مەسرور بارزانی: پاپا فرەنسیس پێزانینی هەبوو بۆ هەنگاوەکانی حکوومەتی هەرێمی کوردستان
سەرۆکی حکوومەتی هەرێمی کوردستان رایدەگەیەنێت، کە پاپای ڤاتیکان پێزانینی هەبوو بۆ هەنگاوەکانی حکوومەتی هەرێمی کوردستان لە پەرەپێدانی پێکەوەژیان لە هەرێمی کوردستان.
رۆژنامەی بەناوبانگی ئیتاڵی (لە ریپوبلیکا ) چاوپێکەوتنێکی لەگەڵ سەرۆکی حکومەتی هەرێمی کوردستان لە بارەی سەردانەکەی بۆ ئیتاڵیا و دیدارە گرنگەکەی لە گەڵ پاپا فرەنسیسی پاپای ڤاتیکان و سەرۆک وەزیران و بەرپرسە باڵاکانی دیکەی ئەو وڵاتە، کردووە.
لەو چاوپێکەوتنەدا، کە رۆژنامەنووسی ناسراوی ئیتاڵی ڤینچێنتسۆ نیگرۆ ئەنجامی داوە ، مەسرور بارزانی، سەرۆکی حکومەتی هەرێمی کوردستان باسی لە مەترسییەکانی داعش و گرووپە تیرۆریستییەکان بۆ سەر ئاسایشی جیهان کردووە.
دەقی چاوپێکەوتنەکە:
وەرگێڕانی: سامان سابونچی
رۆژنامەنووسە ئیتاڵییەکە: چ زانیارییەکتان لە بارەی داعشەوە بە هاوڕێ ئیتاڵیەکانتان دا ؟
مەسرور بارزانی: داعش بەتەواوی لەناو نەچووە، ئێستا خەریکی خۆرێکخستنەوەیە، هاوکاری هاوپەیمانی نێودەوڵەتی و مانەوەیان لە ناوچەکە بۆ ئێمە زۆر گرنگە،. لە کۆبوونەوەکانماندا لە رۆما یەکێک لەو بابەتانەی باسمان کرد ئەوە بوو، کە پێویستە بارودۆخی ئابووری و کۆمەڵایەتی لە عێراق چاک بکرێت لە پێناو بنبڕکردنی ئەو فاکتەرانەی یارمەتی سەرهەڵدانەوەی تیرۆر بۆ ماوەیەکی درێژخایەن دەدەن. هەژاری و پێشێڵکردنی مافەکانی مرۆڤ، دەبنە هۆکاری نزیکبوونەوە لە رێکخراوە تیرۆریستییەکان و گەشەکردنیان.
رۆژنامەنووسە ئیتاڵییەکە: ماوەیەکە ئاڵۆزییەکان لە ناوچەکەتان گەیشتووەتە لوتکە، بەتایبەتی دوای کوشتنی جەنەرالی ئێرانی قاسم سولەیمانی لە لایەن ئەمریکییەکانەوە.
مەسرور بارزانی: ئاشکرایە ئەو ناوچەیەی ئێمە تێیدا دەژین ناوچەیەکی سەختە و ئاسان نییە . بەڵام دەبێت لەگەڵ رووداوەکاندا هەڵبکەین و تێیدا بژین .
رۆژنامەنووسە ئیتاڵییەکە: چۆن پەیوەندیتان لەگەڵ ئەمریکای هاوپەیمان و لە هەمانکاتدا ئێران بەڕێوە دەبەن؟
مەسرور بارزانی: ئێران دراوسێمانە و وڵاتێکی زۆر گرنگی ناوچەکەیە، ئەوان هەوڵدەدەن بەرژەوەندییەکانیان بپارێزن، ئەمەریکاش هاوپەیمانمانە، لەشەڕی دژی تیرۆر و هەروەها دواتر بۆ سەقامگیریی ناوچەکە هاوکارییان کردووین. ئێمە لەناو ناوچەیەکداین هەزاران کێشەی هەیە، بەردەوام هەڵمانکردووە و هەر بەردەوامیش دەبین.
