ئەمڕۆ لە گۆشەنیگای مێژووەوە
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

ئەمڕۆ لە گۆشەنیگای مێژووەوە

- لە 1-4-1820 كلۆد یۆس ریچ، گەڕیدەی ناسراوی بەریتانی گەشتە بەناوبانگەكەی بۆ كوردستان دەست پێكرد و لە شاری بەغداوە بەڕێ كەوت، ریچ لەو گەشتەیدا خێزانەكەی و ژمارەیەك لە ئەندامانی نشینگەی بەغدای لەگەڵدا بووە و لە 25ی نیسان گەیشتووەتە شارۆچكەی كفری و لە هەشتی ئایاری هەمان ساڵدا گەیشتۆتە شاری سلێمانی، پایتەختی میرنشینی بابان و هەمان رۆژ مەحموود پاشای بابان سەردانی كردووە و بەخێرهاتنی كردووە و تا 17ی تەموزی هەمان ساڵ ریچ لە سلێمانی ماوەتەوە و لەوەو دوا بەرەو شاری سنەی پایتەختی میرنشینی ئەردەڵان بەڕێ‌ كەوتووە و لە 25ی ئابی ئەو ساڵەدا گەیشتۆتە سنە، بەڵام لە 7ی ئەیلولدا توانیوێتی چاوی بە ئەمانوڵا خانی میری ئەردەڵان بكەوێت.

 

- لە 1-4-1919 حاكمی سیاسیی بەریتانیا لە زاخۆ لەلایەن هێزەكانی عەشیرەتی (گویی) كوژرا و ئەو رووداوە بووە دەستپێكی راپەرینی گشتی لە بادینان لە دژی هێزەكانی بەریتانیا.

 

 -لە 1-4-1923 بڕیاری بە پارێزگابوونی شاری هەولێر و جیابوونەوەی لە پارێزگای كەركووك دەركرا.

 

- لە 1-4-1931 لە سەردەمی حوكمی پاشایەتیی عێراقدا بۆ یەكەمین جار پارە و دراوی تایبەت بە پاشانشینی عێراقی چاپ کرا، شیاوی باسە لە پاش بەرپابوونی جەنگی یەكەمی جیهانی و لەو كاتەوەی عێراق كەوتە ژێر دەسەڵاتی بەریتانیاوە لە عێراقدا و دراوی هیندی بە ناوی "عانە و رووپییە" بەكار دەهات، بەڵام دراوە نوێیەكەی عێراق ناوی درهەم و دیناری لێ‌ نرا.

 

- لە 1-4-1942 گۆڤاری "رۆناهی" لە شام بڵاو كرایەوە، ئەو گۆڤارە لەلایەن "میر جەلادەت عالی بەدرخان"ەوە بڵاو کراوەتەوە و بە پیتی لاتینی و بە شێوەزاری كرمانجیی بۆتان بڵاو كراوەتەوە، گۆڤارەكە تا ئاداری 1945 بەردەوام بووە بە هەمووی 28 ژمارەی لێ‌ دەرچووە.

 

- لە 1-4-1960 گۆڤاری "رۆژی نوێ"‌ لە شاری سلێمانی بە زمانی كوردی بڵاو كرایەوە و كامەران موكری شاعیری نیشتمانپەروەر و سەرنووسەری بووە، ئەو رۆژنامەیە تاكوو پاییزی 1961 بڵاو كراوەتەوە و تەنیا 18 ژمارەی لێ بڵاو كراوەتەوە ئەو گۆڤارە لە بوارەکانی ڕۆشنبیری و ئەدەب و سیاستەدا پێگەیەكی باشی هەبووە.

 

- لە 1-4-1965 دووبارە شەر لە نێوان شۆڕشی مەزنی ئەیلوول و هێزەكانی رژێمی رووخاوی عێراق دەستی پێكردەوە و بۆ جاری سێیەم هێرشی سوپای رژێمی عێراق بۆ سەر كوردستان دەستی پێ‌ كردەوە و ئەمەش پاش ئەوە هاتووە حكوومەتەكەی عەبدولسەلام عارف ئامادە نەبوو لە رێگەی وتووێژی ئاشتییەوە دۆزی رەوای كورد چارەسەر بكات.

 

- لە 1-4-1979 پاش ڕاگەیاندنی ڕاپرسی لە ئیران، حوكمرانیی كۆماری ئیسلامیی ئێران، بە سەرۆكایەتی ڕۆحوڵا خومەینی دامەزرا و بەهۆی ئەوەی كە ئەو ڕیفراندۆمە هیچ بنەمایەکی یاسایی و نێودەوڵەتیی نەبوو و دیموكراسی و مافی نەتەوەكانی پێشێل كرا، حزب و لایەنە سیاسییەكانی كوردستانی ڕۆژهەڵات ئەو ریفراندۆمەیان بایكۆت كرد و یەکەم هەڵوێستی نەتەوەی کوردە بەرانبەر بە سیستمی کۆماری ئیسلامی و بە فەرمی نەیناسی.

 

- لە 1-4-1988 ئەنفالی گوند و ناوچەكانی قەرەداغ برایە ئاستێكی توندوتیژ و مەترسیدارەوە، لەو رۆژەدا سەدان گوندی ناوچەی قەرەداغ وێران كران و دانیشتوانەكانیشیان بێ‌ سەروشوێن كران و ژمارەیەكی زۆریشیان راگوێزران.

 

- لە 1-4-2002 لە نەخۆشخانەی رزگاری لە شاری هەولێر نووسەر و بیرمەندی ناوداری كورد، مامۆستا مەسعوود محەمەد لە تەمەنی 83 ساڵیدا بە نەخۆشییەكی سەخت  کۆچی دوایی کرد.

 

- لە 1-4-2016 تیرۆریستێك خۆی لە ناوەندی شارۆچكەی مەخموور تەقاندەوە و بەو هۆیەوە 4 پۆلیس شەهید بوون و ژمارەیەكی دیكەش بریندار بوون.