بەڕێوەبەری گشتی کشتوکاڵی گەرمیان، دەستپێکردنی پرۆسەی وەرگرتنی گەنمی جووتیارانی سنووری گەرمیانی ڕاگەیاند کە بڕەکەی ٣٥ هەزار تۆن دەبێت بۆ هەموو گەرمیان.
شادیە حسێن، بەڕێوەبەری گشتی کشتوکاڵی گەرمیان، بە (باسنیوز)ی ڕاگەیاند: "بەڕێوەبەرایەتی گشتی کشتوکاڵی هەموو ئامادەکارییەکی کردووە بۆ دەستپێکردنی پرۆسەی وەرگرتنی گەنمی جووتیاران و لە چەند ڕۆژی داهاتوودا پرۆسەکە دەستپێدەکات".
گوتیشی: "بڕی خەمڵێنراوی بەرهەمی گەنم لە سنووری گەرمیان بۆ ئەمساڵ بە ١٦٣ هەزار و ٢٥٣ تۆن دیاریکراوە و کۆی ئەو جووتیارانەش کە بەرهەمی گەنمیان هەیە ٥ هەزار و ٧٥٣ جووتیارە".
ئاماژەی بەوەشدا "ئەو ڕێژەیەی بۆ هەرێمی کوردستان دیاریکراوە لەلایەن وەزارەتی بازرگانیی عێراقەوە ٣٩٠ هەزار تۆنە و لەو ڕێژەیەش گەرمیان ٣٥ هەزار تۆنی بەردەکەوێت".
ڕوونیشیکردەوە "لەگەرمیان ڕێژەکە دابەشکراوە بەسەر جووتیارانی سنوورەکەدا و سەرەتاش گەنمی جووتیارانی سنووری کشتوکاڵی کەلار وەردەگیرێت و دواتر قەزا و شارەدێکانی دیکە".