ئەنەکەسە ستایشی هەڵوێستی هەسەدە دەکات
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

ئەنەکەسە ستایشی هەڵوێستی هەسەدە دەکات

ئەنجوومەنی نیشتمانی کورد لە سووریا (ئەنەکەسە) بەهۆی رێگریکردن لە بەڕێوەچوونی هەڵبژاردنی پەرلەمانی رژێمی سووریا لە رۆژئاوای کوردستان، ستایشی هەڵوێستی ئیدارەی خۆجێی رۆژئاوای کوردستان دەکات.

هەڵبژاردنی پەرلەمانی رژێمی سووریا  دەستی پێکرد و هێزەکانی سووریای دیموکرات (هەسەدە) و پارتی یەکێتیی دیموکراتی (پەیەدە)، بڕیاریان دا رێگە بە دانانی سندوقی دەنگدان لە کانتۆنەکانی رۆژئاوای کوردستان نەدەن.

کاتژمێر 7ـی سەرلەبەیانیی ئەمڕۆ یەکشەممە 19-7-2020، دەرگای بنکەکانی هەڵبژاردن بەڕووی دەنگدەرانی سووری بۆ هەڵبژاردنی 250 ئەندامی پەرلەمانی وڵاتەکەیان، کرایەوە و بڕیارە کاتژمێر 7ـی ئێوارە دابخرێن.

لوقمان ئەحمەد، گوتەبێژی بەڕێوەبەرایەتیی خۆسەر لە كۆنفڕانسێكی ڕۆژنامەوانیدا ڕایگەیاندووە، هەڵبژاردنی پەڕلەمانی سوریا لە ناوچەكانی ژێر كۆنتڕۆڵی هێزە كوردییەكان لە باكوور و باکووری ڕۆژهەڵاتی سووریا بەڕێوەناچێت و بەشداری تێدا ناكەن.

عیماد بەرهۆ، ئەندامی ئەنەکەسە، بە (باسنیوز)ی راگەیاند، هەر هەڵبژاردنێک لە سووریا لە ژێر دەسەڵاتی رژێمی ئەو وڵاتە بکرێ، ئەوان دانی پێدا نانێن.

عیماد بەرهۆ هەروەها رایگەیاند، ئەو هەڵوێستەی (هەسەدە) بە رێگرتن لە دانانی سندووقەکانی هەڵبژاردن لە ناوچەکانی رۆژئاوای کوردستان بەرز دەنرخێنن و بە هەنگاوێکی دروست و هەلوێستێکی گرنگی دادەنێن.

ئەو سەرکردەیەی ئەنەکەسە دانەنانی سندوقی دەنگدانی پەرلەمانی رژێمی سووریا لە کانتۆنەکانی رۆژئاوای کوردستان پەیوەندی بەو لێکتێگەیشتنە هاوبەشەوە هەیە، کە لە نێوان ئەنەکەسە و هەسەدە دروستبووە، چونکە ”هەموو لایەکمان گەیشتووینەتە ئەو بڕوایەی تاوەکو بەشار ئەسەد لە دەسەڵاتی سووریادا بێت، هەڵبژاردن بایەخ و گرنگی بۆ گەلی کوردستان لە رۆژئاوای کوردستان نابێت و هەر ڕێگەدان و بەشداریکردنێکیش شەرعیەتدانە بە مانەوەی ئەسەد“.