زیاتر لە دوو مانگە سەركردەیەكی هەدەپە لە سلێمانی بێسەروشوێنە
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

زیاتر لە دوو مانگە سەركردەیەكی هەدەپە لە سلێمانی بێسەروشوێنە

نوێنەری هەدەپە: تەنیا ئەوەندەمان پێ گوتراوە کە لە بازگەی عەربەت دەرچووە

زیاتر لە دوو مانگە، عەلی قایار، هاوسەرۆكی شاری سێرتی پارتی دیموکراتی گەلان (هەدەپە) لە شاری سلێمانیدا دیار نەماوە و هیچ سەرەداوێک لەبارەی چارەنووسی ئاشكرا نەكراوە.

ڕۆژی ٢٥ی تەمووزی ٢٠٢٠، (باسنیوز) ئاشكرای كرد كە سەركردەیەكی هەدەپە بە ناوی عەلی ئەحمەد قایار كە خەڵكی باكووری كوردستانە و لە سلێمانی كار دەكات و كادیری هەدەپەیە، لە ڕۆژی ١٥ی تەمووزی ٢٠٢٠ەوە بێسەروشوێنە.

لەمبارەیەوە ئەمڕۆ شەممە ٢٧ی ٩ی ٢٠٢٠، عابد ئیكە، نوێنەری هەدەپە لە هەرێمی كوردستان بە (باسنیوز)ی راگەیاند: "عەلی قایار، هاوسەرۆكی هەدەپە لە شاری سێرت، ماوەی زیاتر لە دوو مانگە چارەنووسی نادیارە و لە شاری سلێمانی بێسەروشوێنە”.

جەختیشی كردەوە كە بە دیاریكراوی لە كاتژمێر ٧:٣٠ی بەیانیی ڕۆژی ١٥ی ٧ی ٢٠٢٠ عەلی قایار كرێكارەكانی بۆ كۆمپانیا بردووە كە خۆیشی لەو كۆمپانیایە كاری كردووە. گوتیشی: “هەموو ئەوەی پێمان گوتراوە ئەوەیە كە لە بازگەی عەربەت - سلێمانی دەرچووە و ئیتر دیار نەماوە، تەلەفۆنەكەی داخراوە و بەپێی كامێراكانی بازگەكە بێت، نەگەڕاوەتەوە”.

ئەوەشی ئاشكرا كرد كە عەلی قایار ماوەی ١٠ ساڵە لە هەرێمی كوردستان دەژی و ماوەی ساڵێكیشە لە شاری سلێمانی كاری بەڵێندەری لە كۆمپانیایەك دەكات.

نوێنەری هەدەپە لە هەرێمی كوردستان هەروەها رای گەیاند، بۆ ئاشكراكردنی چارەنووسی سەركردەكەیان، سەردانی یەکێتیی نیشتمانیی کوردستانیان کردووە، بەڵام “تاوەکوو ئێستا هیچ سەرەداوێکمان دەست نەکەوتووە”.