32 سەعات بە بن دەستی كوردا
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

32 سەعات بە بن دەستی كوردا

 

ماوه‌ی 32 سەعات لە ئۆتۆمبێلدا به‌و رێیه‌وه‌ بووم كه‌ كه‌وتووه‌ته‌ نێوان كۆبانێ به‌ لای رۆژاوادا و هه‌ولێر به‌ لای رۆژهه‌ڵاتدا، ئه‌مه‌ش به‌شێكه‌ له‌ كوردستانی مه‌زن، ئەی ئەگەر لە هەولێریشەوە بڕۆیشتمایە تا گەرمیان دەبووە چەند سەعات؟


بڕینی ئه‌م مه‌ودایه‌ بە 32 سەعات كارێكی ئاسان نییه‌، به‌ڵكوو زه‌حمه‌ت و پڕ ئه‌شكه‌، ئه‌وه‌ی كه‌ بڕینی ئه‌و رێیه‌ پڕ له‌ پێچ و په‌ساره‌ت بۆ ئاسان ده‌كات، كه‌ چه‌ندین شار و قه‌راغ شار و گوند و ده‌شت و دۆڵ ده‌بڕیت، ئه‌و هه‌سته‌ نه‌ته‌وه‌یی و ئه‌و ئارامی و ئاسایشه‌یه‌ كه‌ هه‌ستی پێ ده‌كه‌یت، ئارامییه‌كه‌ش له‌م دوو شته‌وه‌ سه‌رچاوه‌ ده‌گرێت:
- ئه‌و هه‌موو مه‌ودایه‌ هی خۆته‌، خه‌ڵكه‌كه‌شی له‌ خۆتن.
- هه‌موو ئه‌وانه‌ی ناوچه‌كه‌یان له‌ژێر ده‌ستدایه‌، خه‌ڵكی خۆت و دراوسێی خۆتن كه‌ ده‌یانناسی و متمانه‌ت پێیان هه‌یه‌.
ره‌نگه‌ یه‌كێك به‌ ئه‌ندێشه‌دا بچێت و قووڵ بیر بكاته‌وه‌، وڵاتی ئێمه‌ چه‌نده‌ فراوانه‌، چه‌ندیش گرنگه‌ كه‌ خۆت تێیدا خاوه‌ن بڕیار بیت.
لێره‌دا ئایدیۆلۆژیا ناخوات، به‌ڵكوو به‌شی هه‌ره‌ زۆری بیركردنه‌وه‌ وابه‌سته‌ی خه‌ڵك و به‌رژه‌وه‌ندی و ئایینده‌ی ئه‌وانه‌، به‌ هیچ جۆرێك بیرت بۆ لای ئه‌وه‌ ناچێت، كه‌ ئاخۆ كام پارت ده‌سه‌ڵاتداره‌ و كامیش ئۆپۆزسیۆن.
له‌نێوانی كۆبانێ و هه‌ولێر، ئه‌م مه‌ودا دووره‌، خۆ بەڕاستی مه‌وداكه‌ی له‌ هه‌زار كیلۆمه‌تر زیاتره‌، ئاخۆ ئه‌گه‌ر رێیه‌كه‌ راست بوایه‌، مه‌وداكه‌ چه‌ند ده‌بوو؟ ماوه‌ی كه‌متر له‌ ساڵێكه‌، ئه‌و رێیه‌ رێیه‌كه‌ی جاران نییه‌، ئه‌و كه‌سه‌ی له‌ كۆبانێوه‌ بیه‌وێت به‌ره‌و هه‌رێمی جزیره‌ یان هه‌ولێر (باشووری كوردستان) بچێت، ده‌بێت به‌ره‌و باشوور، به‌ره‌و ڕه‌ققه‌ بچێت، پاشان به‌ره‌و رۆژهه‌ڵات رووه‌وه‌ حه‌سه‌كه‌، ئنجا قامیشلۆ و دێرك، له‌وێشه‌وه‌ هێنده‌ نابات ده‌گاته‌ باشووری كوردستان (پێش خاپوور)، له‌وێشه‌وه‌ دوای 3 سەعات خۆی له‌ هه‌ولێر ده‌بینێته‌وه‌.
تۆ ئه‌و مه‌ودایه‌ ده‌بڕیت و به‌ چه‌ندین بازگه‌دا تێپه‌ڕ ده‌بیت، به‌ نێو عه‌ره‌ب و كورددا تێپه‌ڕ ده‌بیت، تۆ له‌م تێپه‌ڕینه‌دا هه‌ست به‌ لایه‌نی نه‌ته‌وه‌یی كارمه‌ندی بازگه‌كان ناكه‌یت، ئه‌وان هه‌ر كام له‌م دوو نه‌ته‌وه‌یه‌ بن، تێكڕا په‌یوه‌ستی یه‌ك فه‌رمانن، كه‌ منبج رۆژاوایه‌تی، به‌ره‌و باشووریش ره‌ققه‌ و دێره‌زوور ده‌گرێته‌وه‌، رووه‌وه‌ رۆژهه‌ڵاتیش ده‌گاته‌ دێرك، كه‌ كۆبانێ و حه‌سه‌كه‌ و قامیشلۆ و گونده‌واریان ده‌گرێته‌وه‌.


