هەدەپە لە نێوان داخستن و بەهێزبووندا
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

هەدەپە لە نێوان داخستن و بەهێزبووندا

 "یەكێك لە دروشمەكانی ئاكەپە لە ٢٠٠٣وە بوو هیچ پارتێك لە سەردەمی ئەواندا داناخرێت"

دوای هەڵبژاردنی شارەوانییەكانی توركیا لە ٣١ی٣ی٢٠١٩، هەدەپە توانی ٦٩ شارەوانی بباتەوە، جگە لەوەش پاڵپشتیكردنی هەدەپە لە كاندیدی ئۆپۆزسیۆن لە (ئیستەنبۆڵ، ئەنقەرە، ئەدەنا، ئەنتاڵیا و مێرسین) بووە هۆكاری ئەوەی شكست بە ئاكەپە بهێنن و سەرۆكی شارەوانیی ئەو شارانە كەوتە دەستی ئۆپۆزسیۆن.

 لەو كاتەوە پارتی دەسەڵاتدار (ئاکەپە) و هاوپەیمانەكەی (مەهەپە) هەموو هەوڵێك دەدەن تا هەدەپە وەكوو تیرۆرست بناسێنن و بە گوێرەی پێشبینیی شارەزایانی بواری سیاسەت ئەگەری زۆرە هەدەپە دابخرێت.

زۆر جار ئۆپۆزسیۆنی توركیا، رەخنەی توند لە حكوومەتی توركیا دەگرێت، بەوەی بە ناحەق سەلاحەدین دەمیرتاش و چەند ئەندام پەرلەمانێكی تری هەدەپە بە تۆمەتی تیرۆر دەستگیر كراون، کە واتە ئەگەر تیرۆریستن بۆچی هەدەپە داناخرێت؟

ئەگەرچی یەكێك لە دروشمەكانی ئاكەپە كاتێك هاتە سەر دەسەڵات لە ٢٠٠٣، بە دەنگی بەرز دەیانگوت لە سەردەمی ئاكەپەدا هیچ پارتێكی سیاسی داناخرێت، بەڵام هاوكێشەكە گۆڕاوە و ئێستا ئاكەپە و حكوومەت بە چاوی دوژمن و تیرۆریست سەیری هەدەپە دەكەن، هەموو ئەو مامەڵەیەی لەگەڵ هەدەپە دەكرێت لە توركیا، لەگەڵ تیرۆریستانیش هەمان مامەڵە كراوە، چونكە تۆمەتباریان دەكەن بەوەی پەیوەندی خۆیان لەگەڵ پەكەكە نەپچڕاندووە، بۆیە داخستنی هەدەپە نزیك بووەتەوە.

ئایدن ئێنگین نووسەری دیاری ماڵپەری (T24)ی توركی، لە نووسینێكدا دەڵێت باشە وامان دانا هەدەپەتان داخست، ئەی چی لەو دەنگدەرانە دەكەن كە هەدەپە بەدەستی هێناوە؟

نووسەر دەنووسێت: "هەدەپە ٦ ملیۆن دەنگی بەدەست هێناوە، ئەو دەنگدەرانەش بەشێكی زۆری خاوەنی كوڕ و كچ و برا و خوشكن كە جارێک تەمەنیان نەبووەتە ١٨ ساڵ و دەنگیان نەداوە، بۆیە ئەگەر هەر دەنگێكی هەدەپە جارانی ٤ بكەین، واتە هەر دەنگدەرێك لە ماڵەوە ٤ كەسی تری هەبێت، بەهۆی تەمەنەوە نەتوانن دەنگ بدەن، كەواتە هەدەپە خاوەنی ٢٤ ملیۆن لایەنگرە، ئەی چۆن دەتوانن ٢٤ ملیۆن كورد بێدەنگ بكەن؟".

جگە لەو نووسەرەش چەند نووسەرێكی تر، پێشبینی ئەوە دەكەن هەدەپە دابخرێت، چونكە داخستنی هەدەپە وا دەكات لە هەڵبژاردنی داهاتوودا كوردە موحافیزكارەكان دەنگ بە ئاكەپە بدەن.

بەڵام فەهمی تاشتەكین نووسەری دیاری رۆژنامەی (خەبەر تورك)، پێی وایە ئەو مامەڵە خراپەی حكوومەت لەگەڵ هەدەپە دەیكات، بەتایبەت چەند رۆژێك بەرلە ئێستا ٨٢ لایەنگری ئەو پارتە دەستگیر كران، هەدەپە بەهێزتر دەكات نەك لاواز، تەنانەت لەمەودوا كوردە موحافیزكارەكانی ناو ئاكەپەش دەنگ بە ئاكەپە نادەنەوە.

دەبێت ئەوەش باس بكرێت، لە مێژووی توركیا چەندین پارتی سیاسیی كورد داخراون، بەڵام كوردەكان لەژێر ناوی دیکە پارتێكی دیکەیان دروست كردووەتەوە. بۆیە ئەگەر هەدەپە دابخرێت، سیاسییەكانی ناو هەدەپە بە ناوێكی تر پارتێكی تر دادەمەزرێنن.

ئایدن دەرە، نووسەری دیاری باكووری كوردستان و نزیك لە پەكەكە، پێیوایە ئێستا كاتی ئەوەیە هەدەپە هیچی تر نەڵێت پارتێكی توركیاییم و دەبێت بڵێت پارتێكی كوردیم، چونكە كاتێك هاوسەرۆكانی هەدەپە كۆنگرەی رۆژنامەوانی ئەنجام دەدەن، تەنیا میدیا كوردییەكان لەوێ بوونیان هەیە و توركییەكان تەنانەت رادیۆیەكیشیان لەوێ نییە.

دەرە باس لەوەش دەكات، كە پێویستە كوردەكان لە باكووری كوردستان یەكگرتوو بن تا ئەوەی بەرامبەر هەدەپە دەكرێت، رابگیرێت.