كینە لەدڵان و گەندەڵكاران و بەرژەوەندخوازان، چاوەڕێی كاری باشیان لێ ناكرێت
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

كینە لەدڵان و گەندەڵكاران و بەرژەوەندخوازان، چاوەڕێی كاری باشیان لێ ناكرێت


ناوه‌ڕۆك و ماهیه‌تی دیموكراسیه‌ت له‌ باشووری كوردستان له‌نێوان حاڵیبوون و به‌دحاڵیبووندا وه‌ك په‌رداخێكی درزبردوو وایه‌، خەڵكانێك هاتوهواری نەبوونی دیموكراسیەتیانە، كەچی خۆیان بە مێشك و بە بیركردنەوە پۆپۆلیست و خۆسەپێن و نادیموكراسن، ئه‌و دووفاقیەش‌ وا ده‌كات كه‌ دۆخێكی جێگیر دروست نه‌بێ، به‌هۆی ئۆپۆزسیۆنێك كه‌ هێندهی‌ نماییشیه‌ و له‌ خه‌می ئیمتیازات و جێگه ‌و پێگەی خۆیدایە، كاره‌ سه‌رەكیه‌كه‌ی خۆیی له‌بیر كردووه‌، هه‌ڵبه‌ته‌ مه‌به‌ستی سه‌ره‌كیم ئۆپۆزسیۆنی حزبه‌كان نیە، بەڵكوو مه‌به‌ستم ئه‌و تاكانه‌یه‌ كە وەك ئۆپۆزسیۆن قسه ‌ده‌كه‌ن، گوایە رەخنەیان لە حكوومەت و دەسەڵات هەیە و لە خەمی خەڵكدان!

له‌سایه‌ی ئه‌و دیموكراسیه‌ته‌ی له‌ باشوور هاتۆته‌ گۆڕێ (وێڕای هەموو كەموكوڕییەكانی) هەروەها لە سایەی پەرەسەندنی سۆشیال میدیای ئەنتەرنێت لە جیهاندا، چه‌ندین میدیای جۆراوجۆر و ماڵپه‌ڕی جودا و فه‌رمی و نافه‌رمی له‌دایك بوون كه‌ له‌ پشتیانه‌وه‌ خه‌ڵكی سیاسی و حزبی و په‌رله‌مانتار و بازرگانی سیاسی خۆیان مه‌ڵاس داوه. گه‌ر له‌ روانگه‌ نه‌ته‌وه‌یی و هه‌ستی به‌رپرسیارێتیه‌وه شرۆڤه‌ی ئه‌م دیارده‌ میدیاییه‌ بكه‌ین كه‌ هاتۆته‌ گۆڕێ، ده‌بوو ئه‌م مینبه‌ره‌ میدیاییانه‌ ئه‌ركی سه‌ره‌كییان به‌هێزكردنی پێگه‌ و جێگەی كوردستانی باشوور بێت كه‌ له‌ چه‌ندین لاوه‌ گەمارۆ دراوە و بەردەوام هەوڵ هەیە بۆ رووخاندن و بێهێزكردنی، بەڵام جێی داخه‌ بەشێكی زۆری سەرپەرشتیاران و سپۆنسەران و پارەدەرانی ئەو میدیایانە، پێوه‌ره‌ سه‌ره‌كیه‌ نیشتمانیه‌كه‌یان له‌بیر كردووه‌ یاخود وه‌لایان ناوه، ئەویش لەپێناو بەرژەوەندیی ته‌سك و تایبه‌تی خۆیان، تاكوو بتوانن زۆرترین خه‌ڵك له‌ده‌وری ئه‌و بیركردنەوەیەی خۆیان كۆ بكه‌نه‌وه‌ كه‌ ناوبەناو وه‌ك بڵقی سه‌ر ئاو سەر هەڵدەدەن و بۆ ماوه‌یه‌كی كورت ده‌مێننەوە.

