مەهەپە دەیەوێت هاوپەیمانیی میللەت تێك بدات
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

مەهەپە دەیەوێت هاوپەیمانیی میللەت تێك بدات

داوا دەكات ئاكشەنەر بێتەوە ناو مەهەپە و پارتەكەی هەڵبوەشێنێتەوە

دەوڵەت باخچەلی سەرۆكی پارەتی نەتەوەپەرستی تورکیا (MHP)، لە وتارێكدا داوای لە مەراڵ ئاكشەنەر سەرۆكی پارتی باش كردووە كە واز لە پارتەكەی بهێنێت و هەڵیبوەشێنێتەوە و بگەڕێتەوە ناو مەهەپە. ئاكشەنەریش لە وەڵامدا پێی دەڵێت من لە ماڵی خۆمم.

ئاكشەنەر دوای ئەوەی لە دەوڵەت باخچەلی سەرۆكی مەهەپە توڕە بوو، پارتێكی تازەی بەناوی پارتی باش دامەزراند، لە یەكەم بەشداریكردنیشی لە هەڵبژاردنی پەرلەمانی توانی سەركەوتنێكی بەرچاو بەدەست بهێنێت و بەربەستی هەڵبژاردنی شكاند و ٤٠ كورسیی پەرلەمانی بردەوە و ئێستاش باخچەلی داوای لێ دەكات بگەڕێتەوە ناو مەهەپە.

چەند شرۆڤەكارێكی سیاسی لە توركیا پێیانوایە، باخچەلی بەو گوتانەی دەیەوێت هاوپەیمانیی (میللەت) لە نێوان جەهەپە و پارتی باش و پارتی سەعادەت تێك بدات. هەروەها بەهۆی ئەوەی بۆیان دەركەوتووە كە ئاكەپە و مەهەپە لە هەڵبژاردنی داهاتوودا حاڵیان خراپە و ناتوانن ببنەوە بە زۆرینە، بۆیە هانای بۆ ئاكشەنەر بردووە.

لەلایەكی ترەوە جەهەپە كە هاوپەمانی پارتی باشە لەناو پەرلەمانی توركیادا، لەڕێگەی چەند ئەندام پەرلەمانێكییەوە، هانی پارتی باش دەدات تا بە هیچ شێوەیەك بیر لەوە نەكەنەوە پارتەكەیان هەڵبوەشێننەوە و بچنەوە ناو مەهەپە.

ئەگەرچی پارتی باش لەڕێگەی مەراڵ ئاكشەنەر سەرۆكی پارتەوە بە نەخێر وەڵامی باخچەلی دایەوە و گوتی هەرگیز بیر لەوە ناكەینەوە بێینەوە ناو مەهەپە، بەڵام سەرچاوە میدیاییەكان باس لەوە دەكەن، كە ئاكەپەش بە نهێنی هەموو هەوڵێك دەدات تا پارتی باش هەڵبوەشێتەوە و بچنەوە ناو مەهەپە، چونكە حاڵی هاوپەیمانیی (كۆماری) لە نێوان ئاكەپە و مەهەپە خراپە و ئەستەمە لە هەڵبژاردنی داهاتوودا بتوانن ببنەوە بە زۆرینە.

سیناریۆیەكی تریش هەیە، كە ئەگەر ئاكشەنەر پارتەكەشی هەڵنەوشێنێتەوە ئاساییە، بەڵام لە هاوپەیمانیی (میللەت) بێتە دەرەوە و بچێتە ناو هاوپەیمانی (كۆماری). ئەگەر ئەو سیناریۆیەی ئاكەپە و مەهەپە سەر بگرێت، ئەوكات دەتوانن ببنەوە بە زۆرینە و كورسی سەرۆكایەتیش بۆ رەجەب تەیب ئەردۆغان مسۆگەر دەبێت.