رۆژنامەنووسە ئیتاڵییەکە: جەنەراڵ سولەیمانی دانوستاندنکارێکی پێداگربوو، وابزانم زۆر جار ئەوتان بینیوە؟
مەسرور بارزانی: داعش هەڕەشە بوو بۆ ئێمە لە کوردستان، هەروەها بۆ حکومەتی بەغدا و عێراق بەگشتی. کاتێکیش بووە مایەی هەڕەشەیەکی ترسناک بۆ عێراق، لە هەمانکاتدا هەڕەشە بوو بۆ ئێرانیش، کە دراوسێی ئێمەیە. بۆیە کاتێک داعش بەشێوەیەکی ترسناک هێرشی دەکرد، ئێران هەڵوێستی وەرگرت و پەیوەندییەکانی لەگەڵمان پتەوتر کرد . بەڵێ قاسم سولەیمانی چەندین جار سەردانی کردووین.
رۆژنامەنووسە ئیتاڵییەکە: بۆچوونی ئێوە لەسەر کوشتنی ئەو چییە؟ لە نێوان ئەمەریکا و ئێران کامیان هەڵدەبژێرن؟
مەسرور بارزانی: وەکو گوتم، ناوچەکەمان رووداوی زۆری تێدا روودەدەن، بەڵام ئێمە ناتوانین لێی دەربچین و جێی بهێڵین، بۆیە هەمیشە رێگاچارەیەکمان دۆزیوەتەوە.
رۆژنامەنووسە ئیتاڵییەکە: ئێوە لە حکومەتی هەرێمی کوردستان، دووساڵ لەمەوبەر کێشەیەکی جدیتان لەگەڵ حکومەتی ناوەندی لە بەغدا بۆ دروستبوو، کاتێک هەوڵتاندا رێگای جیابوونەوە بگرنەبەر. ئێستە پەیوەندییەکانتان چۆنە؟
مەسرور بارزانی: لەگەڵ حکومەتی پێشووی بەغدا کێشەو جیاوازیی سیاسیمان هەبوو. ئێستا لە بەغدا بارودۆخێکی نوێی سیاسی هەیە، ماوەیەکە بە هۆی هەبوونی ناسەقامگیر ، چارەسەری زۆربەی کێشە سیاسییەکان خاوبووە . هەرێمی کوردستان لە دەستوری عێراقدا قەوارەیەکی جێگیرە و دانی پێدا نراوە. بۆیە دەبێت دەستوور وەکو خۆی جێبەجێبکرێت.
رۆژنامەنووسە ئیتاڵییەکە: مەبەستت لە حوکمڕانی و خۆبەڕێوەبردنی خۆتانە؟
مەسرور بارزانی: بەڵێ ، ئێمە لە حکومەتی هەرێمی کوردستان هەندێک چاکسازی کارگێڕی و ئابووریمان دەست پێکردووە، بەتایبەتی ئەنجامدانی ئاسانکاری بۆ وەبەرهێنەرانی بیانی و باشترکردنی دۆخی ئابووری. دەمانەوێ هەماهەنگی زیاتریشمان لەگەڵ بەغدا هەبێت.
رۆژنامەنووسە ئیتاڵییەکە: بەڕێزتان لە ڤاتیکان لە لایەن پاپا فرانسیس و سەرۆک وەزیرانی ڤاتیکان پێترۆ پارۆلین پێشوازی کران، ئەمە گرنگیپێدانێکی گەورە بوو بۆ هەرێمێکی بچووکی وەک کوردستان.
مەسرور بارزانی: ئێمە بە قەداسەتی پاپامان راگەیاند، کە پابەندین بە رێزگرتن لە ئاینە جیاوازەکان و پاراستنی مافی پەیڕەوانی ئاینەکانی وەک کریستیان و ئێزدییەکان. ئێمە ئێستا میوانداریی هەزاران پەنابەر و ئاوارە دەکەین، کە لەدەست چەوسانەوە پەنایان بۆ ئێمە هێناوە ، ئێمە شانازی بە پێشوازیکردن لە زیاتر لە ملیۆنێک کەس دەکەین.
سوپاسی قەداسەتی پاپا فرەنسیسمان کرد و داوای پشتگیری و نزامان کرد لە پێناو ژیانێکی خۆشتر و سەقامگیری. قەداسەتی پاپاش رێز و پێزانینی هەبوو بۆ ئەو کارانەی ئێمە ئەنجامی دەدەین.
