، گەر زەبری ئەو ئیرهابە فكرییە و هەڵمەتی چەواشەكاریی كەمپینچییان نەبوایە، خەڵكانی وەكوو سەركەوت شەمسەدین و وشیار عەبدوڵا و یوسف محەمەد و ئەحمەدی حاجی رەشید و كاوە محەمەد و غالب محەمەد، هەر رۆژێك لە بەغداوە بگەڕانایەتەوە بۆ سلێمانی، خەڵكی نیشتمانپەروەری ئەو شارە، خۆیان و ماڵەكانیشیشان بەردباران دەكردن و لە بازاڕیشدا پێڵاوبارانیان دەكردن، هەر بە شەق دەریان دەكردن و دەیانناردنەوە بۆ بەغداكەی خۆیان!

ئەوە ئەو ئیرهابە فكرییەیە وای كردووە، پەرلەمانتێرێكی (كوردی!) وەكوو رێبوار كەریم لە بەغدا، بەبێ شەرم ئیمزا لەنێو هاووڵاتیانی سلێمانیدا كۆ بكاتەوە، تا مووچەیان بچێتەوە سەر حكوومەتی عێراق و ئیدی حكوومەتی هەرێمی كوردستان - كە ئەو هەموو رەنج و خوێن و قوربانی و شەهیدانەی لەپێناودا دراوە، نەمێنێت-. فەرموو كاك رێبوار ئەوە ئێستا حكوومەتی عێراقیش كەوتۆتە دۆخێكەوە، بە ئاستەم مووچەی پێ دەدرێ یان نادرێ! بزانم ئەو شەكرەی شكاندت و ئەو قسە قۆڕانەی دەتكردن لەپشت مایكەكانەوە، بە چیمان دەگەیەنێت؟ فەرموو كاك رێبوار ئەوە لای حەشدی شەعبییەوە مووشەكبارانی هەولێری پایەتەختی هەرێمەكەت دەكرێ، بزانم هەڵوێستت چییە؟ ئەگەر تنۆكێ هەستی كوردانە و مەردانەت تێدایە، قسەیەك بكە لەسەر ئەو مووشەكبارانە. تۆ بە حسابی خۆت لە خەمی مووچەدایت بۆ كوردستانیان، بەڵام لەئاست مووشەكدا، نقەت لێوە نایەت! ئەوە خێرە؟!

سەیرە، لەئاست ئەو هێرشە مووشەكییەی دوێنێ شەو كرایە سەر هەولێر و خۆشبەختانە زیانی گیانی و ماڵیی بەدوادا نەهات، لە دوینێ شەوەوە تا نووسینی ئەم وتارە، هەڵوێست و نووسینی زۆر جوانی هەندێ لە رۆشنبیر و میدیاكارە عەرەبەكانی عێراق و دەرەوەی عێراقم بینی كە سەركۆنەی ئەو هێرشەی سەر هەولێریان كردبوو، كەچی كەمپینچییەكانی شار و پەرلەمانتێرە كوردە ناپاكەكانی بەغدا، دەنگیان لێوە نەهات! هەی قوڕبەسەری ئەو خەڵكەی دڵی بە پیاوی وەكوو ئێوە خۆشە!

ئیرهابی فكری و وتاری كەمپینچییانی ئەڵقەلەگوێ، وایان كردووە، ئێستا هاووڵاتییەك، یان رۆشنبیرێكی بەویژادن و ساف كوردی ئەو شارە، جورئەتی ئەوەی نەبێ، هیچ نەبێ لە ئاكاونتی خۆیەوە لە فەیسبووك، سەركۆنەی ئەو هێرشە بكات كە كرایە سەر پایتەختەكەی، گەر وای كردبێت ئەوە جاشولكەكانی فەیسبووك جنێوبارانیان كردووە، دڵنیام ئەمە گوتار و بیركردنەوە و هەڵوێستی خەڵكی نیشتمانپەرەوەری سلێمانی نییە، بەڵام ئێوە ئەو گوتارە نانیشتمانییەتان زاڵ كردووە، ئێوە نەوەیەكی جنێوفرۆشتان دروست كردووە، كە دڵنیام رۆژێك دادێ كەس نامێنێ جنێویان پێ نەدابێ و ئیدی جنێو بە خۆتان دەدەن.