لە رێگەی یاداشتێکەوە داوا لە حکوومەتی عێراق دەکرێ قەرەبووی قوربانیانی هەڵەبجە بکاتەوە
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

لە رێگەی یاداشتێکەوە داوا لە حکوومەتی عێراق دەکرێ قەرەبووی قوربانیانی هەڵەبجە بکاتەوە

 

سەرۆکی کۆمەڵەی قوربانیانی هەڵەبجە دەڵێ، تاوەکو ئێستا حکوومەتی عێراق هیچ وەڵامێکی بۆ قوربانیانی هەڵەبجە نەبووە و لە  ڕێگەی یاداشتێکەوە داوای قەرەبووکردنەوەی قوربانیانمان کردووە.

لوقمان عەبدولقادر، سەرۆکی کۆمەڵەی قوربانیانی هەڵەبجە، بە (باسنیوز)ی ڕاگەیاند:   "تاوەکو ئێستا حکوومەتی عێراق هیچ وەڵامێکی بۆ هەڵەبجە و کەیسی قوربانییەکان نەبووە، بۆ ئەو مەبەستەش لە ڕێگای یاداشتێکەوە داوامان لە عێراق کردووە بۆ قەرەبوکردنەوەی قوربانیانی کیمیابارانی هەڵەبجە، پێشتریش ئەو یاداشتەمان ئاڕاستەی هەر یەک لە نوری مالیکی و عادل عەبدولمەهدی سەرۆکوەزیرانی پێشووی عێراق کردووە، بەڵام هیچ وەڵامێکیان نەبووە کە سوود بە هەڵەبجە و قوربانیەکانی بگەیەنێت، ئێمەش وەکو ڕێکخراو تەنیا ئەرکی سەرشانمان ئاگادارکردنەوەیە و هیچ دەسەڵاتێکی ترمان نییە و جێبەجێکردن ئەرکی ئێمە نییە".

ڕاشیگەیاند:  "لەو 975 کەسەی کە تۆمار کراون وەکو بەرکەوتەی چەکی کیمیایی کەسانێکی تێدا هەیە بەرکەوتە نین و کەسانێک هەن بەرکەوتەن و ناویان لەو لیستەدا نییە، بۆ ئەم مەبەستە کۆمەڵەی کیمیابارانی هەڵەبجە لەگەڵ وەزارەتەکانی تەندروستی و شەهیدان کۆنووسێکمان ئامادەکردووە بۆ ئەنجوومەنی وەزیران بۆ ئەوەی پێداچوونەوە بە لیستی بەرکەوتووانی چەکی کیمیاییدا بکرێت و ئەوانەی کە بەرکەوتە نین ناویان بسڕێتەوە لە لیستەکە و ئەوانەی بەڕاستی بەرکەوتەن بخرێنە شوێنیان".

سەرۆکی کۆمەڵەی قوربانیانی هەڵەبجە گوتیشی:  "بەهۆی پەتای کۆرۆناوە چارەسەرکردنی بەرکەوتووانی کیمیاباران دواکەوت کە لە ماوەی ڕابردوودا وابڕیاربوو بنێردێن بۆ وڵاتی ئێران”.