هه‌رچه‌نده‌ ئه‌م دیارده‌یه‌ له‌م بارودۆخەی ئێستادا زۆرێك له‌ كوردستانی باشووری ته‌نیوه‌ و تا راده‌یه‌كی فراوانیش كاریگه‌ریی خراپی هەیە و ڕه‌شبینیی لای خه‌ڵكی دروست كردووه، لێ ده‌بینین كه‌ ناتوانن بۆ ماوه‌یه‌كی دوورودرێژ به‌و ڕیتم و نه‌فه‌سه‌ به‌رده‌وام بن، چونكه‌ بنه‌مایه‌كی فشه‌ڵی هه‌یه ‌و مه‌به‌سته‌ سه‌ره‌كیه‌كه‌ خه‌می خه‌ڵك و خەمی نیشتمان نیه،‌ به‌پێچه‌وانه‌وه‌ بەرژەوەندیی تایبەتی كۆمەڵێك كەسە كە لە خەمی هەر شتێكدا بن تەنیا لە خەمی خەڵكی كوردستان و خاكی كوردستان و سەروەریی كوردستاندا نین.


زۆر له‌و ماڵپه‌ڕ و په‌یجانه‌ی فه‌یسبووك كۆمه‌ڵێك كه‌س ده‌بینین كه‌ به‌ڕێوه‌یان ده‌بەن كه‌ سه‌یری باگگراوندیان ئه‌كه‌ی كه‌ هه‌ریه‌كه‌و بۆ ئامانجێكی شه‌خسی كار ده‌كه‌ن، هەندێكیان‌ پێشتر داوای پوستێك یاخود پێگه‌یه‌كی باڵای حكوومیان كردووه‌ لەنێو خودی ئەو حكوومەتەی كە بە گەندەڵی دەزانن! بەڵام ئەو پۆستەیان وه‌رنه‌گرتووه، ئیدی بەهۆی ئەوەوە ئێستا ناویان له‌ خۆیان ناوه‌ ”ئۆپۆزیسیۆن!“، سەیر لەوەدایە هەموو ئەوانەی لەو دەسەڵات و حكوومەتەدان بە ”كۆیلە و زوڕناژەنی دەسەڵات“ دەزانن، بێگومان ئەمانەش وه‌ك چۆن لافاوێك یان بوومه‌له‌رزه‌یه‌ك به‌خێرایی دێت و ده‌ڕوات زه‌رەر و زیان به‌دوای خۆیدا ده‌هێنێت، شوێنه‌واری خراپ به‌جێ ده‌هێڵن، بۆیە باشترین چاره‌سه‌ر ئه‌وه‌یه‌ كه‌ له‌ژێر چه‌تری ئه‌و دیموكراسیەته‌ی ئه‌وان هاواری بۆ دەكەن‌ به‌ هه‌مان زمانی دیموكراسیه‌ته‌وه‌ له‌گه‌ڵیان بدوێی.

سایكۆلۆژیه‌تی مرۆڤ هه‌میشه‌ وا كار ده‌كات كه‌ له ‌كاتی تەنگژەی سەخت و بێ هیواییدا زۆر لاواز بیر ده‌كاته‌وه،‌ به ‌جۆرێك كورد گوته‌نی مرۆڤ له‌ كاتی خنكاندا ده‌ست بۆ پووش و په‌ڵاشیش ده‌بات بۆ خۆ رزگاركردن، بۆیه‌ ئه‌توانین بڵێین لاوازیی بیركردنه‌وە‌، هه‌قی نیه‌ به‌ ئاستی ژیان و گوزه‌رانه‌وه، چونكە زۆربەی ئه‌وانه‌ی كه زمانیان درێژه گیرفانیان پڕه.‌ دەبینی بەرپرسێكی حزبیی گەورەیە، خۆی گەندەڵە و قاچاخچێتی دەكات و بازرگانیی ناشەرعی و تاوانی گەورە دەكات، كەچی ئەو بە حكوومەت دەڵێ ”گەندەڵ“، پەرلەمانتارێكە و مانگی حەوت هەشت ملیۆن دینار لە حكوومەت وەردەگرێت وێڕای پاسەوان و چەندین ئیمتیازی تر، كەچی بە ناوی خەڵكی هەژارەوە قسە دەكات و بە حكوومەت دەڵێ ”گەندەڵ“، كەسانێكی تر لە ماوەی چەند ساڵیكی كەمدا كەس نازانێ بە چی و چۆن وا زوو دەوڵەمەند بوون، كەچی ئەو خۆی پێ شەریف و ئازادیخواز و خاوێنە، ئەندامێكی حزبێكی دەسەڵاتداریش كە چەند مانگ جارێك مووچەیەكی كەم وەردەگرێت بە ”گەندەڵ و چڵكاوخۆر و كۆیلە“ دەزانێت.

