بە ڤیدیۆ.. كەسوكاری دارا ڕەئووف سوپاسی ئاسایش و دژە تیرۆری هەرێمی كوردستان دەكەن
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

بە ڤیدیۆ.. كەسوكاری دارا ڕەئووف سوپاسی ئاسایش و دژە تیرۆری هەرێمی كوردستان دەكەن

زانیاریی بڵاونەكراوەیان لەبارەی خێزانە كوژراوەكەی بەغدا ئاشكرا كرد

كەسوكاری دارا ڕەئووف و ئەو خانەوادەیەی كە لە شاری بەغدا لە لایەن تاوانبارێكەوە كوژران، سوپاسی ئاسایش و دژە تیرۆری هەرێمی كوردستان دەكەن و چەند زانیارییەكی بڵاونەكراوەش لەبارەی كەیسەكە ئاشكرا دەكەن.

ئەمڕۆ پێنجشەممە ١٧ی ٩ی ٢٠٢٠، ئەحمەد كە كوڕە خوشكی دارا ڕەئووفە، لە بارەی كوژرانی خاڵ و خاڵۆژنی و كچە خاڵەكەی بە میدیاكانی راگەیاند، ئەوەی باس دەكرێت كە قابڕین و سەربڕین و دەستبڕین هیچی ڕاست نییە، دەستدرێژیش ڕووی نەداوە، تاوانێكی دزیكردن بووە، هەندێك وردەكاری هەیە كە لە ڕەوتی لێكۆڵینەوەكاندایە و ئێمە بۆمان نییە ئاشكرای بكەین.

گوتیشی: ”بابەتەكە بەو جۆرەیە كە پاسەوانێك هەبووە لە نزیك ماڵی ئەوان ئەركی هەبووە، خاڵم كەسێكی كۆمەڵایەتی بووە و ناسیویەتی و قسەیان كردووە. كێشەی لەگەڵ هیچ كەسێك نەبووە، بابەتی فرۆشتنی دەرمانخانە یان كڕینی دەرمانخانە یان خانوو فرۆشتن و ئەم شتانە هیچ راست نین، كچەكە لە دەرمانخانەیەك كاری كردووە و هاتۆتەوە ماڵەوە بەسەر ڕووداوەكەدا، ئەوەی دەگوترێ خانووی فرۆشتووە و پارەیان كۆكردۆتەوە بێنەوە سلێمانی، ڕاست نییە“.

جەختیشی كردەوە كە ئەوان بەیانیی دوێنێ چوارشەممە سكاڵایان تۆمار كردووە، تواندرا لە ماوەی ٢٤ كاتژمێردا دەستگیر بكرێت، ”بۆ ئەمە لە بەغداوە زوۆر هاكارمان بوون“. گوتیشی: ”دەستخۆشی لە هێزەكانی ئاسایش و دژەتیرۆر دەكەین“.

خوشكەزاكەی دارا ڕەئووف دەڵێت: ”ئەوەی دەستگیركراوە هەر ئەو كەسەیە و گومانمان لە كەس نییە و كەسیتر لە وێنەكەدا نییە تا ئێستا، بەڵام كەسێك بە تەنیا ناتوانێت هەموو ئەم كارانە بكات. كامێرای چاودێری سەر بە كونسوڵخانەی ڕووسیایە، كامێراكان ئەوكاتە دەدرێت كە وەزارەتی دەرەوەی عێراق لەگەڵ وەزارەتی دەرەوەی ڕووسیا قسە بكات، بەڵام مۆڵێك لە نزیك ئەوانەوە هەیە“.

بە گوتەی ئەحمەد، دارا ڕەئووف لە ساڵانی شەستەكانەوە لە بەغدا دەژی و لەوێ فەرمانبەر بووە و خانەنشین بووە، كچەكەشی كە گەورە بووە، لە كۆلێژ بووە، ویستوویانە كۆلێژ تەواو بكات و بگەڕێنەوە سلێمانی. هاوسەرەكەشی ماستەری هەبووە و فەرمانبەری وەزارەتی ئەوقاف بووە. گوتیشی: ”ماوەیەك لەمەوپێش خاڵم شێرپەنجەی سینگی هەبوو، چووە ئەردەن، هاتەوە و گوتی دەمەوێ بێمەوە لە سلێمانی پشوو بدەم، هەفتەی پێشوو قسە كرا لەسەر هاتنەوەیان. ئەوان هیچ موڵكێكیان لە بەغدا نییە، ئەو شوققەیەشی تێیدان هی حكوومەتە و خێزانەكەی وەریگرتووە، موڵكی دیكەی لە بەغدا نییە“.