ئێوە خۆتان خەجالەت بن
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

ئێوە خۆتان خەجالەت بن

کامەران کەریم 

سەردانی سەرۆک وەزیرانی عێراق مستەفا کازمی بۆ هەرێمی کوردستان بۆ چارەسەرکردنی ئەو کێشانەن کە چەندین ساڵە لەنێوان هەرێمی کوردستان و حکومەتی عێراق کەڵەبوون کە دواترینیان بڕینی ئەو بڕە بودجەیە بوو کە بۆ مووچە لە بەغداوە دەهات.

هاتنی کازمی بۆ هەرێمی کوردستان قسەی هەموو ئەو خۆفرۆشانەی ناوخۆی بەدرۆخستەوە کە گوایا حکومەتی هەرێم غەدر لە بەغدا دەکات و بەغدا وەڵامی حکومەتی هەرێم ناداتەوە یان دەیانگوت بەغدا مووچەی ناردووە بەڵام حکومەتی هەرێم دابەشی ناکات !!

هەرچەندە ئەو خۆفرۆشانە هەوڵ دەدەن هەموو کێشەی کورد لە گەڵ حکومەتی عێراق لە مووچەدا کورت بکەنەوە بەڵام مەسرور بارزانی سەرۆکی حکومەتی هەرێمی کوردستان لە کۆبوونەوەیدا لە گەڵ کازمی  لە پاڵ باسکردنی بابەتی مووچەی فەرمانبەران کە مافێکی ڕەوای خەڵکی کوردستانە، زۆر بە ڕاشکاوی ئاماژەی بە کێشە بنەڕەتیەکانی تر کرد لە گەڵ سەرۆک وەزیرانی عێراق کە پێویستە چارەسەر بکرێن لەوانە بابەتی ناوچە کوردستانییەکانی دەرەوەی هەرێم و بەتایبەتیش سیاسەتی ڕەگەزپەرستانەی تەعریب کە لە کەرکووک و ناوچە کوردستانییەکانی تر بەرامبەر بە کورد درێژەی پێ دەدرێت.

ئەوەی زۆر جێی سەرنجە ، تاقمێکی خۆفرۆشی قەڵەمبەدەست دێن و سەردانی کازمی  دژی حکومەتی هەرێم بەکار دەهێنن . ئاخر ئەگەر تۆزێک کەرامەتتان هەیە بڕۆن تەماشای دۆخی کەرکووک و ناوچە کوردستانییەکان بکەن بزانن ئەو ناوچانە لە دوای خیانەتی گەورەی شازدەی ئۆکتۆبەر لە چ نەهامەتییەکدا دەژین. 

کازمی و شاندی یاوەری سەرسامی خۆیان بە جادە و ڕێگەوبان و ئاوەدانکردنەوەی هەولێر و دهۆک نیشان دا و خودی مسته‌فا کازمی باسی ئەوەی کرد کە هەمان ڕۆژی هاتنی بۆ هەولێر سەردانی قوتابخانەیەکی کردووە لە بەغدا و وەک خۆی گوتی تووشی شۆک بووە کە دۆخی وێرانیی قوتابخانەکەی بینیوە لە کاتێکدا ئەو قوتابخانەیە لە راقیترین گەڕەکی بەغدا بووە .

دۆخی هەرێمی کوردستان و عێراق لە رڕووی ئاوەدانیی و پێشکەوتنەوە هەرگیز بەراورد ناکرێن کە کوردستان چەند لە پێش ناوچەکانی دیکەی عێراقەوەیە . خەڵکی عێراق بەردەوام لە سۆشیال میدیا

سەرسامی خۆیان بە پێشکەوتنی کوردستان دەردەبڕن و هیوا دەخوازن کە ناوچەکانی ئەوانیش وەکو هەرێمی کوردستان پێشبکەوێت . ئەوە تەنیا خۆفرۆشانی کوردن کە حەزیان لە ژێردەستەیی و بێگانەپەرستییە و هەمیشە دژی نەتەوە و حکومەتی خۆیان بوون و دەیانەوێ بێگانە حوکمیان بکات و تێیان هەڵبدات بۆیە بە پارەی خۆفرۆشیی چەند میدیایەکیان لە دژی میللەتی خۆیان خستووەتە گەڕ .

ئەو خۆفرۆشانە پێویستە هەمیشە سەرشۆڕ و خەجەلەت بن چونکە چاوپۆشی لەو هەموو گەندەڵییە بێ وێنانە و بەفیڕۆدانی ملیارەها دۆلار دەکەن کە لە ماوەی حەڤدە ساڵی ڕابردوو لە لایەن دەسەڵاتتدارانی بەغدا دزرا ، ئەگەر کەرامەتتان هەیە یەک جاریش دەپرسن ئەو پارەیە چی لێهات و بۆچی ئەو بەغدایەی ئێوە زۆر پێی سەرسامن، دواکەوتووترین شاری جیهانە؟

 

كامەران كەریم