ئەمڕۆ لە گۆشە نیگای مێژووەوە
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

ئەمڕۆ لە گۆشە نیگای مێژووەوە

- لە 16-3-1975 لە كۆبوونەوەیەكی فراواندا، بارزانیی نەمر رای گەیاند كە پێویستە نەخشەیەكی هێرشكردن لە میحوەری رواندز بكرێتەوە و پلانی توكمە دابنرێت بۆ ئەوەی بەرگری ل ماڵی هاووڵاتییان بكرێت.

 

- لە 16-3-1988 تاوانێكی نامرۆیانەی‌تر لەدژی نەتەوەی كوردو دەرهەق بە ویژدانی مرۆڤایەتی ئەنجام درا، لە كاتژمێر یانزەی پێشنیوەڕۆی ئەو رۆژەدا شاری هەڵەبجە بە چەكی  كیمیایی لەلایەن حکوومەتی بەعسی ڕووخاوەوە بۆردمان كرا و لە ئەنجامدا زیاتر لە 5 هەزار هاووڵاتیی بێتاوانی دانیشتووی شارەكە شەهید بوون و زیاتر لە ١٠ هەزار کەسی دیکەش بریندار بوون و ژینگەی ناوچەكەش بە جۆرە ژەهرێكی كیمیایی ئالوودە بوو كە تا ئێستاش كاریگەری نەرێنی بەسەر دار و درەخت و ژینگەی هەڵەبجەوە بەجێ هێشتووە، ئەوە یەكەمجار نەبوو رژیمی بەعسی لەناوچوو كوردستانی بە چەكی كیمایی بۆردمان كردبوو، پێشتریش زۆر ناوچەی تریشی وەک (بالیسان، بادینان لە باشووری کوردستان) و شارەکانی (سەردەشت، نۆدشە و گوندی زەردە لە کرماشا) لەلایەن حکوومەتی بەعسەوە كیمیاباران كراون و بە سەدان کەس شەهید و بە هەزاران خەڵکیش بریندار بوون، بۆردمانكردنی هاووڵاتییە مەدەنییەكانی هەڵەبجەی كوردستان بە چەكی كیمیایی هێندە ترسناكە كە تا ئەمڕۆش هەندێك لەو منداڵانەی لەو شارەدا دێنە ژیانەوە، چەندین كەموكورتی بایلۆژی بە جەستەیانەوە دیارە، هەڵەبجە كە ئەمڕۆ بۆتە یەكێك لەو  ناسنامانەی لە جیهاندا مەرگەساتی كورد و مرۆڤایەتی پێ‌ دەناسرێتەوە یەكێكە لە تاوانە دڕندانەییەكانی سەدەی بیستەم، لەو تاوانەدا لە نێوان منداڵ و ئافرەت و پیر و پەككەوتە و درەخت و دار و ئاژەڵەكانیشدا جیاوازی نەكراوە.

 

- لە 16-3-1990 سەدام حوسێن دیكتاتۆری پێشووی عێراق بڕیاری دا كە قەڵای كەركووك خاپور بكرێت بۆ ئەوەش لێژنەیەكی سێ قۆڵی لە قایمقام و شارەوانی و بەڕێوەبەرایەتی شوێنەواری كەركوك پێكهێنرا.

  

- لە 16-3-1995 ژمارە سفری رۆژنامەی خەبات ئۆرگانی پارتی دیموكراتی كوردستان چاپی نێودەوڵەتی بە زمانی عەرەبی لە لەندەن بڵاو كرایەوە.

 

- لە 16-3-2003 جۆرج بۆش سەرۆكی ئەمریكا، توركیای ئاگادار كردەوە كە نابێت یەكلایەنە هێزەكانی رەوانەی باشووری كوردستان بكات.

 

- لە 16-3-2004 خۆپیشاندان لە شار و ناوچەكانی رۆژئاوای كوردستان لەدژی حكوومەتی سووریا فراوانتر بوو و شارەكانی عەفرین و حەلەبیشی گرتەوە و هێزە ئەمنییەكانی سووریاش بە توندی رووبەڕووی خۆپیشاندەران بوونەوە و ژمارەیەكیان كوشت و ژمارەیەكی دیكەشیان دەستگیر كرد.

 

- لە 2014 -3-16 سەرۆک بارزانی، سەرۆکی ئەوکاتی هەرێمی کوردستان بە فەرمی بڕیاری بە پارێزگاکردنی هەڵەبجەی واژۆ کرد و هەڵەبجە وەک چوارەم پارێزگای هەرێمی وکردستان ناسێندرا.

 

- لە 16-3-2015 هێزەكانی پێشمەرگەی كوردستان هێرشیان كردە سەر گوندەكانی "وەحدە و خالد و سەعد" لە دەڤەری داقووق و توانیان ژمارەیەكی زۆری تیرۆریستانی داعش بكوژن. لەو هێرشەدا پێشمەرگە توانی هەر سێ گوندەكە لە داعش پاك بكەنەوە.