درز و لێكترازان دەكەویتە ناو میلیشیاكانی حەشدی شەعبییەوە
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

درز و لێكترازان دەكەویتە ناو میلیشیاكانی حەشدی شەعبییەوە

"دابەشبوونەکە ڕووی داوە و هەموو هێزەکانی حەشد نایانەوێ بچنە ئەو شەڕەوە"

 

بەهۆی جیاوازیی بۆچوون لە بارەی هێرشکردنە سەر هێزەکانی ئەمریکا، میلیشیاكانی حەشدی شەعبی لەیەکتری جیادەبنەوە و دابەش دەبن، بەو هۆیەشەوە ناکۆکیی قووڵ کەوتووەتە نێوانیان و هەموو هێزەکان ئامادەنین بچنە ئەو جەنگە پێشبینیكراوەی کە هەندێ لە گروپەکانی حەشدی شەعبی لە ڕێگەی مووشەکبارانکردنی بنکەکانی هێزەکانی ئەمریکاوە دەیانەوێ دەست پێبکات.

ئەمڕۆ پێنجشەممە 1/10/2020، موقتەدا سەدر، رێبەری رەوتی سەدر ئاگادارییەکی بۆ چەکدارانی دوو میلیشیاکەی خۆی، بڵاو كردەوە وئاماژەی بەوە كردووە هەردوو میلیشیای (سوپای ئیمام مەهدی) و (لیوای یەموی مەوعود)، کە بەشێکن لە میلیشیاکانی حەشدی شەعبی، بە فەرمانی سەدر کار دەکەن.

موقتەدا سەدر رای گەیاندووە، سەرەڕای ئامادەیی تەواویان ”بۆ رووبەڕووبوونەوەی داگیرکەر“، بەڵام بەهۆی ئەوەی عێراق بە بارودۆخێکی تایبەتدا دەگوزەرێ، لەکارکردن راگیراون.

د.هاوار نێروەیی، چاودێری سیاسی و شارەزا لە گروپەکانی حەشدی شەعبی، بۆ (باسنیوز) رای گەیاند، هێزەکانی حەشدی شەعبی لە ناوخۆیاندا ناکۆکیی زۆریان هەیە و لە 2015ـەوە ئەو ناکۆکییە تا دێت پەرە دەسێنێت. گوتیشی “سەرکردەکانی حەشد لە بۆچووندا جیاوازیی زۆریان تێکەوتووە و لەناو هێزەکانیشاندا جیاوازی دروست بووە، لەکاتێکدا کە هێزەکانی سەدر نایانەوێ بەشداری لەو شەڕەدا بکەن، بەڵام لەناو هێزەکاندا سەرکردەی دەستڕۆیشتوو هەیە سوورە لەسەر بەشداریکردنی هەمووان وەکوو حەشدی شەعبی لە هێرشکردنە سەر هێزەکانی ئەمریکا، چونکە دواجار ئەو هێزانە ئەگەر ناکۆکی توندیشیان هەبێ، هەموان دەچنەوە سەر یەک بۆچوون، ئەویش دژایەتی هەژموونی ئەمریکایە لە عێراق”.

د.سامان شاڵی، چاودێری سیاسی، بۆ (باسنیوز) جەختی لەسەر ئەوە کردەوە کە ئەمریکا جیاوازی لە نێوان هێزەکانی حەشدی شەعبیدا ناکات و رژدە لەسەر ئەوەی کە دەبێت هەمووان هەڵوەشێنەوە، گوتیشیی "ئەمریکا ئەمجارەیان قبووڵی مانەوەی هیچ هێزێکی حەشدی شەعبی ناکات جگە لە سوپای عێراق".