شارەبان.. لە ئەنجامی هێرشی داعش دوو هاووڵاتی بوونە قوربانی
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

شارەبان.. لە ئەنجامی هێرشی داعش دوو هاووڵاتی بوونە قوربانی

"لە خورماتووش هێرشی کردووەتە سەر سوپای عێراق"

 درەنگانی شەوی رابردوو تیرۆریستانی داعش لە سنووری قەزای شارەبان لە پارێزگای دیالە، هێرشیان كردووەتە سەر گوندێك و هاووڵاتییەكیان كووشتووە و یەكێكی دیکەش بریندار بووە.

عەدنان محەمەد، سەرۆكی ئەنجوومەنی شارەوانیی قەزای شارەبان، ئەمڕۆ سێشەممە 1/9/2020 بە (باسنیوز)ی راگەیاند: "درەنگانی شەوی رابردوو چەكدارانی داعش هێرشیان كردووەتە سەر گوندی "نەسیم" كە دەكەوێتە باشووری شارەبانەوە."

گوتیشی: "لە ئاكامی ئەو هێرشە چەكدارییە كە تەقەیان لە ماڵی هاووڵاتیانی سڤیل کردووە، هاووڵاتییەك گیانی لەدەست داوە و هاووڵاتییەكی دیکەش بریندار بووە."

دوای گەیشتنی هێزە ئەمنییەكان، تیرۆریستانی داعش هەڵاتوون.

ئەوە لە کاتێکدایە بەرەبەیانی ئەمڕۆ سێشەممە لە ڕۆژئاوای خورماتووش داعش هێرشی كردووەتە سەر هێزەكانی سوپای عێراق و دوو سەرباز بریندار بوون.

لەمبارەوە مەهدی حەسەن، بەڕێوەبەری پۆلیسی سلێمان بەگ بە (باسنیوز)ی راگەیاند: "پاش كاتژمێر یەكی بەرەبەیانی ئەمڕۆ سێشەممە1/9/202 لە گوندی زنجەلی هێرش كراوەتە سەر هێزەكانی سوپای عێراقی و ئەوەی هەتا ئێستا دەرکەوتووە، دوو سەربازی عێراقی بریندار كراون."

هێزە ئەمنییە عێراقییەکان لە ناوچە کوردستانییەکانی دیالە، خورماتوو کەرکووک و خانەقین توانای دابینکردنی ئەمنیەت و سەقامگیریی ناوچەکەیان نییە، بەم هۆیەوە جموجۆڵەکانی داعش ڕوو لە زیادبوونن و ڕۆژ لەدوای ڕۆژ زیاتر کردەوەی تیرۆریستی ئەنجام دەدەن.