هه‌ڵبه‌ته‌ قسه‌م له‌سه‌ر ئه‌وه‌ نیه‌ ژیان و ئاستی بیركردنه‌وه‌ی هه‌ندێك له‌ خه‌ڵكی باشووری كوردستان كه‌ به‌ مه‌ینه‌تیه‌كی دژواردا تێپه‌ڕیون و به‌رده‌وام تیده‌په‌ڕن، وا ده‌كات شه‌پۆل و ته‌وژمی ئه‌م دیارده‌یه‌ زیاتر و خێراتر بێ، چونكه‌ خه‌ڵكی ده‌ست به‌ هه‌ر پووش و به‌لاشێكەوە ده‌گرێ، گوێ لە هەر كەسێك دەگرێ كە باس لە ”ناعەدالەتی“ دەكات! لێ مەخابن خەڵك ئاگاداری رەوشتی تاكەكەسیی ئەو برادەرانە نین كە باس لە گەندەڵی دەكەن، بۆیە عەوامانە بە ”فریادڕەس“یان دەزانن.

هه‌رچه‌نده‌ من له‌گه‌ڵ ئه‌وه‌دا نیم كه‌ ئاستی خوێندن و بڕوانامه! ببێته‌ مایه‌ی هۆشیاری و زیره‌كی بۆ ئه‌و كه‌سانه،‌ چونكه‌ ئه‌وان باوه‌ڕیان به‌س به‌و حقده‌ی ناخیان هه‌یه و بیر لەو بەرژەوەندییە دەكەنەوە كە دەسەڵات بۆی فەراهام نەكردوون، بۆیە‌ هیچ پێوه‌رێكی ته‌ندروست نابینن بۆ بڕوابوون به‌ راستیه‌كان. خۆیان كۆیلەی ”هەستی رق و كینەن“ كەچی خەڵكێك كە كوردستانی خۆش دەوێ و لەگەڵ سەربەخۆیی كوردستاندایە، بە ”كۆیلە“ دەزانن.

زۆربەی ئه‌وانه‌ی خۆیان به‌ ”فریادره‌س و خه‌مخۆر“ داده‌نێن، بازرگانی به‌ تووڕه‌یی و مه‌ینه‌تیی خه‌ڵكی ساده‌ و بێ ده‌سه‌ڵات و هه‌ژاره‌وه‌ ئه‌كه‌ن، بە هیچ كلۆجێك نە لەپێناو بەرژەوەندیی خەڵك و نە لەپێناو بەرژەوەندیی كوردستان و ئایندەی كوردستاندا بیر ناكەنەوە و رەفتار ناكەن، ئەوانەشی وەك ئەوان بیر ناكەنەوە بە ”كۆیلە و قەڵەم فرۆش و بەرژەوەندخواز“یان دەزانن، لە كاتێكدا ئه‌و ژه‌هره‌ی ئەوان ئه‌یڕێژن، گەر بچێتە نێو مێشكی هەموو تاكێكی كوردستانیەوە، بەدڵنیاییەوە‌ مه‌رگی هه‌موو كوردستانیانی باشوور دەبێت‪.‬