ژمارەیەک چەکداری رێکخراوی تیرۆریستیی داعش هێرشیان کردە سەر گوندێکی سنووری ناحیەی گوڵاڵە-ی سەر بە قەزای خانەقین.
مەحمود دەلۆ، كارگێری لیژنەی ناوچەی گولاڵەی پارتی دیموكراتی كوردستان، بە (باسنیوز)ی راگەیاند: " کاتژمێر 10ی شەوی شەممە 19/9/2020، تیرۆریستانی داعش بە هاوەن بۆردومانی گوندی ئوم حونتەی سنووری ناحیەی گوڵاڵەیان کرد و پاشان بە چەکی قەناس تەقەیان لە دانیشتووانی گوندەکە کرد”.
گوتیشی: "دانیشتووانی بەرگریان لە خۆیان کردووە و ڕووبەڕووی چەکدارانی داعش بوونەتەوە و لە ئەنجامدا هاووڵاتییەک گیانی لەدەست داوە و یەکێکی دیکەش بریندار بوو”.
نیهاد محەمەد ، گوتەبێژی پۆلیسی دیالە، زانیاریەكانی بۆ (باسنیوز) پشتراستكردەوە و رایگەیاند، هێزی ئەمنییەکان ناوچەکەیان گەمارۆ داوە و چەکدارەکانی داعش هەڵاتوون.