ئەمڕۆ لە گۆشەنیگای مێژووەوە
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

ئەمڕۆ لە گۆشەنیگای مێژووەوە

- لە 11-3-1824 میری ڕواندز، میر محەمەد، کە بە پاشاى کۆرە و پاشاى گەورەش ناسراوە، میرى هەرە ناودارى میرنشینی سۆران، شارۆچكەی پردێ كۆنترۆل كرد.

 

- لە 11-3-1925 یەكەمین ژمارەی گۆڤاری دیاریی كوردستان لە بەغدا لەلایەن "ساڵح زەكی ساحیبقەران"ەوە چاپ و بڵاو کرایەوە.

 

- لە 11-3-1925 بڕیار درا كە شەڕڤانانی شێخ سەعیدی پیران هێرش بكەنە سەر شاری ئامەدی باكووری كوردستان، بەڵام لە یەكەم رڕووبەڕووبوونەوەدا تووشی شكست هاتن.

 

- لە 11-3- 1970 شۆڕشی مەزنی ئەیلوول بە سەركردایەتیی مستەفا بارزانیی نەمر دەسكەوتێكی دیرۆكی بۆ كوردستانی عێراق بەدەست هێنا، لە رۆژێكی وەكوو ئەمڕۆی ساڵی 1970دا رێكکەوتنامەی 11ی ئادار لە رادیۆ و تەلەفزێۆنی عێراقەوە لەلایەن سەركۆماری عێراقەوە راگەیەندرا و بۆ یەكەمین جار لە مێژوودا شۆڕشێكی كوردستانی توانی حكوومەتێكی ناوەندی خودان هێزێكی سەربازیی پۆشتە و پڕچەك ناچار بكات و بە ڕەسمیدان بە مافە رەواكانی گەلی كوردستاندا بنێت، رێكکەوتننامەی یانزەی ئادار دانپێدانانێكی رەسمیی حكوومەتی ناوەندی عێراق بوو بە دەسەڵاتێكی ئۆتۆنۆمی (خودموختاری) بۆ كوردستانی عێراق كە لەو قۆناغەی شۆڕشی كوردستان و هەلومەرجی جیهانیدا ئەگەر رژیمی بەعس بە راستی جێبەجێی بكردایە، ئەوا بەشێكی زۆری داوا رەواكانی گەلی كوردستانی بەدی دەهێنا لەگەڵ ئەوەشدا ئێستاش و ئەوکاتەش یەكێكە لە سەركەوتنە مەزنەكانی نەتەوەی كورد، لە سەدەی بیستەمدا لە پاش یانزەی ئادارەوە بزاڤی رزگاریخوازی كوردستان چووە قۆناغێكی بەرزترە، بەتایبەتی کە حكوومەتی ناوەندیی عێراق بە فەرمی دانی بە مافە رەواكانی گەلی كوردستاندا نا.

 

- لە 11-3-1974 پێنج وەزیری كورد لەناو حكوومەتی بەعسی عێراق دەستیان لە كار كێشایەوە و خۆیان گەیاندە ریزەكانی شۆڕش لە باشووری كوردستان.

 

- ئەمڕۆ 11-3-1991، 28 ساڵ بەسەر راپەڕینی هاووڵاتییان و رزگارکردنی هەولێری پایتەختی هەرێمی کوردستان تێ دەپەڕێت.

 

3-11- 1991دا، جەماوەری شاری ھەولێر ھەر لە سپێدەی بەیانییەوە لە گەڕەکەکانی راپەڕین (ئەوکات حەوتی نیسان بوو)، شۆڕش و مەلایان" ڕژانە سەر شەقامەکان و بارەگاکانی ڕژێمی بەعس.

 

تا ئێوارەی ئەو رۆژە، خەڵکی راپەڕیو بە پاڵپشتیی هێزی پێشمەرگە، دائیرەکانی ئەمن، جەیشی شەعبی، ئەمنی تەواری، مەنزوومەی شیمالی و بنکەکانی پۆلیسیان رزگار کردەوە. چەکدارانی بەعس لە دایەرەی ئەمن و مەنزومەی شیمالی هەوڵی بەرگرییان دا و ژمارەیەکی زۆریان لێ کوژرا و دواتریش ئەوانەی دەستگیرکران، بەشێکیان هەر لەوێ لەلایەن هاووڵاتییانەوە گوللەباران کران.

 

هەر لە ئێوارەی ھەمان ڕۆژ، فەیلەقی 5 و سەربازگەی ھەولێر (ئێستا گەڕەکی بەختیاری و پارکی شەهید سامی عەبدولڕەحمان لە شوێنی سەربازگەکە دروست کراون) کۆنتڕۆل کرا. بە رزگارکردنەوەی شاری هەولێر، راپەڕینی گەلەکەمان، کە لە رۆژی 5ـی مانگەوە لە رانیە و دواتریش بەشێک لە شار و شارۆچکەکانی کوردستان دەستی پێ کرد، چووە قۆناغێکی نوێ و سەرکەوتنی گەل و هێزی پێشمەرگە مسۆگەر بوو.