هه‌ڵبه‌ت هونه‌ر لێره‌دا نییه‌، واته‌ به‌م قسانه‌ی كه‌ گوتمن، هێنده‌ی كه‌ هونه‌ر له‌وه‌دایه‌ كه‌:
-به‌ درێژایی مێژووی تازه‌، مه‌به‌ستم له‌گه‌ڵ هاتنی كۆلۆنیالیستی رۆژاوا، كورد له‌ رووی سه‌ربازی و بڕیاره‌وه‌ ئه‌و ناوچانه‌ی له‌ژێر ده‌ستدا نه‌بووه‌.
-زۆر ئاساییه‌ بگوترێت "سنووری خۆمان به‌ خوێن كێشاوه‌" یان ئاماژه‌ی پێ بكرێت، ئه‌م قسه‌یه‌ ره‌وایه‌ و له‌ كۆویژدانه‌وه‌ سه‌رچاوه‌ ده‌گرێت.
پرسیاریش لێره‌دا ئه‌وه‌یه‌، ئایا كورد تا سه‌ر ده‌توانێت ئه‌و مه‌ودا و ناوچانه‌ی له‌ژێر ده‌ستدا بێت؟


راستییه‌كه‌ی وەڵامی ئه‌م پرسیارە دوو ره‌هه‌ندی هه‌یه‌:
- ره‌هه‌ندی ئه‌وه‌ی تا چه‌ند دۆستان پشتیوانیت ده‌كه‌ن، هه‌ڵبه‌ت له‌سایه‌ی فاكته‌ری هه‌رێمی كه‌ له‌ بۆسه‌دایه‌.
- ره‌هه‌ندێكیش كه‌ به‌ كورد خۆیه‌وه‌ په‌یوه‌سته‌، په‌یوه‌ندیی خۆبه‌خۆیان، هه‌روه‌ها په‌یوه‌ندییان له‌گه‌ڵ پێكهاته‌كانی دیكه‌ی ناوچه‌كه‌دا.


بابه‌تی ناوخۆی كورد، واته‌ ده‌بێت كورد خۆیان به‌هێز بكه‌ن و ناكۆكی و دووبه‌ره‌كیی نێوان پارته‌كانیان نه‌هێڵن، پاشان گیانی هاوبه‌شایه‌تیی راسته‌قینه‌ گه‌ڵاڵه‌ بكه‌ن، ئه‌م دوو شته‌ش له‌ یه‌كدی جودا بكه‌نه‌وه‌:
یه‌كه‌م: ئه‌و قه‌واره‌ كارگێڕییه‌ی ئه‌ركی پاراستن و به‌ڕێوه‌بردنی به‌رژه‌وه‌ندیی خه‌ڵك و دانیشتوانی له‌ ئه‌ستۆیه‌.
دووه‌م: ئه‌وه‌ی په‌یوه‌سته‌ به‌ پارته‌كان كه‌ سه‌نگ و په‌یوه‌ستییه‌كه‌ی به‌نده‌ به‌ كێبڕكێ، یه‌كێك له‌ مه‌رجه‌كانیشی حوكمڕانیی هۆشمه‌ندانه‌یه‌.
ماوه‌ته‌وه‌ بڵێین، پاراستنی ئه‌م رووبه‌ڕه‌ جوگرافییه‌ به‌رپرسایه‌تییه‌كی مێژوویی و ئه‌خلاقی و نه‌ته‌وه‌ییه‌، به‌رپرسایه‌تیی گه‌وره‌ش بریتییه‌ له‌ زاڵكردنی ناكۆكییه‌ بنه‌ڕه‌تییه‌كه‌، كه‌ په‌یوه‌ست به‌ ئاسته‌نگ و هه‌لومه‌رجی سیاسیی ده‌ره‌وه‌ی كورد، به‌سه‌ر ناكۆكییه‌ لاوه‌كییه‌كه‌ی خۆبه‌خۆی كورد، واته‌ ناكۆكیی نێوان پارته‌كان به‌ شێوه‌یه‌ك بكرێت كه‌ خزمه‌ت به‌ ئارامی و ئاسایش بكات، هه‌روه‌ها ره‌وشی روو له‌ گه‌شه‌ی گشتی به‌هێزتر بكات، كه‌ پرۆژه‌ و دید و بۆچوونی تێدا ئازادانه‌ بخرێنه‌ روو.
تكایە ئه‌م جوگرافیایه‌ بپارێزن..!